இந்தியாவின் அண்டைநாடு மிக மோசமானது : அமைச்சர் சிதம்பரம் ஆவேசம்

உலகிலேயே மிக மோசமான அண்டை நாட்டை கொண்டுள்ளது இந்தியாவே. எனவே, நாட்டின் சுதந்திரம், பாதுகாப்பு மற்றும் இறையாண்மையை காப்பாற்ற, பாதுகாப்புப் படையினர் மிகவும் விழிப்போடு செயல்பட வேண்டும்,'' என, மத்திய உள்துறை அமைச்சர் சிதம்பரம் கூறியுள்ளார்.
டில்லியில் நடைபெற்ற நிகழ்ச்சி ஒன்றில், எல்லைப் பாதுகாப்புப் படையினருக்கு பதக்கங்கள் மற்றும் விருதுகளை வழங்கிப் பேசிய மத்திய உள்துறை அமைச்சர் சிதம்பரம் கூறியதாவது: இந்தியாவின் அண்டை நாடுகள் மிகவும் சர்ச்சைக்குரியவை. உலகிலேயே மிக மோசமான அண்டை நாட் டை கொண்டுள்ளது இந்தியா தான். இந்த அண்டை நாட்டில் உள்ள அரசுகளும் வலுவற்ற நிலையில் உள் ளன. அதனால், நம் நாட்டின் பாதுகாப்பிற்கு மிகுந்த அச்சுறுத்தல் ஏற்பட்டுள்ளது. எனவே, நாட்டையும், அதன் இறையாண்மையையும் பேணிக்காப்பதில் எல்லை பாதுகாப்புப் படையினர் மிகவும் விழிப்போடு செயல்பட வேண்டும்.
சத்திஸ்கர் மற்றும் ஒடிசாவில் நக்சலைட்களுக்கு எதிரான வேட்டையில், மத்திய துணை ராணுவப் படையைச் சேர்ந்த 10 ஆயிரத்திற்கும் மேற்பட்டோர் ஈடுபட்டுள்ளனர். அவர்கள் உளவுத் தகவல்கள் அடிப்படையில், நக்சலைட்களுக்கு எதிரான நடவடிக்கையை தொடர வேண்டும். அப்போது தான் பாதுகாப்புப் படையினருக்கு சேதம் குறைவாக இருக்கும். மேலும், மக்களிடம் நல்ல பெயர் எடுக்க, பல நல்ல பணிகளையும் துணை ராணுவத்தினர் மேற்கொள்ள வேண்டும்.
துணை ராணுவப் படையினருக்கு மத்திய அரசு எப்போதும் துணை நிற்கும். அவர்களுக்கு சிறப்பான பயிற்சி, தேவையான ஆயுதங்கள் மற்றும் சிறப்பான பணிச் சூழ்நிலை உருவாக்கப்படும். துணை ராணுவப் படையினருக்காக கடந்த இரண்டு ஆண்டுகளில் ஏரா ளமானவற்றை மத்திய அரசு செய்துள்ளது. முன்பைவிட ஏராளமான அளவில் பணம் கொடுக்கப்பட்டதோடு, நவீன உபகரணங்களும் வழங்கப்பட்டுள்ளன.
எல்லை பாதுகாப்புப் படை, இந்தியாவின் மேற்கு மற்றும் கிழக்கு பகுதி எல்லைகளை பாதுகாப்பதற்காக உருவாக்கப்பட்டது. எதிரிப்படைகளை எதிர்கொள்வதில் இவர்கள் தான் முன்வரிசையில் இருப்பர். கடந்த 1965ம் ஆண்டில் எல்லை பாதுகாப்புப் படை உருவாக்கப்பட்டது.
அதன்பின், 1,658 பேர் பல்வேறு விதமான நடவடிக்கைகளின் போது உயிரிழந்துள்ளனர். அவர்களைப் போன்றவர்களின் உயிர் தியாகத்தால் தான், நாம் அமைதியாக வாழ முடிகிறது மற்றும் தூங்க முடிகிறது. இவ்வாறு அமைச்சர் சிதம்பரம் பேசினார்.

உறுதியான நடவடிக்கைகள் இந்தியாவிடமிருந்து வராததால் தான் நாம் மோசமான அண்டை நாட்டை பெற்றுள்ளோம். (பாவம் அவருக்கு இது தெரியலப்பா)