பொது தொகுதியில் வென்ற தலித் எம்.எல்.ஏ. பீம்ராவ்

by kitcha Fri May 20, 2011 9:11 pm

சட்டசபை தேர்தலில் போட்டியிட்டு வெற்றி பெறுவது சாதாரண விசய மல்ல. அதுவும் ஒரு பொது தொகுதியில் தலித் இனத்தை சேர்ந்தவர் போட்டியிட்டு வெற்றி பெறுவதை இமாலய சாதனை என்று சொல்வதில் தவறில்லை. இப்படிப்பட்ட சாதனையை மார்க்சிஸ்டு கம்யூனிஸ்டு எம்.எல்.ஏ. பீமராவ் நிகழ்த்தி உள்ளார்.

சென்னை அருகே உள்ள மதுரவாயல் தொகுதி பொது தொகுதி ஆகும். இந்த தொகுதியில் அ.தி.மு.க. கூட்டணியில் மார்க்சிஸ்டு வேட்பாளராக பீம்ராவ் தலித் சமூகத்தை சேர்ந்த இவர் களம் இறங்கி வெற்றி வாகை சூடி உள்ளார்.

பீம்ராவ் பழவந்தாங்கல் என்.ஜி.ஓ. காலனியில் ஒரு வீட்டின் மொட்டை மாடியில் அமைக்கப்பட்டுள்ள ஆஸ்பெஸ்டாஸ் குடிசை வீட்டில் வாழ்கிறார்.

இவருக்கு 2 மகன் ஒரு மகள் உள்ளனர். மூத்த மகன் என்ஜினீயரிங் படிக்கிறார். மற்றவர்கள் பள்ளிகளில் படிக்கிறார்கள். இவர்களது கல்வி செலவை உறவினர்களே பார்த்து கொள்கிறார்கள்.

முழு நேர அரசியல் வாதியாக வாழும் இவருக்கு கட்சியில் இருந்து மாதம் ரூ.3 ஆயிரம் சம்பளம் வழங்கப்படுகிறது. இதில்தான் குடும்பத்தை நடத்த வேண்டும். வீட்டில் சொல்லிக் கொள்ளும்படி இருப்பது ஒரு பித்தளை தவலை மற்றும் அரசின் இலவச கலர் டி.வி. மட்டும்தான். இனி எம்.எல்.ஏ. ஆகிவிட்டதால் மாதம் ரூ.50 ஆயிரம் சம்பளம் கிடைக்கும். ஆனால் அந்த சம்பளம் முழுவதும் கட்சிக்கு சென்று விடும்.

பீம்ராவுக்கு கிடைப்பது வெறும் ரூ.5 ஆயிரத்து 600 மட்டும்தான். எம்.எல்.ஏ.வாக வெற்றி பெற்றதில் பீம்ராவுக்கு இரட்டிப்பு மகிழச்சி. ஒன்று மக்கள் பணியாற்ற கிடைத்த வாய்ப்பு. இன்னொன்று ஆட்டோ ஓட்டுனர் சங்கத்தை சேர்ந்தவர்கள் 10 புதிய பேன்ட் சட்டை வாங்கி கொடுத்தது மற்றும் பலர் வாங்கி தருவது. அவ்வாறு பேன்ட் சட்டை வாங்கி தருபவர்களிடம் தவறாமல் தையல் கூலியையும் கேட்டு வாங்கி கொள்கிறார்.

இதை சிலர் தவறாக நினைக்கலாம். ஆனால் அவரது வாழ்க்கை முறையை உணர்ந்தவர்கள் தவறாக நினைக்க மாட்டார்கள்.

நக்கீரன்