தேசிய ஊரக வேலை திட்டத்துக்கு விவசாயிகள்...எதிர்ப்பு

positivekarthick · positivekarthick Thu May 19, 2011 9:44 am

மேட்டூர்: தேசிய ஊரக வேலை திட்டம் காரணமாக, கூலியாட்கள் பற்றாக்குறை ஏற்படுவதால் கிராமங்களில் விவசாய வேலைக்கு ஆட்கள் கிடைப்பதில்லை. அதனால், ஊரக வேலை திட்டத்துக்கு விவசாயிகள் மத்தியில் எதிர்ப்பு கிளம்பியதால், சாகுபடி சீசஸின் மட்டும் பணியை தற்காலிகமாக நிறுத்த பஞ்., தலைவர் அரசுக்கு கோரிக்கை விடுத்துள்ளார். தேசிய ஊரக வேலை திட்டத்தின் கீழ் தமிழகம் முழுவதும் அனைத்து பஞ்.,களிலும் குடும்பத்தில் ஒருவருக்கு, ஆண்டுக்கு, 100 நாள் வேலை வழங்கப்படுகிறது. ஒவ்வொரு பஞ்சாயத்திலும், 200 முதல், 1,000 தொழிலாளர்கள் வரை ஊரக வேலை திட்டத்தின் கீழ் கால்வாய், ஏரி, குளம் தூர்வாருதல், சாலை சீரமைத்தல் போன்ற பணிகளில் ஈடுபட்டுள்ளனர். திட்டத்தில் ஒரு தொழிலாளிக்கு தினமும், 119 ரூபாய் ஊதியம் வழங்கப்படுகிறது. கிராமங்களில் உள்ள பெரும்பாலான தொழிலாளர்கள் ஊரக வேலை திட்ட பணிக்கு சென்று விடுவதால், விவசாய வேலைகளுக்கு கூலியாட்கள் கிடைப்பதில்லை.

அதனால், ஊரக வேலை திட்டத்துக்கு விவசாயிகள் மத்தியில் எதிர்ப்பு கிளம்பியுள்ளது. ஊரக வேலை திட்டத்தில் அரசு ஒதுக்கீடு செய்ய பணியை முழுமையாக செய்தால் மட்டுமே முழுமையான ஊதியம் வழங்கப்படும். இல்லையேல் செய்து முடித்த பணிக்கேற்ப ஊதிய வழங்கப்படும். ஆனால், பல பஞ்சாயத்துகளில் தொழிலாளர்கள் நிர்ணயித்த பணியை முடிக்காத நிலையில் தங்களுக்கு குறைவான ஊதியம் வழங்குவதாக குற்றம்சாட்டி போராட்டத்தில் ஈடுபடுகின்றனர். மேட்டூர் தாலுகா, நவப்பட்டி பஞ்சாயத்தில், தேசிய ஊரக வேலை உறுதி திட்டத்தின் கீழ், 300க்கும் மேற்பட்ட தொழிலாளர்கள் வேலை செய்கின்றனர். தங்களுக்கு குறைவான ஊதியம் வழங்குவதாக குற்றம்சாட்டிய தொழிலாளர்கள், கடந்த 4ம் தேதி மேட்டூர்-பவானி ரோட்டில் திடீர் சாலை மறியலில் ஈடுபட்டனர். அதை தொடர்ந்து கடந்த 4ம் தேதி முதல் நவப்பட்டி பஞ்.,ல் ஊரக வேலை திட்டத்தின் கீழ் பணிகள் வழங்கப்படவில்லை. அதனால், தொழிலாளர்களும் பணிக்கு செல்ல வில்லை. காவிரி கரையோரத்தில் உள்ள நவப்பட்டி கிராமத்தில் தற்போது விவசாயிகள் கோடைகால சாகுபடி பணியை துவங்கியுள்ள நிலையில் கூலியாட்கள் கிடைக்காமல் அவதிப்படுகின்றனர். பாதிக்கப்பட்ட விவசாயிகள் தேசிய ஊரக வேலை திட்டத்துக்கு எதிர்ப்பு தெரிவித்தும், திட்டத்தை நிறுத்தும்படியும் பஞ்., தலைவரிடம் கோரிக்கை வைத்துள்ளனர். விவசாயிகள் எதிர்ப்பதால் நவப்பட்டி பஞ்.,ல், ஊரக வேலை திட்ட பணியை நிறுத்த வேண்டும் அல்லது சாகுபடி பணிகள் முடியும் வரையிலாவது நிறுத்தி வைக்க வேண்டும் என கொளத்தூர் வட்டார வளர்ச்சி அலுவலரிடம் பஞ்., தலைவர் முருகன் மனு கொடுத்துள்ளார். விவசாய வேலைக்கு கூலியாட்கள் கிடைக்காததால் தேசிய ஊரக வேலை திட்டத்துக்கு விவசாயிகள் மத்தியில் எதிர்ப்பு கிளம்புகிறது. முதல்கட்டமாக நவப்பட்டி பஞ்.,ல் இந்த பிரச்னை விஸ்வரூபம் எடுத்துள்ளது குறிப்பிடத்தக்கது.
தினமலர்