கோப்பை வென்றது இந்தியா!

by **சிவா** Tue Nov 11, 2008 1:50 pm

நாக்பூர்: பரபரப்பான நாக்பூர் டெஸ்ட் போட்டியில் இந்திய அணி 172 ரன்கள் வித்தியாசத்தில் அபார வெற்றி பெற்றது. இதன் மூலம் பார்டர்-கவாஸ்கர் கோப்பையை நான்கு ஆண்டுகளுக்குப் பின் மீண்டும் கைப்பற்றி சாதித்தது. மிகுந்த எதிர்பார்ப்புடன் இந்திய வந்த உலக சாம்பியன் ஆஸ்திரேலிய அணி வெறுங்கையுடன் பரிதாபமாக நாடு திரும்புகிறது.

இந்தியா, ஆஸ்திரேலிய அணிகள் நான்கு போட்டிகள் கொண்ட டெஸ்ட் தொடரில் பங்கேற்றது. முதல் மூன்று போட்டிகள் முடிந்த நிலையில் இந்தியா தொடரில் 1-0 என்ற முன்னிலையில் இருந்தது. நான்காவது மற்றும் கடைசி டெஸ்ட் போட்டி நாக்பூரில் நடந்தது. முதல் இன்னிங்சில் இந்தியா 441, ஆஸ்திரேலியா 355 ரன்கள் எடுத்தன. இரண்டாவது இன்னிங்சில் 295 ரன்கள் எடுத்த இந்திய அணி, ஆஸ்திரேலியாவுக்கு 382 ரன்களை வெற்றி இலக்காக நிர்ணயித்தது. நான்காம் நாள் ஆட்ட நேர முடிவில் ஆஸ்திரேலிய அணி விக்கெட் இழப்பின்றி 13 ரன்கள் எடுத்திருந்தது. ஹைடன்(5), காடிச் (8) அவுட்டாகாமல் இருந்தனர்.

by **சிவா** Tue Nov 11, 2008 1:50 pm

இஷாந்த் அசத்தல்: நேற்று கடைசி நாள் ஆட்டம் நடந்தது. முதல் இன்னிங்சில் சதம் அடித்து அசத்திய காடிச், 16 ரன்களுக்கு இஷாந்திடம் சரணடைந்தார். அடுத்து களமிறங்கிய கேப்டன் பாண்டிங்(8), மிஸ்ராவால் ரன் அவுட் செய்யப்பட்டார். மைக்கேல் கிளார்க்கும்(22), இஷாந்த் வேகத்துக்கு தாக்குப் பிடிக்கவில்லை.

ஹைடன் ஆறுதல்: ஒரு புறம் விக்கெட்டுகள் விழுந்தாலும், மறுமுனையில் துவக்க வீரர் ஹைடன் டெஸ்ட் அரங்கில் தனது 29 வது அரை சதத்தை கடந்தார். அதிரடி ஆட்டத்தை வெளிப்படுத்திய ஹைடனுடன், ஹசி இணைந்தார். இந்த ஜோடி பொறுப்புடன் ஆடி ரன்கள் சேர்க்க ஆரம்பித்தது.

சுழல் மிரட்டல்: இந்நிலையில் சுழற்பந்து வீச்சை கையில் எடுத்தார் கேப்டன் தோனி. அதற்கு நல்ல பலன் கிடைத்தது. மிஸ்ரா பந்து வீச்சில் ஹசியும்(19), ஹர்பஜன் சுழலில் ஹைடனும்(77) அடுத்தடுத்த ஓவரில் பெவிலியன் திரும்பினர். அடுத்து வந்த ஆல் ரவுண்டர் வாட்சனும்(9) இந்த முறை சோபிக்க வில்லை. தொடர்ந்து பந்து வீச்சில் மிரட்டிய மிஸ்ரா, ஹாடின்(4), கிரஜ்ஜா(4) இருவரையும் ஆட்டமிழக்கச் செய்தார்.

சூப்பர் வெற்றி: டெயிலெண்டர்களான பிரட் லீ மற்றும் ஜான்சனை ஹர்பஜன் வெளியேற்ற, 209 ரன்களுக்கு அனைத்து விக்கெட்டுகளையும் ஆஸ்திரேலியா இழந்து தோல்வி அடைந்தது. அபார ஆட்டத்தை வெளிப்படுத்திய இந்திய அணி 172 ரன்கள் வித்தியாசத்தில் அபார வெற்றி பெற்றது. இந்தியா தரப்பில் ஹர்பஜன் 4, மிஸ்ரா 3 விக்கெட் வீழ்த்தினர். இவ்வெற்றியின் மூலம் நான்கு போட்டிகள் கொண்ட பார்டர்-கவாஸ்கர் கோப்பையை 2-0 கணக்கில் கைப்பற்றி அசத்தியது.

by **சிவா** Tue Nov 11, 2008 1:51 pm

ஆட்டநாயகன்: இப்போட்டியில் மொத்தம் 12 விக்கெட் கைப்பற்றிய கிரஜ்ஜா, ஆட்ட நாயகன் விருது பெற்றார். இத்தொடரில் 15 விக்கெட் வீழ்த்திய இஷாந்த் சர்மா தொடர் நாயகன் விருதை தட்டிச்சென்றார்.

படுதோல்வி

* இத்தொடரில் 2-0 கணக்கில் வெற்றி பெற்றுள்ள இந்திய அணி, கடந்த 8 ஆண்டுகளில் 5 வது முறையாக ஆஸ்திரேலியாவுக்கு எதிராக டெஸ்ட் தொடரை கைப்பற்றியுள்ளது.

* கடந்த 15 ஆண்டுகளில் ஆஸ்திரேலியாவுக்கு எதிராக 10 டெஸ்ட் வெற்றிகளை பெற்ற ஒரே அணி இந்தியா.

* கடந்த 10 ஆண்டுகளில் ஆஸ்திரேலியா, நான்காவது முறையாக டெஸ்ட் தொடரை இழந்துள்ளது. இதற்கு முன் இலங்கை(1999-2000), இந்தியா (2000-01), இங்கிலாந்து(2005) அணிகளிடம் டெஸ்ட் தொடரை இழந்திருந்தது.

தோனியின் பெருந்தன்மை: சீனியர் வீரர்களுக்கு கொடுக்க வேண்டிய மரியாதையை, தனது செயல்பாடுகள் மூலம் அருமையாக வெளிப்படுத்தினார் இந்திய கேப்டன் தோனி. வெற்றிக்கு அருகில் இந்திய அணி வந்த போது, டெஸ்ட் போட்டிகளிலிருந்து ஓய்வு பெறும் சவுரவ் கங்குலிக்கு, கேப்டன் பொறுப்பை அளித்தார். இதை மகிழ்ச்சியுடன் ஏற்றுக் கொண்டு செயலாற்றினார் கங்குலி. இறுதியில் பரிசளிப்பு விழாவின் போது, பார்டர்-கவாஸ்கர் கோப்பையை பெற்றுக்கொள்ள தோனி அழைக்கப்பட்டார். அப்போது கும்ளேவையும் அழைத்து கவுரவப்படுத்தினார். இருவரும் சேர்ந்து கோப்பையை பெற்றனர்.

by **சிவா** Tue Nov 11, 2008 1:51 pm

வரலாறு படைத்த இந்தியா: இந்திய, ஆஸ்திரேலிய அணிகளுக்கு இடையில் 1996 முதல் பார்டர்-கவாஸ்கர் டிராபி டெஸ்ட் தொடர் நடந்து வருகிறது. இதுவரை நடந்துள்ள 8 தொடர்களில் இந்தியா 4, ஆஸ்திரேலியா 3 முறை கோப்பையை கைப்பற்றியுள்ளன. 2003-04 ல் தொடர் "டிரா'வில் முடிந்தது. கடந்த இரண்டு முறை(2004-05), (2007-08) இத்தொடர் ஆஸ்திரேலியா வசம் இருந்தது. தற்போது 4 ஆண்டுகளுக்குப் பின் இந்தியா வென்று வரலாறு படைத்துள்ளது.

பெரும் இழப்பு: பார்டர்-கவாஸ்கர் கோப்பையை கைப்பற்றியதன் மூலம், அசைக்க முடியாத கேப்டனாக வலம் வருகிறார் தோனி. இத்தொடரின் வெற்றி குறித்து தோனி கூறுகையில்,"" கடைசி நாளான நேற்று இந்திய அணிக்கு துவக்கம் சரியாக அமைய வில்லை. இருப்பினும் அடுத்தடுத்து விக்கெட்டுகளை வீழ்த்திய போது, வெற்றி இந்தியா வசம் வருவது உறுதியானது. இத்தொடரில் காம்பிர், சேவக் ஜோடி சிறப்பாக ஆடி ரன்கள் குவித்தது இந்தியாவுக்கு பலமாக அமைந்தது. கும்ளே, கங்குலி இருவரும் மிகச் சிறந்த வீரர்கள். அனைவரும் ஒரே டிரஸ்சிங் ரூமில் இருப்போம் என்று எதிர்பார்க்கவில்லை. அவர்களது ஓய்வு, இந்திய அணிக்கு ஈடுசெய்ய முடியாத இழப்பு,'' என்றார்.

பாண்டிங்கிற்கு அபராதம்!: நாக்பூர் டெஸ்ட் போட்டியின் 2வது இன்னிங்சில் ஆஸ்திரேலிய அணி தாமதமாக பந்து வீசியதற்காக கேப்டன் பாண்டிங்கிற்கு போட்டி சம்பளத்திலிருந்து 20 சதவீதம் அபராதமாக விதிக்கப்பட்டுள்ளது. தவிர, அணி வீரர்கள் ஒவ்வொருவருக்கும் தலா 10 சதவீதம் அபராதம் விதிக்கப்பட்டுள்ளது.

சச்சின் "100': நேற்றைய இரண்டாவது இன்னிங்சில் ஆஸ்திரேலிய வீரர் பிராட் ஹாடினை, கேட்ச் பிடித்து வெளியேற்றியதன் மூலம், டெஸ்ட் போட்டிகளில் "100' கேட்ச் பிடித்த வீரர் என்ற மைல்கல்லை எட்டினார் சச்சின்.

by Sponsored content

கோப்பை வென்றது இந்தியா!

கோப்பை வென்றது இந்தியா!

Re: கோப்பை வென்றது இந்தியா!

Re: கோப்பை வென்றது இந்தியா!

Re: கோப்பை வென்றது இந்தியா!

Re: கோப்பை வென்றது இந்தியா!