1980-கதாநாயகர்களும், கதாநாயகிகளும் ஒரு ஆட்டோகிராப் சந்திப்பு..!

**Tamilzhan** · **Tamilzhan** Wed Sep 09, 2009 2:18 pm

1980-கதாநாயகர்களும், கதாநாயகிகளும் ஒரு ஆட்டோகிராப் சந்திப்பு..!

1980-களில் நடித்த நடிகர்-நடிகைகள் அனைவரும் ஒன்று கூடும் ஒரு நிகழ்ச்சிக்கு நடிகைகள் சுஹாசினியும், லிசி பிரியதர்ஷனும் ஏற்பாடு செய்திருந்தார்கள்.

இந்த சந்திப்பு நிகழ்ச்சி, சென்னை நுங்கம்பாக்கத்தில் உள்ள இயக்குநர் பிரியதர்ஷன்-லிசி தம்பதிகளின் வீட்டில் நடந்தது.

இந்த நிகழ்ச்சியில் நடிகர்கள் ரஜினிகாந்த், பிரபு, கார்த்திக், மோகன், பிரதாப்போத்தன், சுமன், சுரேஷ், பானுசந்தர், விஷ்ணுவர்தன், அம்பரீஷ்,

நடிகைகள் ராதா, ராதிகா, பூர்ணிமா, நதியா, ரேவதி, ரம்யாகிருஷ்ணன், ஷோபனா, சுமலதா, பாரதி ஆகியோர் கலந்துகொண்டார்கள்.

அனைவரையும் சுஹாசினி, லிசி இருவரும் வரவேற்றார்கள்.

பழைய நடிகர்-நடிகைகள் அனைவரும் ஒருவரையொருவர் பல வருடங்களுக்குப்பின் பார்த்ததும், ஒருவரையொருவர் கட்டி அணைத்து மகிழ்ச்சியை வெளிப்படுத்தினார்கள். பழைய நினைவுகளையும், நட்பையும் பகிர்ந்து கொண்டார்கள். குடும்பம், குழந்தைகள் பற்றி நலம் விசாரித்துக் கொண்டார்கள்.

சிலர் அடையாளமே தெரியாத அளவுக்கு மாறியிருந்ததைப் பார்த்து, தமாஷ் செய்தார்கள். நடிகர் சுரேஷ் மொட்டையடித்து அடையாளம் தெரியாத அளவுக்கு காணப்பட்டார். நடிகைகள் ராதா, சுமலதா இருவரும் ரொம்ப குண்டாக காணப்பட்டார்கள். பாரதி மிகவும் மெலிந்து போய் இருந்தார்.

நிகழ்ச்சியின் சிறப்பு அம்சமாக ரஜினிகாந்த் வந்தபோது, அனைவரும் கைதட்டி ஆரவாரம் செய்தார்கள். ரஜினிகாந்த் அனைத்து நடிகர்-நடிகைகளுடனும் கைகுலுக்கினார். தன்னுடன் ஜோடியாக நடித்த நடிகைகளின் இப்போதைய தோற்றத்தை பார்த்து ஆச்சரியப்பட்டார்.

இந்த சந்திப்பை நினைவூட்டும் வகையில், ஒரு `கேக்' கொண்டுவரப்பட்டது. பழைய கதாநாயகர்கள்-கதாநாயகிகள் அனைவரும் சூழ்ந்து நிற்க, ரஜினிகாந்த் அந்த `கேக்'கை வெட்டினார். எல்லோரும் மீண்டும் கைதட்டி ஆரவாரம் செய்தார்கள். ரஜினிகாந்த் தன் கைப்பட அனைவருக்கும் `கேக்' ஊட்டினார். பின்னர் அனைவரும் ரஜினிகாந்துடன் சேர்ந்து `போட்டோ' எடுத்துக்கொண்டார்கள்.

அதன்பிறகு விருந்து நடந்தது. பழைய கதாநாயகர்கள்-கதாநாயகிகள் அனைவரும் தங்களின் அந்தக்கால பசுமையான நினைவுகளை ஒருவருக்கொருவர் பரிமாறியபடி, விருந்து சாப்பிட்டார்கள். சிரிப்பும், சந்தோஷமும் அங்கு கரைபுரண்டு ஓடியது.

அனைவரும் தங்கள் முகவரி மற்றும் செல்போன் எண்களை பரிமாறிக்கொண்டார்கள். இந்த சந்திப்பு, 3 மணி நேரம் நீடித்தது. பின்னர் அனைவரும் பிரியாவிடை பெற்றபடி, பிரிந்து சென்றார்கள்.