ஜெயலலிதாவால் எம்மை எதுவும் செய்ய முடியாது: இலங்கை அரசு !

தாமு · தாமு Mon May 16, 2011 12:17 pm

தமிழக முதலமைச்சராக பதவியேற்கவுள்ள செல்வி ஜெயலலிதாவால் இலங்கை அரசாங்கத்துக்கு எதிராக எதுவும் செய்ய முடியாது என்று அரசாங்கத்தின் உயர்மட்ட அதிகாரியொருவர் சுட்டிக்காட்டியுள்ளார். தமிழகம் என்பது ஒரு தனிநாடோ, ஐக்கிய நாடுகள் சபையின் அங்கத்துவ உரிமை பெற்ற ஒன்றோ அல்ல. இந்தியாவின் ஒரு மாநிலம் மட்டுமே. அதன் முதல்வராக தெரிவானவுடன் உலகளாவிய அதிகாரம் தனக்குக் கிடைத்தது போன்று தமிழகத்தின் புதிய முதலமைச்சர் ஜெயலலிதா ஆணவத்துடன் கருத்துக்களை வெளியிடுவது பொறுப்பு வாய்ந்த ஒரு அரசியல்வாதிக்கு அழகல்ல என்றும் அவர் வலியுறுத்தியுள்ளார்.

தமிழக முதலமைச்சர் இலங்கைக்கெதிரான எந்த நடவடிக்கைகளையும் நேரடியாக மேற்கொள்ள முடியாது. அதற்குப் பதிலாக இலங்கைக்கு எதிரான எந்தவொரு நடவடிக்கை தொடர்பிலும் இந்திய மத்திய அரசாங்கத்தையே வற்புறுத்த வேண்டும். அதன் ஊடாகவே நடவடிக்கை எடுக்க வேண்டும். ஆனால் இந்திய மத்திய அரசாங்கம் என்பது சர்வதேச பிரமாணங்களுக்குக் கட்டுப்பட்டு செயற்படும் ஒரு அரசாங்கம் என்ற வகையில் ஒரு அளவுக்குத்தான் இலங்கை மீதான அழுத்தங்களைப் பிரயோகிக்க முடியும். தவிரவும் அவற்றுக்குக் கட்டுப்பட்டு நடக்க வேண்டும் என்ற நிர்ப்பந்தமும் இலங்கை அரசாங்கத்துக்கு இல்லை.

அவ்வாறான நிலையில் தமிழகத்தின் மிகப் பெரும் அரசியல் கட்சிகளான தி.மு.க. மற்றும் அ.தி.மு.க. என்பன தமிழ் மக்களின் உணர்வுகளைக் கிளறிவிட்டு தங்கள் அரசியல் குறிக்கோள்களை அடைந்து கொள்வதற்காக இறையாண்மை கொண்ட இன்னொரு நாட்டின் விடயங்களில் நேரடித் தலையீட்டை மேற்கொள்ள முயற்சிக்கின்றனர்.

ஜனாதிபதி மஹிந்த ராஜபக்ஷவை சர்வதேச குற்றவியல் நீதிமன்றத்தில் நிறுத்தி தண்டனை வாங்கிக் கொடுப்பேன் என்று ஜெயலலிதா விடுத்துள்ள அறிவித்தலும் அவ்வாறான ஒன்றுதான். அதற்கான எந்த அதிகாரமோ, அருகதையோ அவருக்கில்லை. இவையெல்லாம் மக்களை மடையர்களாக்க விடப்படும் சிறுபிள்ளைத்தனமான வெற்று வேட்டுக்கள் மட்டுமே என்றும் அந்த அதிகாரி மேலும் சுட்டிக்காட்டியுள்ளார்.

t.star