போராடி பெற்ற சிவகங்கையை தக்க வைத்த இந்திய கம்யூ.,

சிவகங்கை : சிவகங்கை தொகுதியை அ.தி.மு.க.,விடமிருந்து போராடி பெற்ற, இந்திய கம்யூ.,தொடர்ந்து 2 வது முறையாக வெற்றி பெற்று இத்தொகுதியை தக்க வைத்து கொண்டது. இத்தொகுதியின் இந்திய கம்யூ., எம்.எல்.ஏ., குணசேகரன். கடந்த தேர்தலில் தி.மு.க., கூட்டணியில் போட்டியிட்டு வென்றார். இத்தேர்தலில், அ.தி.மு.க., கூட்டணிக்கு கம்யூ., சென்றது. தொகுதி பங்கீட்டில் இத்தொகுதி அ.தி.மு.க., வேட்பாளாராக முன்னாள் எம்.எல்.ஏ., முருகானந்தம் அறிவிக்கப்பட்டார். அதிருப்தியான இந்திய கம்யூ., கட்சியினர் , தொகுதி பங்கீட்டில் முதன் முதலில், சிவகங்கையை தங்களுக்கு ஒதுக்குமாறு கோரியது. இதனால், வேட்பாளர் மாற்றப்பட்டு, இந்திய கம்யூ., க்கு சிவகங்கை தொகுதி வழங்க கேட்டு போராடி பெற்றனர்.

அக்கட்சி சார்பில், எம்.எல்.ஏ.,வான எஸ். குணசேகரனை மீண்டும் வேட்பாளராக அறிவித்தனர். இவரை எதிர்த்து காங்., சார்பில் ராஜசேகரன் போட்டியிட்டார். இவருக்கு ஆதரவாக அமைச்சர் சிதம்பரம் தெருதெருவாக பிரசாரம் செய்தார். கடந்த தேர்தலில் காங்.,ல் தனக்கு சீட் வழங்கப்படாத அதிருப்தியில், சுயேச்சையாக (சீப்பு சின்னம்) போட்டியிட்டு, 33,000 ஓட்டுக்கள் வரை பெற்றார். இதனால், இம்முறை தி.மு.க., காங்., கூட்டணி சார்பில், ராஜசேகரன் (காங்.,) போட்டியிட்டார். இது தவிர தி.மு.க., காங்., கட்சியினரை இவர் சரிவர மதிக்கவில்லை என்ற ஆதங்கம் கட்சியினரிடம் நிலவியது. இதற்கு காரணம் சுயேச்சையாக நின்றபோதே அதிக ஓட்டுக்களை பெற்றதால் வெற்றி உறுதி என்ற வீராப்புடன் இருந்தார். தங்களை மதிக்கவில்லை என்ற ஆதங்கம் தி.மு.க.,- காங்.,கட்சியினரிடையே நிலவியது.

தொடர் இழுபறி: நேற்று நடந்த ஓட்டு எண்ணிக்கையில் 5-வது சுற்று வரை இந்திய கம்யூ., வேட்பாளர் நூற்றுக்கணக்கான ஓட்டுக்கள் வித்தியாசத்தில் முன்னணியில் இருந்தார். 7வது சுற்றான சிவகங்கை நகர், சுற்றுப்புற கிராம ஓட்டுக்களை எண்ணியபோது, குணசேகரனை பின்னுக்கு தள்ளி, காங்.,வேட்பாளர் ராஜசேகரன் முன்னுக்கு வரத்துவங்கினார். 12வது சுற்று வரை இந்த நிலை நீடித்தது. 13வது சுற்றில் இருந்து, இந்திய கம்யூ.,வேட்பாளர் குணசேகரன் முன்னுக்கு வரத் துவங்கி, இறுதியில், 4382 ஓட்டு வித்தியாசத்தில் வென்றார்.

தினமலர்