ஜகன்மோகன் ரெட்டி 5 லட்சம் வாக்குகள் வித்தியாசத்தில் வெற்றி

**சிவா** · **சிவா** Fri May 13, 2011 6:57 pm

ஹைதராபாத், மே.13: கடப்பா மக்களவை தொகுதிக்கு நடைபெற்ற இடைத்தேர்தலில் ஒய்எஸ்ஆர் காங்கிரஸ் கட்சித் தலைவர் ஜகன்மோகன் ரெட்டி 5 லட்சத்து 43 ஆயிரத்து 53 வாக்குகள் வித்தியாசத்தில் வெற்றிபெற்று சாதனை படைத்துள்ளார்.

ஜகன்மோகன் ரெட்டிக்கு இந்த தேர்தலில் 687,068 வாக்குகள் கிடைத்தன. இவரை எதிர்த்துப் போட்டியிட்ட காங்கிரஸ் கட்சியைச் சேர்ந்த ஆந்திர சுகாதார அமைச்சர் ரவீந்திர ரெட்டி 144,015 வாக்குகள் பெற்று தோல்வி அடைந்தார். தெலுங்குதேச கட்சி சார்பில் போட்டியிட்ட மைசூரா ரெட்டி 127,183 வாக்குகள் பெற்றார்.

இதுவரை கடப்பா தொகுதியில் அதிகபட்ச வாக்கு வித்தியாசம் ராஜசேகர ரெட்டி முதல்வராக இருந்தபோது 1991-ல் 418,000 ஆக இருந்தது.

1989-ம் ஆண்டில் இருந்து கடப்பா தொகுதியில் ஒய்எஸ்ஆர் குடும்பத்தைச் சேர்ந்தவர்களே வெற்றிபெற்று வருகின்றனர்.

முன்னதாக இந்த தொகுதியில் மொத்தம் உள்ள 13.29 லட்சம் வாக்காளர்களில் 10.28 லட்சம் வாக்காளர்கள் மே 8-ம் தேதி நடைபெற்ற இடைத்தேர்தலில் வாக்களித்தனர்.