நாடு முழுவதும் எண்டோசல்பானுக்கு தடை - சுப்ரீம் கோர்ட்டு உத்தரவு

நாடு முழுவதும் எண்டோசல்பான் பூச்சிக்கொல்லி மருந்துக்கு 8 வாரங்களுக்கு தடை விதித்து சுப்ரீம் கோர்ட்டு உத்தரவிட்டுள்ளது.

மார்க்சிஸ்ட் வழக்கு

மார்க்சிஸ்ட் கம்யூனிஸ்டு கட்சியின் இளைஞர் அமைப்பான இந்திய ஜனநாயக இளைஞர் பேரவை சார்பில் சுப்ரீம் கோர்ட்டில் தாக்கல் செய்யப்பட்டுள்ள மனுவில் கூறப்பட்டு இருப்பதாவது:-

எண்டோசல்பான் பூச்சிக்கொல்லி மருந்து 81 நாடுகளில் தடை செய்யப்பட்டுள்ளது. இந்த மருந்தை பயன்படுத்துவதால், பெரும்பாலான மக்களுக்கு நேரடி பாதிப்பு ஏற்படுகிறது. சுகாதார கோளாறு ஏற்படுகிறது. மேலும், சுற்றுச்சூழலுக்கும் பாதிப்பு ஏற்படுத்துகிறது.

ஆகவே, எண்டோசல்பான் பூச்சிக்கொல்லி மருந்து உற்பத்திக்கும், அதன் விற்பனைக்கும் நாடு முழுவதும் தடைவிதிக்க வேண்டும்.

இவ்வாறு அதில் கூறப்பட்டுள்ளது.

தடை

இந்த மனு, தலைமை நீதிபதி எஸ்.எச்.கபாடியா தலைமையிலான பெஞ்ச் முன்பு விசாரணைக்கு வந்தது. எண்டோசல்பானுக்கு 8 வாரங்களுக்கு தடை விதித்து நீதிபதிகள் உத்தரவிட்டனர். நீதிபதிகள் தங்கள் உத்தரவில் கூறி இருப்பதாவது:-

மற்ற விஷயங்களை விட, மனித உயிரே மேலானது. ஆகவே, எண்டோசல்பான் உற்பத்திக்கும், விற்பனைக்கும், அதை பயன்படுத்துவதற்கும் 8 வாரங்களுக்கு தடை விதிக்கப்படுகிறது. நாடு முழுவதும் இந்த இடைக்கால உத்தரவு உடனடியாக அமலுக்கு வருகிறது. அரசியல் சட்டத்தின் 21-வது பிரிவின்கீழ், இந்த கோர்ட்டு பிறப்பித்த பல்வேறு தீர்ப்புகள் அடிப்படையிலும், முன்எச்சரிக்கை அடிப்படையிலும் இந்த உத்தரவு பிறப்பிக்கப்படுகிறது.

ஆகவே, மறுஉத்தரவு பிறப்பிக்கும்வரை, எண்டோசல்பான் பூச்சிக்கொல்லி மருந்து தயாரிப்பாளர்களுக்கு வழங்கப்பட்ட உரிமங்களை அதிகாரிகள் உடனடியாக முடக்க வேண்டும்.

2 நிபுணர் குழுக்கள்

எண்டோசல்பான் மருந்து, மனித உயிருக்கும், சுற்றுச்சூழலுக்கும் ஏற்படுத்தும் பாதிப்பு குறித்து இரண்டு வெவ்வேறு நிபுணர் குழுக்கள் ஆய்வு செய்ய வேண்டும். அந்த அறிக்கைகளை ஒன்றாக இணைத்து, 8 வாரங்களுக்குள் கோர்ட்டில் சமர்ப்பிக்க வேண்டும்.

எண்டோசல்பான் மருந்தை தடை செய்ய வேண்டுமா? இருப்பு வைக்கப்பட்ட மருந்து, படிப்படியாக அழிக்கப்பட வேண்டுமா? சர்ச்சைக்குரிய எண்டோசல்பான் மருந்துக்கு மாற்று ஏதாவது உண்டா? என்பது பற்றி நிபுணர் குழுக்கள் தங்களது அறிக்கைகளில் தெரிவிக்க வேண்டும்.

இவ்வாறு நீதிபதிகள் கூறினர்.