முத்தரப்பு தொடர் இன்று ஆரம்பம் : முதல் சவாலில் இலங்கை-நியூசி.,

முத்தரப்பு ஒரு நாள் கிரிக்கெட் தொடர் இன்று இலங்கையில் துவங்குகிறது. இரண்டு மாத ஓய்வுக்குப் பின் கிரிக்கெட் அரங்கில் மீண்டும் சாதிக்க களமிறங்குகிறது இந்திய அணி. தொடரின் இன்றைய முதல் போட்டியில் இலங்கை அணி, நியூசிலாந்தை எதிர்கொள்கிறது.

இந்தியா, இலங்கை, நியூசிலாந்து அணிகள் பங்கேற்கும் முத்தரப்பு ஒரு நாள் கிரிக்கெட் தொடர் இலங்கையில் இன்று துவங்குகிறது. இன்று நடக்கும் முதல் போட்டியில், இலங்கை, நியூசிலாந்து அணிகள் பலப்பரீட்சை மேற்கொள்கின்றன. இத்தொடரின் பைனல் வரும் செப். 14 ம் தேதி கொழும்புவில் நடக்கிறது. இந்திய அணி, தனது முதல் போட்டியில் (வரும் செப். 11) நியூசிலாந்தை சந்திக்க உள்ளது.

சாதிக்குமா இந்தியா?: பொதுவாக இரு நாடுகளுக்கு இடையிலான தொடரில் அசத்தும் இந்திய அணி, பல அணிகள் கலந்து கொள்ளும் தொடரில் சொதப்பும். அதிலும் இலங்கை மண்ணில் பல அணிகள் பங்கேற்ற தொடர்களில் நமது இந்திய அணி, பெரிதாக சாதித்தது இல்லை. இங்கு கடைசியாக 1998 ம் ஆண்டு நடந்த முத்தரப்பு தொடரின் பைனலில் இலங்கையை வீழ்த்தி, சிங்கர் கோப்பையை வென்றது. அதன் பின் இலங்கையில் நடந்த, பல நாடுகள் மோதிய 5 ஒரு நாள் தொடர்களில் இந்தியா தோல்வியடைந்தது. கடந்த 2002 ம் ஆண்டு நடந்த சாம்பியன்ஸ் டிராபி தொடரில், மழை காரணமாக கோப்பையை இலங்கையுடன் இந்தியா பகிர்ந்து கொண்டது.

தோனி அசத்தல்: ஆனால் தற்போது தோனி தலைமையிலான இந்திய அணி ஒரு நாள் போட்டிகளில் வீழ்த்த முடியாத அணியாக திகழ்கிறது. கடந்த 2008 (இலங்கை, இங்கிலாந்து) மற்றும் 2009 ம்(இலங்கை, நியூசிலாந்து, வெஸ்ட் இண்டீஸ்) ஆண்டுகளில் தொடர்ந்து ஐந்து ஒரு நாள் தொடர்களை வென்றுள்ள தோனியின் அணி, இம்முறை சாதிக்கும் பட்சத்தில் 11 ஆண்டுகளுக்கு பின் இலங்கை மண்ணில், கோப்பை வென்று வரலாறு படைக்கலாம். அனுபவ வீரர்களான சச்சின், டிராவிட் அணிக்கு திரும்பியுள்ளது இந்திய அணிக்கு, இத்தொடரில் கோப்பை வெல்லும் வாய்ப்பை அதிகரித்து உள்ளது.

சொந்த மண் பலம்: சமீபத்தில் நியூசிலாந்துக்கு எதிரான டெஸ்ட் தொடரை வென்று அசத்திய இலங்கை அணி, முத்தரப்பு தொடரை வெல்ல காத்திருக்கிறது. சொந்த மண்ணில் ரசிகர்களின் பெரும் ஆதரவுடன் இந்தியா மற்றும் நியூசிலாந்தை எதிர்கொள்ள உள்ளது சங்ககரா தலைமையிலான இலங்கை அணி. ஜெயவர்தனா, ஜெயசூர்யா, தில்ஷன், சங்ககரா ஆகியோர் முன்னணி வீரர்களாக இத்தொடரில் அசத்த உள்ளனர்.

நியூசி., எழுச்சி: இலங்கை அணிக்கு எதிரான டெஸ்ட் தொடரை 0-2 என இழந்த நியூசிலாந்து அணி, "டுவென்டி-20' தொடரை 2-0 என வென்று பதிலடி கொடுத்தது. இன்று துவங்கும் முதல் போட்டியில் இலங்கை அணியை எதிர்கொள்கிறது நியூசிலாந்து.

இது குறித்து அணியின் முன்னணி வீரர் மெக்கலம் கூறுகையில்,"" இலங்கைக்கு எதிரான டெஸ்ட் தொடரில் கிடைத்த தோல்வியால் ஏமாற்றத்தில் இருந்த எங்களுக்கு "டுவென்டி-20' கோப்பை நம்பிக்கை அளித்துள்ளது. இந்தியா, இலங்கை போன்ற ஒருநாள் போட்டிகளில் சிறந்த அணிகளுக்கு எதிராக களமிறங்குகிறோம். எனினும் கடுமையான போராட்டத்தை வெளிப்படுத்தி, முத்தரப்பு தொடரிலும் சிறப்பாக செயல்படுவோம்,'' என்றார். வரும் செப்.22 ல் தென் ஆப்ரிக்காவில் துவங்க உள்ள சாம்பியன்ஸ் டிராபி (மினி உலக கோப்பை) தொடரில் சாதிக்க முத்தரப்பு தொடரின் வெற்றி பெரும் உதவியாக இருக்கும். இதனால் மூன்று அணிகளும் வெற்றிக்கு போராடும் என எதிர்பார்க்கலாம்.

இந்தியா ஆதிக்கம்: சர்வதேச கிரிக்கெட் அரங்கில் இந்தியா, இலங்கை அணிகள் இதுவரை 111 ஒருநாள் போட்டியில் விளையாடி உள்ளன. இதில் இந்திய அணி 59 போட்டியில் வெற்றி பெற்று, ஆதிக்கம் செலுத்தி வருகிறது. இலங்கை அணி 42 போட்டியில் மட்டுமே வென்றுள்ளது. 10 போட்டிகளுக்கு முடிவு கிடைக்கவில்லை.

* இந்தியா, நியூசிலாந்து அணிகள் இதுவரை 80 ஒருநாள் போட்டியில் மோதியுள்ளன. இதில் இந்திய அணி 39 போட்டியிலும், நியூசிலாந்து அணி 36 போட்டியிலும் வெற்றி பெற்றுள்ளன.

அணிகள்

இந்தியா: தோனி (கேப்டன்), காம்பிர், சச்சின், டிராவிட், யுவராஜ், ரெய்னா, யூசுப் பதான், தினேஷ் கார்த்திக், ஹர்பஜன், அமித் மிஸ்ரா, அபிஷேக் நாயர், பிரவீண் குமார், இஷாந்த் சர்மா, நெஹ்ரா மற்றும் ஆர்.பி.சிங்.

இலங்கை: சங்ககரா (கேப்டன்), ஜெயசூர்யா, ஜெயவர்தனா, தில்ஷன், கபுகேதரா, குலசேகரா, லோகுராக்சி, லசித் மலிங்கா, மாத் திவ்ஸ், மெண்டிஸ், முரளிதரன், ரூபசிங்கே, துஷாரா, உதானா மற்றும் உதாவட்டே.

நியூசிலாந்து: வெட்டோரி (கேப்டன்), பிரண்டன் மெக்கலம், கப்டில், ரைடர், ரோஸ் டெய்லர், ஷேன் பாண்ட், நெயில் புரூம், பட்லர், இலியோட், ஹாப்கின்ஸ், நாதன் மெக்கலம், மில்ஸ், ஓரம் மற்றும் ஜீடன் படேல்.

Wish u all the BEST INDIA return with Trophy.