ஆந்திராவில் தெலுங்கு தேசம் எம்.எல்.ஏ. மீது சாணம் வீசி ஓட, ஓட விரட்டியடித்த பெண்கள்

ஆதிவாசிகளின் நிலத்தை குத்தகைக்கு விட்டதால் ஆத்திரம் அடைந்த ஆதிவாசி பெண்கள் தெலுங்கு தேசம் எம்.எல்.ஏ.வை சாணம் வீசி, ஓட ஓட விரட்டி அடித்தனர்.

இந்த பரபரப்பான சம்பவம் பற்றிய விவரம் வருமாறு:-

பாக்சைட் வெட்டி எடுக்க எதிர்ப்பு

ஆந்திரா மாநிலம், விசாகப்பட்டினம் மாவட்டம், அரக்குலோயா என்ற ஊரில் ஆதிவாசிகள் அதிக அளவில் வசித்து வருகிறார்கள். அங்கு மான்யம் காடுகள் என்ற பகுதி உள்ளது.

இந்த காட்டுப்பகுதியில் `பாக்சைட் கனிமம்', பீங்கான் பொருள்கள் தயாரிக்கப்பயன்படும் `சைனா கிளே' என்ற விலை உயர்ந்த களிமண் நிறைந்து உள்ளன. இங்கு பாக்சைட் கனிமம் வெட்டி எடுக்க அந்த கிராம ஆதிவாசிகள் கடும் எதிர்ப்பு தெரிவித்து போராடி வருகிறார்கள்.

குத்தகைக்கு எதிர்ப்பு

இந்த நிலையில், 15.613 ஹெக்டேர் நிலத்தில் உள்ள 60 லட்சம் டன் சைனா கிளே கனிமத்தை, வருடத்துக்கு 15 ஆயிரம் டன் களிமண் வீதம் வெட்டி எடுக்க அரசு குத்தகைக்கு விட்டது. அந்த தொகுதியின் தெலுங்கு தேசம் எம்.எல்.ஏ. விவேரி சோமா தனது பினாமி ஆட்கள் பெயரில் இதை குத்தகைக்கு எடுத்ததாக கூறப்படுகிறது.

நேற்று அங்கு முதன் முதலாக சைனா கிளே களிமண்ணை வெட்டி எடுக்க ஆட்கள் சென்றனர். இதை அறிந்த ஆதிவாசிகள், குறிப்பாக பெண்கள் துடைப்பம், முறம், கட்டைகள் போன்றவற்றுடன் அதிக அளவில் அங்கு திரண்டனர். அங்கு களிமண் வெட்டி எடுக்கக்கூடாது என்று எதிர்ப்பு தெரிவித்து போராட்டம் நடத்தினார்கள்.

எம்.எல்.ஏ. மீது தாக்குதல்

இதை அறிந்த எம்.எல்.ஏ. விவேரி சோமா, அந்த பகுதியின் மண்டல தலைவர் தன்னேராவ் ஆகியோர் அங்கு சென்றனர். இருவரும் அந்த பழங்குடி மக்களிடம் சமாதான பேச்சு வார்த்தை நடத்தினார்கள். ஆனால், ஆதிவாசிகள் அவர்களின் சமாதானத்தை ஏற்காமல் திடீரென்று அவர்கள் இருவரையும் தாக்கத்தொடங்கினார்கள். அவர்கள் மீது சாணத்தை அள்ளி வீசினார்கள்.

எதிர்ப்பு பலமாக இருந்ததால் எம்.எல்.ஏ. தலை தெறிக்க ஓடி, காரில் ஏறி தப்ப முயன்றார். அப்போது அவர் வந்த காரை ஆதிவாசிகள் அடித்து நொறுக்கினார்கள். ஆனால், மண்டல தலைவர் தன்னேராவ் கிராம மக்களிடம் சிக்கி கொண்டார். அவரை அடித்து, உதைத்து கிராமவாசிகள் விரட்டி விட்டனர். தப்பித்தால் போதும் என்று அவர் ஓடி உயிர் பிழைத்தார்.

இந்த சம்பவம் ஆந்திராவில் பெரும் பரபரப்பை ஏற்படுத்தி உள்ளது.

தினதந்தி!

நல்லா வேணும் அந்த எம் எல் ஏ க்கு.....

சிறந்த பாடம் அனைவருக்கும்.......
நன்றிகள் சிவா பகிர்ந்தமைக்கு.....

நம்ப ஊரு ச.ம.உ தொகுதி பக்கமே வர மாட்டாரு இவ்வரு தானா போயி வீனா மாட்டிக்கிட்டாரு பாவம்