ஆட்சி அமைப்பது யார்? முடிவு விவரம் மதியம் தெரிந்துவிடும்

தமிழக சட்டசபை தேர்தலில் பதிவான வாக்குகள் இன்று (வெள்ளிக்கிழமை) எண்ணப்படுகின்றன. எனவே, ஆட்சியை பிடிப்பது யார்? என்பது இன்று மதியம் தெரிந்து விடும்.


234 உறுப்பினர்களை கொண்ட தமிழக சட்டசபைக்கு கடந்த ஏப்ரல் 13-ந் தேதி ஒரே கட்டமாக தேர்தல் நடந்தது. இதுவரை இல்லாத அளவுக்கு 78.80 சதவீத வாக்குகள் பதிவாயின.

தி.மு.க. கூட்டணி

இந்த தேர்தலில், ஆளும் தி.மு.க. தலைமையில் ஒரு அணி, அ.தி.மு.க. தலைமையில் மற்றொரு அணி என இரு முக்கிய அணிகள் போட்டியிட்டன.

தி.மு.க. கூட்டணியில் தி.மு.க. 119 தொகுதிகளிலும், காங்கிரஸ் 63 தொகுதிகளிலும், பாட்டாளி மக்கள் கட்சி 30 தொகுதிகளிலும், விடுதலை சிறுத்தைகள் 10 தொகுதிகளிலும், கொங்கு நாடு முன்னேற்ற கழகம் 7 தொகுதிகளிலும் போட்டியிட்டன. இது தவிர இந்திய யூனியன் முஸ்லிம் லீக் 3 தொகுதிகளிலும், மூவேந்தர் முன்னேற்ற கழகம், பெருந்தலைவர் மக்கள் கட்சி ஆகியவை தலா ஒரு தொகுதியிலும் போட்டியிட்டன.

அ.தி.மு.க. கூட்டணி

அ.தி.மு.க. தலைமையிலான கூட்டணியில் அ.தி.மு.க. 160 தொகுதிகளிலும், தே.மு.தி.க. 41 தொகுதிகளிலும், மார்க்சிஸ்ட் கம்யூனிஸ்டு 12 தொகுதிகளிலும், இந்திய கம்யூனிஸ்டு 10 தொகுதிகளிலும், மனிதநேய மக்கள் கட்சி -3, புதிய தமிழகம்-2, ச.ம.க -2 தொகுதிகளிலும் போட்டியிட்டன. இதுதவிர மூவேந்தர் முன்னணி கழகம், கொங்கு இளைஞர் பேரவை, இந்திய குடியரசு கட்சி, பார்வர்டு பிளாக் ஆகியவை தலா ஒரு தொகுதியில் போட்டியிட்டன.

இதுதவிர பாரதீய ஜனதா தலைமையிலான ஒரு அணியில் பாரதீய ஜனதா 193 தொகுதிகளிலும், ஜனதா கட்சி 10 தொகுதிகளிலும், ஐக்கிய ஜனதாதளம் 5 தொகுதிகளிலும் போட்டியிட்டன. மேலும் இந்திய ஜனநாயக கட்சி 142 தொகுதிகளிலும், புரட்சி பாரதம் 25 தொகுதிகளிலும், பகுஜன் சமாஜ் கட்சி 230 தொகுதிகளிலும் வேட்பாளர்களை நிறுத்தின.

இன்று ஓட்டு எண்ணிக்கை

வாக்குப்பதிவு முடிந்து ஒரு மாதத்துக்கு பிறகு இன்று (வெள்ளிக்கிழமை) ஓட்டு எண்ணிக்கை நடைபெறுகிறது. தமிழ்நாடு முழுவதும் 91 மையங்களில் வாக்குகள் எண்ணப்படுகின்றன. ஓட்டு எண்ணும் பணியில் 16,966 பணியாளர்கள் ஈடுபடுகிறார்கள்.

வாக்கு எண்ணிக்கை நடைபெறும் மையங்களில் 3 அடுக்கு பாதுகாப்பு போடப்பட்டு உள்ளது. பாதுகாப்பு பணியில் மாநில போலீசாருடன் 45 கம்பெனி துணை ராணுவ படையினரும் ஈடுபடுத்தப்படுகிறார்கள்.

குலுக்கல் முறையில் தேர்வு

ஓட்டு எண்ணும் பணியில் ஈடுபடும் ஊழியர்களில், எந்த வேலையை யார் செய்வது? என்பது குலுக்கல் முறையில் தேர்ந்தெடுக்கப்பட உள்ளது. தேர்தல் அதிகாரி, கண்காணிப்பாளர் முன்னிலையில் இன்று காலை 5 மணிக்கு இந்த தேர்வு பணி நடைபெறுகிறது.

தேர்தல் ஏஜெண்டுகள் காலை 6 மணிக்குள் ஓட்டு எண்ணும் மையத்திற்கு வந்துவிட வேண்டும். அனைவரும் அடையாள அட்டை கட்டாயம் வைத்திருக்க வேண்டும். அதன்பிறகு, ஓட்டு எந்திரங்கள் வைக்கப்பட்டுள்ள அறை கதவின் சீல், அனைவரது முன்னிலையிலும் உடைக்கப்படும்.

அதன்பின்னர், தொகுதிவாரியாக வைக்கப்பட்டுள்ள ஓட்டு எந்திரங்கள், அதற்காக ஒதுக்கப்பட்டுள்ள அரங்குகளுக்கு கொண்டு செல்லப்படும். ஒவ்வொரு தொகுதி ஓட்டு எண்ணும் இடத்திலும் 14 மேஜைகள் போடப்பட்டுள்ளன.

4 மணிக்குள் முடிவு தெரிந்து விடும்

காலை 8 மணிக்கு, முதலில் தபால் ஓட்டுகள் எண்ணப்படும். காலை 8.30 மணி முதல் எந்திரங்களில் பதிவான ஓட்டுகளை எண்ணும் பணி தொடங்கும். ஒவ்வொரு சுற்றுவாரியாக ஓட்டு எண்ணிக்கை முடிவு அறிவிப்பு பலகையில் ஒட்டப்படும். அதன்பிறகு, ஓட்டு எண்ணிக்கை முடிவுகள், ஒவ்வொரு சுற்று வாரியாக தேர்தல் பார்வையாளர் முன்னிலையில் கம்ப்யூட்டரில் பதிவு செய்யப்படும். ஓட்டு எண்ணிக்கை மையத்தில் நடைபெறும் அனைத்து நடவடிக்கைகளும் வீடியோவில் பதிவு செய்யப்படும்.

காலை 8.30 மணி முதல் முன்னணி நிலவரங்கள் தெரிய வரும். மாலை 4 மணிக்குள் ஓட்டு எண்ணிக்கை முடிந்து, அனைத்து தொகுதிகளின் முடிவுகளும் வெளியாகிவிடும் என எதிர்பார்க்கப்படுகிறது.

ஆட்சியை பிடிப்பது யார்?

எனவே தமிழ்நாட்டில் மீண்டும் தி.மு.க. ஆட்சியை பிடிக் குமா? அல்லது அ.தி.மு.க. ஆட்சியை கைப்பற்றுமா? அல்லது முதன் முறையாக கூட்டணி ஆட்சி ஏற்படுமா? என்பது இன்று தெரிந்து விடும்.

தமிழக சட்டசபை தேர்தலுடன் புதுச்சேரி, கேரளா, மேற்கு வங்காளம், அசாம் ஆகிய மாநிலங்களிலும் சட்டசபை தேர்தல் நடைபெற்றது. அந்த மாநிலங்களிலும் இன்று வாக்கு எண்ணிக்கை நடைபெறுகிறது.

தினதந்தி