நல்ல ஆட்சிக்கு ஊழல் அறவே கூடாது

கரூர் மாவட்டத்தில் ஊழல் எதிர்ப்பு இயக்கம் தொடக்க விழா நடைபெற்றது. கரூர் கோவை ரோட்டில் உள்ள கொங்கு கல்யாண மண்டபத்தில் நடைபெற்ற இந்த விழாவிற்கு ஊழல் எதிர்ப்பு இயக்க கரூர் மாவட்ட அமைப்பாளர் வெள்ளியங்கிரி வரவேற்றுப்பேசினார்.

சேலம் மாவட்ட ஐந்தாவது தூண் அமைப்பாளர் பொன் ராசமாணிக்கம், ஊழல் எதிர்ப்பு இயக்க கோவை மாவட்ட செயலாளர் வேலு, முன்னாள் போலீஸ் சூப்பிரண்டு மாணிக்கம், ஊழல் எதிர்ப்பு இயக்க கோவை மாநகர கிளை தலைவர் கோபாலன் ஆகியோர் முன்னிலை வகித்தனர்.

சிறப்பு விருந்தினராக முன்னாள் தமிழக தலைமை தேர்தல் அதிகாரி நரேஷ் குப்தா கலந்து கொண்டு ஊழல் எதிர்ப்பு இயக்கத்தை தொடங்கி வைத்து பேசினார். அப்போது அவர் கூறியதாவது:-

லோக்பால் சட்ட முன்வடிவு அண்ணஹசாரே உண்ணாவிரதத்திற்கு பிறகு வேகம் அடைந்து உள்ளது.ஊழல் நாட்டிற்கும், உலகிற்கும் புதிதல்ல. துரதிருஷ்டவசமாக ஏழை மக்கள் தான் ஊழலில் அதிகம் பாதிப்படைகிறார்கள். அமெரிக்கா போன்ற நாடுகளிலும் ஊழல் பாதித்து உள்ளது. மக்கள் சாசனம் இருக்க வேண்டும் நல்ல ஆட்சிக்கு ஊழல் அறவே இருக்க கூடாது.

நல்ல ஆட்சிக்கு வெளிப்படை தன்மை தான் இருக்க வேண்டும். இதற்கு ஒரே வழி ஒவ்வொரு துறையிலும் மக்கள் சாசனம் இருக்க வேண்டும். ஊழலுக்கு எல்லையே கிடையாது. ஆனால் அதிகம் பாதிப்பது ஏழை நாடுகள் தான். ஊழலும், ஏழ்மையும் கைகோர்த்து நடக்கும். மக்களுக்கு அதிகப்படியான தேவை ஏற்படும் போது பல சமயங்களில் ஊழலுக்கு வழி வகுக்கிறது.

மேலும் சில சட்ட, திட்டங்களும் அதிகாரிகளின் ஊழலுக்கு வழி வகுக்கிறது. ஊழலை எதிர்ப்பதற்கு கல்வி நிலையத்திலேயே விதை விதைக்க வேண்டும். மக்களிடம் ஊழல் எதிர்ப்பு குறித்த விழிப்புணர்வு அதிகம் ஏற்பட்டு உள்ளது. பணம் வாங்குவதையும், கொடுப்பதையும் தவிர்க்க வேண்டும். மக்கள் நல்ல ஆட்சிக்கு ஆதரவு தருகிறார்கள்.

பீகாரில் நல்ல ஆட்சிக்கு தான் வளர்ச்சி கிடைத்து உள்ளது. இவ்வாறு அவர் கூறினார். முடிவில் கரூர் மாவட்ட அமைப்பாளர் சந்திரசேகரன் நன்றி கூறினார். முன்னாள் தமிழக தலைமை தேர்தல் அதிகாரி நரேஷ் குப்தா கலந்து கொண்டு ஊழல் எதிர்ப்பு இயக்கத்தை தொடங்கி வைத்து பேசினார்-நன்றி மாலை மலர்