திருச்சூர் பூரம்: இன்று கோலாகலம்

**krishnaamma** · **krishnaamma** Thu May 12, 2011 12:22 pm

திருச்சூர்: கேரளாவில் பிரசித்தி பெற்ற திருச்சூர் பூரம், இன்று கோலாகலமாக கொண்டாடப்பட உள்ளது. அதற்கான ஏற்பாடுகள் அனைத்தும் நிறைவடைந்து விட்டன.
இன்று காலை 7 மணிக்கு திருவம்பாடி கோவிலில் இருந்து சுவாமி புறப்பாடு நடைபெறும். அலங்கரிக்கப்பட்ட யானை மீது அம்மன் (பகவதி) உற்ஸவ மூர்த்தி, அம்பாடி கண்ணன் கோலத்தில் எழுந்தருளி மடத்திற்கு புறப்பட்டு செல்வார். மூன்று யானைகள் அணிவகுக்க சுவாமி புறப்பாடு நடக்கும். மடத்திற்கு சென்று விட்டு மறுபடியும் 11.30 மணிக்கு வடக்கு நாதர் கோவிலுக்கு செல்வார். அதற்குள் செம்புக்காவு, காரமுக்கு, சூரக்கோட்டுக்காவு, அய்யந்தோள், நெய்திடக்காவு ஆகிய கோவில்களில் இருந்தும் அம்மன்கள்,
அலங்கரிக்கப்பட்ட யானைகள் மீது எழுந்தருளி மைதானத்திற்கு வந்து சேருவர். திருவம்பாடி பகவதி புறப்பாடு பழைய நடக்காவு வழியாக மூன்று யானைகள் எண்ணிக்
கையுடன் செல்லும்போது, பிரதட்சண வழியில் பிற யானைகளும் சேர்ந்து யானைகளின் எண்ணிக்கை ஏழாக உயரும். இந்நிலையில், பாரமேக்காவு பகவதி கோவிலில்
இருந்து அலங்கரிக்கப்பட்ட 15 யானைகள் அணிவகுக்க, சுவாமி புறப்பட்டு கிழக்கு கோபுர வாசல் வழியாக வடக்குநாதர் கோவிலுக்குச் செல்லும். மைதானத்தில் தெற்கு திசை நோக்கி பாரமேக்காவு பகவதி, அலங்கரிக்கப்பட்ட 15 யானைகளுடன் அணிவகுத்து நிற்பார். அதேபோல், வடக்கு திசை நோக்கி திருவம்பாடி பகவதி, அலங்கரிக்கப்பட்ட 15
யானைகளுடன் அணிவகுத்து நிற்பார். அப்போது செண்டை மேளங்கள், வாத்தியங்கள் முழங்க பக்தர்கள் உணர்ச்சிபூர்வமாக காட்சி அளிப்பர். அதன் பிறகு தான், குடை பரிமாற்ற நிகழ்ச்சி துவங்கும். இருபுறமும் அணிவகுத்து நிற்கும் யானைகள், மேள தாளங்கள் முழங்குவதற்கேற்ப வண்ண நிறங்களில் குடைகள் மாற்றும் நிகழ்ச்சி கண்கொள்ளா காட்சியாக இருக்கும். இவ்வாறு ஒரு மணி நேரம் நடைபெறும் இந்நிகழ்ச்சியில், 30 யானைகளின் மீதிருப்போர், 35 வண்ண குடைகளை மாற்றிக் கொண்டே இருப்பர். சுவாமி எழுந்தருளும் நிகழ்ச்சி அதிகாலை 2.30 மணிக்கு நிறைவுறும். அதன் பிறகு, இதுவரை தரையில் நடந்து வந்த பூரம் நிகழ்ச்சி, தொடர்ந்து வானில் பிரகா
சிக்கும். வானில் வாணவேடிக்கை நிகழ்ச்சிகளும், காதை பிளக்கும் பட்டாசு வெடிகளும் பார்வையாளர்களை வெகுவாக கவரும். இந்நிகழ்ச்சி அதிகாலை 6.30 மணி
வரை தொடர்ந்து நடக்கும். தொடர்ந்து விடைபெறும் நிகழ்ச்சி நடைபெறும்.