பட்டாம்பூச்சிக் கவிதைகள்; பட்டாம்பூச்சிக்கு சமர்ப்பணம்

by வித்யாசாகர் Tue Sep 08, 2009 5:07 am

வித்யாசாகர் அவர்களே..எனக்கு பட்டாம் பூச்சி பற்றிய கவிதை கிடைக்குமா ?

அன்புடன் மீனு

உன்னிடம் பேசுகையில்

ஆயிரம்
பட்டாம் பூச்சிகள்
பறக்கின்றன;
ஒன்றை கூட
பிடிக்க
முடியவில்லை,

எல்லாம் -
மனதிற்குள் மட்டும்!
--------------------------
வித்யாசாகர்

by வித்யாசாகர் Tue Sep 08, 2009 5:09 am

ஒருவேளை

பட்டாம்பூச்சியை
நான் -
பிடிப்பதேயில்லை;

'ஐயோ மனிதனென்று
பட்டாம்பூச்சி
பயந்து விட்டால்!
---------------------------
வித்யாசாகர்

by வித்யாசாகர் Tue Sep 08, 2009 5:11 am

ஒரு ஆண்

வயிற்றில்
பட்டாம்பூச்சி
பறக்குமாமே;

எனக்கும்
கர்ப்பம் தரிக்க
ஆசை!
-----------------
வித்யாசாகர்

by வித்யாசாகர் Tue Sep 08, 2009 5:13 am

கனவு

என் -
ஆயிரமாயிரம்
வர்ணக் கனவுகள்
பட்டாம் பூச்சியாகவே
பறக்கின்றன;

எங்கோ -
எட்டா தூரத்தில்!
------------------------
வித்யாசாகர்

by வித்யாசாகர் Tue Sep 08, 2009 5:14 am

நம்பிக்கை

வாழ்கையில்
ஜெயிப்பதற்கு
ஒரு வழி சொல்லேனென்றேன்
பட்டாம்பூச்சியிடம்,

பட்டாம்பூச்சி சொன்னது
'பறந்துக் கொண்டே இரு
எங்கோ ஒரு மூலையில்
உனக்கான ஓரிடம்
நிச்சயம் காத்திருக்குமென்று'

நானும் -
பறந்துக் கொண்டேயிருக்கிறேன்
எனக்கான இடமின்னும் -
வரவே இல்லையே யென
நினைக்கையில் -

உலகம் பேசிக் கொண்டது -
'அதிக தூரம்
பறந்து சாதித்தவன்
உலகிலேயே
நான் தானாம்!'
-------------------------------
வித்யாசாகர்

by வித்யாசாகர் Tue Sep 08, 2009 5:15 am

நியாயம்

அதோ ஒரு பட்டாம்பூச்சி
பறக்கிறது..

பட்டாம்பூச்சியிடம் கேட்டேன்
'எனக்கு ஒரே ஒரு
இறக்கையை
குடேன்..

பட்டாம்பூச்சி சொன்னது -

'நானுனக்கு என்
இறக்கைகளை
தருகிறேன்;

நீ யெனக்கு
உன் கைகளை
தருவாயா???
------------------------
வித்யாசாகர்

by வித்யாசாகர் Tue Sep 08, 2009 5:16 am

ஈழத்து வெளிக்குள்ளே;

ஈழத்து
முட்கம்பிகளுக்கு வெளியே
ஒரு பட்டாம்பூச்சி
பறந்து போனது..,

ஒரு குழந்தை
என்னிடம் வந்து -

அந்த பட்டாம்பூச்சியை
பிடித்துத் தரச் சொல்லிக்
கேட்டது;

அந்த பட்டாம்பூச்சிக்கு
இருக்கும் சுதந்திரம்
எனக்கில்லை யென

அந்தக் குழந்தியிட மென்னால்
சொல்லமுடிய வில்லை!
---------------------------------------
வித்யாசாகர்

by வித்யாசாகர் Tue Sep 08, 2009 5:19 am

பாவம்

ஏழு வண்ணம்
தானென்கிறார்கள்;

உனக்கு மட்டுமெப்படி
இத்தனை
வண்ணமென்றேன் ஒரு
பட்டாம்பூச்சியிடம்;

உடனே
'அணைகின்ற தீபம்
சுடர்விட்டு
எரியுமென்றது
பட்டாம்பூச்சி!
---------------------
வித்யாசாகர்

by வித்யாசாகர் Tue Sep 08, 2009 5:20 am

காதல்

உனக்கொரு
பட்டாம்பூச்சியை
பிடித்துத் தருகிறேன்;

நீ -
எனக்கொரு
பட்டாம்பூச்சியை
பிடித்துக் கோடு;

இரண்டிற்கும்
சம்மதமென்றால்

நாமும் காதலிக்கலாம்!
----------------------------------

வித்யாசாகர்

by வித்யாசாகர் Tue Sep 08, 2009 5:21 am

மனிதன் தொலைத்த மனிதம்

வெகுநேரமாய்
பார்க்கிறேன் -
ஒரு பட்டாம்பூச்சி
இங்குமங்குமாய்
சுற்றியது;

எதையோ தேடுவதாய்
நினைத்துக் கொண்டே
பட்டாம்பூச்சியை
பார்த்தேன்;

என்ன பார்க்கிறாய்
என்றது பட்டாம்பூச்சி,

ஒன்றுமில்லை - நீ
எதையோ
தெடுகிறாயே என்றேன்,

உனக்காகத் தான்
தேடுகிறேன், எங்கேனும்
நீ தொலைத்த மனிதம்
கிடைத்தால் -
கொண்டு சென்று

இலங்கையில்
கொடுப்பேனென்றது!
----------------------------
வித்யாசாகர்