என்று மாறும் தமிழகத்தின் இந்த அவலநிலை?

புதிய அரசைத் தேர்ந்தெடுப்பதற்கான தமிழக சட்டமன்றத் தேர்தல் வாக்குப் பதிவு நாளை நடைபெற உள்ளது. தமிழகத்தில் திமுக தலைமையில் ஒரு அணியும் அதிமுக தலைமையில் ஒரு அணியும் பாஜக தனித்தும் களத்தில் உள்ளன. அந்த அணி ஆட்சி அமைக்கும் இந்த அணி ஆட்சி அமைக்கும் என்று பல்வேறு கருத்துக் கணிப்புகளுக்கு இடையே எந்த அணிக்கும் அறுதி பெரும்பான்மை கிடைக்காது என்றும் ஒரு கருத்து நிலவுகிறது.


தமிழகத்தில் உள்ள அனைத்துக் கட்சிகளுமே தாங்கள் ஆட்சிக்கு வந்தால் அதைத் தருவோம் இதைத் தருவோம் என்று பல இலவசங்களை தங்கள் தேர்தல் அறிக்கையில் அள்ளித் தந்துள்ளன. "சர்வாதிகார மன்னராட்சிகளுக்கு எதிராக மக்கள் தெருவில் போராட்டத்தில் இறங்காமல் இருக்க, பல்வேறு இலவசங்களைச் சமீபத்தில் அள்ளி வீசிய சில அரபு நாடுகளைப் போன்று", இலவசங்களை மக்களுக்கு அள்ளித் தரும் அளவுக்குத் தமிழ்நாடு அரசின் நிதி நிலை இருக்கிறதா என்றால் நிச்சயமாக இல்லை. தமிழக அரசின் கடன் சுமை ரூ 1 லட்சம் கோடியைத் தாண்டி விட்டது. எந்தக் கட்சி ஆட்சிக்கு வந்தாலும் முதல்வர் நாற்காலியில் அமரும் தலைவர்கள் தங்கள் பரம்பரை சொத்தை விற்றோ அல்லது மோடி வித்தைகள் செய்தோ குறைந்த பட்சம் மக்களிடமிருந்து கொள்ளையடித்த ஊழல் பணத்தையாவது செலவழித்தோ இலவசத் திட்டங்களை நிறைவேற்றப் போவதில்லை.

மக்களிடமிருந்தே பல்வேறு வரிகளின் மூலம் எட்டணாவைப் பிடுங்கி, அதில் ஓரணாவை உலகமகா சாதனை பொன்று இலவசமாக பிச்சை ஏட்டில் தூக்கி வீசுவார்கள். தமிழகத் தேர்தல் முடிந்து புதிய அரசு பொறுப்பேற்ற உடன் சுனாமி வடிவில் வரவுள்ளன புதிய அரசின் கட்டண உயர்வு அறிவிப்புகள். பேருந்துக் கட்டண உயர்வு, மின்சாரக் கட்டண உயர்வு, தேர்தல் நேரத்தில் மக்களை ஏமாற்றுவதற்காக குறைக்கப் பட்ட டீசல் மீதான வரி மீண்டும் உயர்வு என பல்வேறு உயர்வுகளைத் தமிழக மக்கள் அடுத்தடுத்து சந்திக்க வேண்டி வரும்.

எந்த அரசியல் கட்சியும் தமிழக மக்களின் நலன் சார்ந்த திட்டங்களைத் தங்கள் தேர்தல் அறிக்கையில் அளிக்கவில்லை என்பது மிக மிக கவலைக்குரிய விஷயம். கோடி கோடியாக கொள்ளை அடிக்க வசதியாக மக்கள் வாக்களிக்க வேண்டுமே என்று மக்களுக்கு இலவசங்கள் என்ற போர்வையில் சின்ன எலும்புத் துண்டை தூக்கி வீசி வருகின்றன. நாமும் டி.வி , மிக்சி, கிரைண்டர், பேன் போன்ற இலவசங்களுக்கு ஆசைப் பட்டு விலை மதிப்பில்லா நம் ஓட்டை வீணடித்து வருகிறோம்.

தமிழகத்தின் சாபக் கேடோ என்னவோ? தமிழகத்தை மாறி மாறி ஆளும் இரு கட்சிகளுமே ஊழல் கட்சிகள் தான். ஜன் லோக்பால் மசோதாவை உருவாக்கக் கூடிய குழுவில் மக்கள் பிரதிநிதிகளும் இடம்பெற வேண்டும் என டெல்லியில் சமூக சேவகர் அண்ணா ஹசாரே சாகும் வரை உண்ணாவிரதம் இருந்தார். அகில உலகையே திரும்பிப் பார்க்க வைத்த அண்ணா ஹசாரே உண்ணாவிரதத்துக்கு ஆதரவு தெரிவிக்க தமிழகத்திலிருந்து எந்த அரசியல்கட்சியும் முன் வரவில்லை.

இந்தியா வல்லரசு ஆகிறதோ இல்லையோ இன்னும் சில காலங்களில் தமிழகம் வல்லரசாக ஆனாலும் ஆச்சரியப் படுவதற்கில்லை. காரணம் தமிழகத்தில் போட்டியிடும் வேட்பாளர்களின் சொத்து விபரங்களைக் கேட்டால் ஒரு கணம் தலை சுற்றி விடுகிறது. தமிழகச் சட்டசபைத் தேர்தலில் போட்டியிடும் வேட்பாளர்களில் 230 க்கும் மேற்பட்டவர்கள் கோடீஸ்வரர்கள். தமிழகத்தில் போட்டியிடும் இரு முதல்வர் வேட்பாளர்களும் கோடீஸ்வரர்கள். பெரும்பாலான அமைச்சர்களும், அமைச்சர்களின் மனைவிகளும், துணைவிகளும் கோடீஸ்வரர்கள். ஏதோ அப்பன், பாட்டன் சொத்தின் மூலமான பரம்பரை பணக்காரர்கள் இவர்கள் என்று ஒரு பாமரன்கூட தவறாக நினைத்து விடாமல் இருக்கும் அளவுக்கு அரசியல்வாதிகளின் ஊழல்கள் நாட்டில் சிறுபிள்ளைப் பாட்டு!

தமிழகத்தை ஆளும் முதல்வர் மற்றும் அமைச்சர்களின் சொத்து மதிப்பு நாளுக்கு நாள் ஏறுகிறது பல கோடிகளில். அடித் தட்டு தமிழக மக்களின் நிலையோ இருக்க ஒரு இடம் இல்லாமல் தெருக் கோடிகளில்!