திருமண நாளில் மணமகன் தற்கொலை வேறு மாப்பிள்ளையை கரம் பிடித்தார் மணமகள்

மீனு · மீனு Mon Sep 07, 2009 11:20 am

விருதுநகர் மாவட்ட ராஜபாளையத்தில் திருமண நாளில் மணமகன் தற்கொலை செய்துகொண்டதால் உடனடியாக வேறு மாப்பிள்ளை பார்த்து மணமகளுக்கு திருமணம் நடந்தது.

விருதுநகர் மாவட்டம் ராஜபாளையம் அருகே மேலவரகுணராமபுரம் கிராமத்தை சேர்ந்த சமுத்திரபாண்டி-இந்திரா தம்பதியின் மகள் சாந்தி(22). இவருக்கும் வேர்வைக்கனி(26)க்கும் நேற்று திருமணம் நடைபெறுவதாக இருந்தது.

நேற்று முன் தினம் இரவு திருமணம் நிச்சயிக்கப்பட்டது. இதை தொடர்ந்து மணமகனும், மணமகளும் சேர்ந்து பல மாடல்களில் புகைப்படம் எடுத்து கொண்டனர்.

பின்னர் ஜீவா நகரில் உள்ள தனது வீட்டுக்கு வந்த வேர்வைக்கனிக்கும், குடும்பத்தினருக்கும் தகராறு ஏற்பட்டதாக தெரிகிறது. நீண்டகாலமாக குடும்பத்தினருடன் பேசாமல் இருந்த தாய்மாமாவுக்கு வேர்வைக்கனி திருமண அழைப்பிதழ் கொடுத்துள்ளார். இது அவரது பெற்றோருக்கு பிடிக்கவில்லை. திருமணம் முடிந்த பிறகு ஒரு மாதம் தனது அக்கா வீட்டில் குடியிருக்க வேர்வைக்கனி அனுமதி கேட்டுள்ளார். இதற்கு அவருடைய அக்கா மறுத் துள்ளார்.

இதுபோன்ற பல பிரச்சனைகளால் மனம் உடைந்த நிலையில், தனது வீட்டுக்கு எதிர்புறம் உள்ள கவரிங் கடையில் வேர்வைக்கனி தூங்க சென்றார். 10 மணிக்கு திருமண முகூர்த்த நேரம் என்பதால் காலை 8 மணிக்கு கவரிங் கடை கதவை தட்டினார்கள். கதவு திறக்கப்படவில்லை. பின்னர் கதவை உடைத்து உள்ளே சென்று பார்த்தபோது மின்விசிறியில் வேர்வைக்கனி தூக்கில் தொங்கினார்.

இதுபற்றி பெண் வீட்டாருக்கு தகவல் தெரிவிக்கப்பட்டது. மணப்பெண் சாந்தி மனம் உடைந்து திருமண அலங்காரம் வேண்டாம் என்று கூறினார். இருப்பினும் உறவினர்கள் பலரும் ஆறுதல் கூறியதுடன், அடுத்தகட்ட நடவடிக்கையில் ஈடுபட்டனர். புத்தூர் மாரியம்மன் கோயிலில் திருமணம் செய்ய அனைத்து ஏற்பாடுகளும் நடந்தது.

புத்தூர் ஊராட்சி தலைவர் சித்திரைக்கனியின் சகோதரர் நல்லதம்பியின் மகன் கனிகுருவிற்கும்(25), சாந்திக்கும் திருமணம் பேசி முடிக்கப்பட்டு அதே முகூர்த்தத்தில் திருமணம் நடந்தது. திருமணத்துக்கு வந்த அனைவரும் மணமக்களை வாழ்த்தினர். இந்த சம்பவம் அப்பகுதியில் பரபரப்பை ஏற்படுத்தியது.