மனைவியின் வாழ்த்து

யாதுமானவள் · யாதுமானவள் Sun 1 May 2011 - 21:56

9 மணியாச்சு எழுந்திருங்க . கையில் காபியுடன் மனைவி.
இருடி ... இன்னும் ஒரு 5 நிமிஷம் தூங்கிக்கறேன் ...

சுடுதண்ணி பிடிசுவச்சாசுங்க... ஆறிப்போய்டும் சீக்கிரம் குளிச்சுட்டு வாங்க சூடா இட்டிலி வார்த்து வச்சிருக்கேன்

காலங்கார்தால இவ ஒருத்தி மனுஷன தூங்கக்கூட விடாம ... முணுமுணுத்துக்கொண்டே மனைவி கொடுத்த காபியை உறிஞ்சிவிட்டு குளியலறை நுழைந்தேன். பிரஷில் பேஸ்ட் எடுத்து தயாராக வைத்திருந்தாள் மனைவி.

பல்தேய்த்துக் குளித்துவிட்டு நேராக சாப்பாட்டு மேஜைக்குச் சென்றால் ஆவிபறக்க மல்லிகைப்பூ இட்டிலியும் கமகமக்கும் சாம்பாரும் ஒரு பிடி பிடிக்க வைத்தது என்னை.

எப்போதும் காலை சிற்றுண்டிக்குப் பின் இன்னொரு காபி குடிப்பதும் வழக்கம் .

காபிஎடுத்துட்டு வறேன் சீக்கிரம் போய் டிரஸ் பண்ணுங்க ஜரிகை வேட்டியும் போன வாரம் தைச்ச வெள்ளை சட்டையும் அயர்ன் பண்ணி அலமாரியின் கைப்பிடில -ஹாங்கர்ல மாட்டி வச்சிருக்கேன் பாருங்க ... மனைவி சொல்லிக்கொண்டிருக்கையிலே ..

ரூமுக்குள் நுழைந்து அவள் எடுத்து வைத்திருந்த சட்டையும் வேட்டியையும் மாற்றிக்கொண்டு நான் வெளியே வரவும் தர்ம பத்தினி ஆற்றி வைத்து மிதமான சூட்டில் இருந்த காபியைக் கொடுக்க அதையும் குடித்து விட்டு புறப்படுகிறேன்.

வாசல் கதவு திறந்துதான் இருக்கிறது .

கருப்பு , வெள்ளை, அடர்ந்த பிரவுன் ,மிதமான பிரவுன் நிறம் என எல்லாக் காலணிகளும் பாலிஷ்
போட்டு பளப்பளவென மின்னிக்கொண்டிருக்கிறது எனக்காக . நான் எந்த நிறக் காலணியை இட்டுச் செல்வேன் என என் மனைவியால் இன்றுவரை அனுமானிக்க முடியாது . காரணம் ... ஒருநாள் கறுப்பு நிற காலணி மட்டும் தயாராக இருந்தால் அன்று பிரவுன் காலணி எங்கே எனச் சத்தமிடுவேன் . பிரவுன் காலணி மட்டுமிருந்தால் கறுப்புநிற காலணிக்காகக் கூப்பாடு போடுவேன் .

எதற்கு வம்பென்று அத்தனை காலணிகளையும் அழகாகப் பளிச்சிட்டுக் கொண்டிருக்கிருக்குமாறு பார்த்துக்கொண்டிருக்கிறாள் இன்று . அதிலொன்றை மாட்டிக்கொண்டு வீட்டிலிருந்து இறங்க .... காத்திருந்த காரோட்டி கார் கதவைத் திறந்து விடுகிறான் . ஏறி அமர்ந்துகொண்டு மனைவியிடம் விடை பெறுகிறேன்.

மனைவி வேகமாகச் சொல்கிறாள் ...

நல்லா பேசனுங்க. இன்னைக்கு உங்க பேச்சு ரொம்ப சிறப்பா இருக்கணுங்க என வாழ்த்துகிறாள் ... "உழைப்பாளர் தினம் " பற்றி சிறப்புரையாற்றப் போய்க்கொண்டிருக்கிறேன் ஆளும் கட்சியின் எம்.எல்.ஏ வான நான்.

**Manik** · **Manik** Sun 1 May 2011 - 23:17

இவர் தனது மனைவியை பற்றி பேசினாலே போதும் மிக சிறப்பாக அமையும் அந்த விழா

சூப்பர் அக்கா அருமையான கதை அழகான நடை நல்லா எழுதியிருக்கீங்க மனைவியின் வாழ்த்து 677196