50 பைசாவுக்கு இட்லி!

First topic message reminder :

50 பைசாவுக்கு என்ன வாங்கலாம்? அதிகபட்சம் ஒரு சாக்லேட். "ஐம்பது பைசாவுக்கு இட்லி கிடைக்குமா?' என்றால் அடிக்க வருவீர்கள். அதிலும் ஸ்டார் ஹோட்டல்களில் இட்லி சாப்பிட்டால் சொத்தை எழுதி வைக்க வேண்டும். இப்படியான காலத்தில் ஒருவர் 50 பைசாவுக்கு இட்லி விற்கிறார் என்றால் நம்ப முடிகிறதா? விற்கும் விலைவாசிக்கு இதெல்லாம் சாத்தியமா என்ற கேள்விக்கு சாத்தியமே, என உற்சாகமாக பதிலளிக்கிறார் திருச்சியைச் சேர்ந்த கண்ணன்.

திருச்சி பாறையடித் தெருவைச் சேர்ந்தவர் இவர். அரசுத் துறையில் பணிபுரிந்து ஓய்வு பெற்றவர். அவர் மனைவி விஜயலட்சுமி.
தினமும் காலை 6 மணிக்கெல்லாம் வீட்டின் முன்பு இருக்கும் சிறிய இடத்தில் இட்லி கடையை திறந்துவிடுகின்றனர் கண்ணன் தம்பதியினர். காலையிலேயே வியாபாரம் களைகட்டுகிறது. முக்கியமாக பள்ளி செல்லும் குழந்தைகள் இட்லியை வாங்கிச் செல்கின்றனர்.

வாங்கும் இட்லிக்கு தேங்காய் சட்னி, தக்காளி சட்னி, சாம்பார் அல்லது குருமா கொடுத்து அசத்துகின்றனர் இத் தம்பதியினர்.
இது எப்படி சாத்தியம் என கேட்டபோது அவர்கள் கூறியது: ""நாங்கள் கடந்த 20 ஆண்டுகளாக இந்தத் தொழிலை செய்து வருகிறோம். அப்போது 25 பைசாவுக்கு ஒரு இட்லி என விற்றோம். கடந்த 9 வருடங்களுக்கு முன்பு ஒரு இட்லி 50 பைசா என விலையை ஏற்றினேன். இப்பொழுது விற்கும் விலைவாசிக்கு லாபமே கிடையாது. இதை ஒரு சேவையாகவே செய்து வருகிறேன்.
நாங்கள் வசதியானவர்கள் கிடையாது. எனது கணவரின் ஓய்வூதியத்தில்தான் இந்தக் கடைக்குத் தேவையான பொருள்களை வாங்கிக்கொள்கிறோம். தற்பொழுது கூட வாடகை வீட்டில்தான் வசித்து வருகிறோம். லாபத்தை நினைத்து இட்லியின் விலையை உயர்த்த விரும்பவில்லை. பள்ளிக்குச் செல்லும் குழந்தைகளுக்காக இதை ஒரு சேவையாகத்தான் செய்து வருகிறோம்.

ஒரு நாளைக்கு ரூ.150 லிருந்து ரூ.200 வரை வியாபாரம் ஆகிறது. ஞாயிற்றுக்கிழமை வியாபாரம் கிடையாது. விலைவாசி எவ்வளவு உயர்ந்தாலும் இட்லியின் விலையை உயர்த்தக் கூடாது என்ற முடிவில் நாங்கள் உறுதியாக உள்ளோம்.
பள்ளிக்குச் செல்லும் குழந்தைகள் இங்கு வந்து இட்லி வாங்கிச் செல்வதைப் பார்க்கும் போது கிடைக்கும் ஆத்ம திருப்தியே எங்களுக்கு போதும். அதற்கு முன்பு பணம் ஒரு பொருட்டே இல்லை'' என்றனர்.

தொடரட்டும் ....படைதவன் படி அளப்பான் ...

இறைவன் நீண்ட ஆயுளை கொடுக்கட்டும்