மனிதன் தெய்வமாதல் - சுவாமி விவேகானந்தர்!

"தூய்மையுடன் இரு. தன்னலமற்று இரு - இதுவே மதம்."

என் அருமைக் குழந்தைகளே! சமய வாழ்வின் உட்பொருள் கொள்கைகளில் இல்லை, நடை முறையில்தான் உள்ளது. நல்லவனாக இருப்பது நல்லதைச் செய்வது இதில் தான் மதத்தின் முழுமையும் அடங்கியுள்ளது. இறைவா! இறைவா! என்று கதறி அழைப்பதில், அழுவதில் மதம் இல்லை. இறைவனின் விருப்பத்தை நிறைவேற்றுவதில், அவர் விரும்பிய வண்ணம் நடந்து கொள்வதில்தான் மதம் உள்ளது.
நீங்கள் அனைவரும் நல்ல இளைஞர்களே! உங்களில் பெரும்பாலோர் நீங்கள் பிறந்த பொன்னாட்டிற்கு நல்ல ஆபரணமாய், உங்கள் தாய்த்திருநாட்டிற்கு அதன் தவப்பயனாய் விளங்கப் போகிறீர்கள். அந்தப் பொன்னான காலம் வெகு தொலைவில் இல்லை. இதில் எனக்கு நம்பிக்கை இருக்கிறது.

அவ்வப்போது உலகத்திடமிருந்து உங்களுக்குப் பலமான அடி கிடைக்கலாம். அதற்காக மனம் குலையக் கூடாது. கணநேரத்தில் அது சரியாகிவிடும். நேர்மையுடன் நில்லுங்கள். தைரியமாக இருங்கள். சற்றும் பிறழாத நீதிமானாக இருங்கள். தோல்வி கண்ட போதும் துவளாமல் இருங்கள். முழு வளர்ச்சி பெற்ற உள்ளத்தினராக, முழு மனிதனாகத் திகழுங்கள். மதக் கொள்கைகளை பற்றி சிறிதும் கவலைப்பட வேண்டியதில்லை. கோழைகளே குற்றம் செய்வார்கள். தீரர்கள், ஆண்மையுடையவர்கள், மனதளவில் கூட ஒருபோதும் தவறு செய்யமாட்டார்கள். எல்லாரிடமும் அன்போடு பழகுங்கள்.

முதலில் உங்களை மனிதனாக்கிக் கொள்வீர்களாக. அதன்பின்னர், உங்கள் கவனிப்பில் இருப்பவர்களை வீரர்களாகவும், தீரர்களாகவும், இறக்கம் உடையவர்களாகவும், மாற்ற முயலலாம். உங்களுக்கு வேண்டியது மதம் அல்ல, வேண்டியதெல்லாம் ஒழுக்கமும், ஆண்மையும்தான். கோழைத்தனமின்மை, பாவமின்மை, பலவீனம் இன்மை - இவையே. மற்றவை தாமாகவே உங்களை தேடிவரும். உள்ளத்தைத் தூண்டக் கூடிய, உணர்ச்சியை எழுப்பக் கூடிய கேளிக்கை, களியாட்டங்களுக்குச் செல்ல வேண்டாம். நாடக மேடைகளை நாட வேண்டாம்.

நாடு என்ற வகையில் நாம் நம்முடைய தனித்தன்மையை இழந்து விட்டோம். இந்த நாட்டின் துன்பங்களுக்கெல்லாம், இதுவே காரணம். நம்முடைய நாட்டிற்கு அது இழந்துவிட்ட தனித்தன்மையை மீண்டும் ஈட்டித் தருவோம். பாமரமக்களை உயர்த்தப் பாடு படுவோம். இந்துவும், முகமதியனும், கிறிஸ்தவனும் அவர்களை தத்தம் காலடியில் இட்டு மிதித்துச் சென்றிருக்கிறார்கள். மீண்டும் அவர்களை நிலை நிறுத்துவோம். அதற்குத் தேவையான ஆற்றல் நம்முள்ளே இருந்து வரவேண்டும். அதாவது ஆசாரம் மிக்க இந்துக்களிடமிருந்தே வரவேண்டும்.

இளைஞர்களே! உங்களிடம் இப்போது நல்ல கனவுகள், நல்ல சிந்தனைகள் உருவாகட்டும். நீங்கள் நல்லவர்கள். பெருந்தன்மையுள்ளவர்கள். உங்களை உலகவழிகளில் திருப்பி உலக நிலைக்குத் தாழ்த்துவதைத் தவிர்த்து, மனிதனை ஆன்மீக, தெய்வ நிலைக்கு உயர்த்தி, அன்றாடம் ஒரு சிறிதாவது இந்தப் பரந்த உலகு எல்லையற்ற எழிலுடன் இலங்குவதைக் காண முயலுங்கள். அமைதியும், தூய்மையும் கொண்ட ஆன்மீகத்தில் இரவும் பகலும் அமிழ்ந்து வாழ முயலுங்கள். எது பயனற்ற மாயாஜாலமோ அதன் நிழல்கூட உங்கள் மீது பட வேண்டாம். உங்கள் காலின் கட்டை விரல் கூட அதன் மீது படிய வேண்டாம்.