சீனாவில் வருமான வரி சீர்திருத்தம்

சீன நாணயமான யுவான்
சீனாவில் ஒருவர் மீது வருமானவரி விதிப்பு ஆரம்பிக்கப்படுவதற்குரிய அவருடைய குறைந்தபட்ச வருமானத்தின் அளவை ஐம்பது சதவீதத்தால் அதிகரிப்பதென அந்நாட்டின் வருமான வரி சட்டத்தில் கொண்டுவரப்படவுள்ள திருத்தத்தின் வரைவு கூறுகிறது.
தற்போது மாதம் அவர் 2000 யுவான்கள் அதாவது 304 டாலர்கள் சம்பாதிக்க ஆரம்பித்ததிலிருந்து வருமான வரி விதிக்க ஆரம்பிக்கப்படும் என்றுள்ளது.

இந்த நிலையை மாற்றி மாதம் 3000 யுவான்கள் அதாவது 456 டாலர்கள் அவர் சம்பாதிக்கத் துவங்கும்போதுதான் வருமான வரி விதிப்பு ஆரம்பிக்கும் என்று சட்டத் திருத்தம் கொண்டுவரப்படவுள்ளது.

இதன்காரணமாக சீன மக்கள் ஐந்து கோடி பேர் வருமான வரி விதிப்பிலிருந்து விடுவிக்கப்படுவார்கள் என மதிப்பிடப்படுகிறது.

அதேநேரம், மக்களுடைய சராசரி ஊதியத்தை ஆண்டொன்றுக்கு பதினைந்து சதவீதம் என்ற வீதத்தில் அடுத்த ஐந்து ஆண்டுகளுக்கு தொடர்ந்து அதிகரிப்பதற்கான பெரும் திட்டம் ஒன்றையும் சீனாவில் அதிக செல்வாக்கும் அதிகாரமும் கொண்ட அபிவிருத்திக்கும் சீர்திருத்தத்துக்குமான ஆணையம் வரைந்துவருவதாக தெரிகிறது.

தவிர தற்சமயம் சீனாவில் நாள் வருமானம் அரை டாலர் அதாவது ஐம்பது செண்டுகளுக்கும் குறைவாக இருப்பவர்களே சீனாவில் வறுமைக்கோட்டுக்கு கீழ் உள்ளவர்களாக கருதப்படுகிறார்கள்.

ஆனால் இனி 63 செண்டுகளுக்கு குறைவான வருமானம் உள்ளவர்கள் அனைவரும் வறுமைக் கோட்டுக்கு கீழ் உள்ளவர்களாக கருதப்படவுள்ளனர்.

இந்த அடிப்படையில் பார்க்கையில் சீனாவில் வறுமைக் கோட்டுக்கு கீழ் உள்ளவர்களாக கருதப்படும் மக்களின் எண்ணிக்கை 10 கோடியால் அதிகரிக்கும்.

இந்த மக்களுக்கு குறைந்த வருமானம் உடையவர்களுக்கான சலுகைகளும் வீட்டு வாடகைக்கான உதவித்தொகையும் அரசாங்கத்திடம் இருந்து கிடைக்கும்.

சீனாவில் செல்வந்தவர்களுக்கும் ஏழைகளுக்குமான இடைவெளி அதிகரித்துக்கொண்டே போவதால் நாட்டின் பல பாகங்களில் சமூகக் கொந்தளிப்பு உருவாகிவரும் நிலையில், இப்படியான மாற்றங்களைக் கொண்டுவர அதிகாரிகள் நிர்பந்திக்கப்பட்டுள்ளனர் என்று சொல்லலாம்.