எல்லை மீற மாட்டேன்: சந்தியா

எல்லை மீற மாட்டேன்: சந்தியா



சிம்புதேவன் இயக்கும் "இரும்புக்கோட்டை முரட்டு சிங்கம்' படத்தில் காட்டுவாசியாக நடிக்கிறார் சந்தியா. இளைஞர்களை கவருகின்ற வேடங்களில் நடித்து அசத்திக் கொண்டிருக்கும் கிளாமர் நடிகைகளுக்கு முன் உங்கள் வேடம் எடுபடுமா என அவரிடம் கேட்டபோது...
""சினிமாவில் கவர்ச்சி போதை அதிகமாகி விட்டது. நான் கவர்ச்சி காட்ட வேண்டும் என நினைத்து சினிமாவுக்கு வரவில்லை. தமிழ் கலாசாரத்தில் இருந்து என்றும் நான் எல்லை மீற மாட்டேன்.
சமீப காலமாக நடிகைகளுக்கு நீச்சல் உடை ஜுரம் அடித்துக் கொண்டிருக்கிறது. நடிகைகளின் லட்சியங்களில் ஒன்றாக நீச்சல் உடை மாறி விட்டது. பிரபல நடிகை நீச்சல் உடை அணிகிறார் என செய்தி போட்டு அதை பத்திரிகைகளும் பெரிதாக்கி விடுகின்றன.
நீச்சல் உடையில் நடிக்குமாறு என்னை இதுவரை யாரும் கேட்கவில்லை. அப்படியே கேட்டாலும் அதை நிச்சயமாக அணிய மாட்டேன்.
தற்போது "இரும்புக்கோட்டை முரட்டு சிங்கம்' படத்தில் காட்டு வாசிப் பெண்ணாக நடித்து வருகிறேன். இது என் சினிமா வாழ்க்கையில் முக்கியமான கேரக்டர். இதற்காக தோல் ஆடைகளை அணிந்து நடித்திருக்கிறேன். இதே உடையில் பரதநாட்டியமும் ஆடி இருக்கிறேன். படத்தில் அந்த நாட்டியம் பெரிதும் பேசப்படும்.
கன்னடத்தில் "ஆபத்ரக்ஷா' என்ற படத்தில் நடித்து முடித்து விட்டேன். இது சந்திரமுகி படத்தின் இரண்டாம் பாகம். தமிழில் வேறு எந்த படமும் ஒப்புக் கொள்ளவில்லை.
"இரும்புக்கோட்டை முரட்டு சிங்கம்' படம் முடிந்த பிறகே மற்ற படங்களை ஏற்றுக் கொள்வேன். இந்த படத்தில் நடிக்கும் போது மற்ற படங்களில் நடிக்க முடியாது. ஏனென்றால் இது கேரக்டருக்கு முக்கியத்துவம் அளிக்கக்கூடிய படம்.
தற்போது தெலுங்கு படம் ஒன்றில் நடிக்க பேச்சு நடைபெற்று வருகிறது என்றார் சந்தியா.