குருப்பெயர்ச்சி திருத்தலம் - குருவித்துறை

by மஞ்சுபாஷிணி Thu Apr 21, 2011 12:07 pm

குருப்பெயர்ச்சி திருத்தலம் - குருவித்துறை

பெண்ணொருத்தி தந்த சாபம் அது! சப்தமலைகளாலும் சூழப்பட்டு, இந்திரலோகம் செல்ல முடியாமல் சிறையுண்டு கிடந்தான் கச்சன். இதை அறிந்த அவனுடைய தந்தை, கலங்கினார்; கடும் கோபம் கொண்டார்; உலகமே ஞானம் தேடி அவரைச் சரணடைகிறது. ஆனால், மகனை மீட்க அவருக்கு வழிதெரியவில்லை.
நாரதரிடம் ஓடினார். அவரும் ஆலோசனையை வழங்க... வேகவதி நதிக்கரையில், தனக்கெனப் படித்துறை அமைத்து, அந்த நதியில் நீராடி, ஆற்றங்கரையில் கடும் தவம் மேற்கொண்டார்.
இதில் மனம் பூரித்த திருமால், அவருக்கு திருக்காட்சி தந்தார். அதுவும் எப்படி?! சித்திரை மாதத்தில், ஆயிரம் சித்திரங்கள் கொண்ட ரதத்தில் வந்து திருக்காட்சி தந்தார். அத்துடன் அவரின் கோரிக்கையை ஏற்று, அவருடைய மகன் கச்சனையும் மீட்டுத் தந்தருளினார்!

அன்று முதல், அந்தத் தலத்தில் இருந்தபடி அனைவருக்கும் அருள்பாலிக்கலானார் திருமால். அவருக்கு சித்திர ரத வல்லப பெருமாள் எனும் திருநாமம் அமைந்தது. அதேபோல், கச்சனின் தந்தையும் அங்கே தனிச்சந்நிதியில், தனிக்கோயிலாகவே அமர்ந்து அனைவருக்கும் அருள்பாலித்து வருகிறார். அந்தத் தந்தை, குரு பகவான்! மதுரை மாவட்டம் சோழவந்தானுக்கு அருகில் உள்ள அந்தப் பகுதி, குருவித்துறை என்றே அழைக்கப்படுகிறது. குரு வீற்றிருந்த துறை என்பதால் இந்தப் பெயரே ஊர்ப்பெயராகவும் அமைந்தது என்கிறது ஸ்தல புராணம்.
குரு பகவான் குடிகொண்டிருக்கும் தலத்தில், குருப்பெயர்ச்சியின் போது சிறப்பு ஹோமங்களும் பூஜைகளும் நடைபெறுகின்றன. இந்த யாகத்தில் கலந்துகொண்டு குரு பகவானை வணங்கினால், தொழில் சிறக்கும்; கல்வி-கேள்வியில் சிறந்து விளங்கலாம் என்பது ஐதீகம்!
அருகில் உள்ள நதியில் நீராடிவிட்டு, சித்திர ரத வல்லப பெருமாளுக்கு பொங்கலிட்டு, கண்ணாரத் தரிசித்தால், நம் தலைமுறையில் உள்ள மொத்த தோஷங்களும் விலகும் என்கின்றனர் பக்தர்கள். மேலும் திருமண தோஷங்கள் நீங்கப் பெற்று, விரைவில் திருமணம் கைகூடும்; பிள்ளை பாக்கியம் பெறலாம் என்றும் பெருமிதத்துடன் தெரிவிக்கின்றனர்.

ஸ்ரீதேவி-பூதேவி சமேதராக, நின்ற திருக்கோலத்தில் காட்சி தரும் ஸ்ரீசித்திர ரத வல்லப பெருமாள் கொள்ளை அழகு! தாயாரின் திருநாமம் செண்பகவல்லித் தாயார்.
மதுரையில் இருந்து சுமார் 27 கி.மீ. தொலைவில் உள்ளது சோழவந்தான். இங்கிருந்து சுமார் 6 கி.மீ. தொலைவில் அமைந்துள்ள திருத்தலம் குருவித்துறை. பெரியார் பேருந்து நிலையத்தில் இருந்து பஸ் வசதி உண்டு. மதுரை -திண்டுக்கல் சாலையில் உள்ள வாடிப்பட்டியில் இருந்து சுமார் 8 கி.மீ. தொலைவில் உள்ளது சோழவந்தான்.
குருவித்துறை திருத்தலத்துக்கு வாருங்கள்; நீங்கள் எந்தத் துறையில் இருந்தாலும், அதில் ஜொலிப்பீர்கள் என்பது உறுதி!

நன்றி விகடன்