அரவாணிகள் அழகிப்போட்டியில் மதுரை ரம்யா தேர்வு

**சிவா** · **சிவா** Wed Apr 20, 2011 2:25 pm

The winner and runners up in the Miss Koovagam title at Villupuram on Tuesday

விழுப்புரத்தில் நடந்த அரவாணிகள் அழகி போட்டியில் மதுரையை சேர்ந்த ரம்யா `மிஸ் கூவாகம்' ஆக தேர்வு செய்யப்பட்டார்.

மிஸ் கூவாகம் போட்டி - Miss Koovagam

விழுப்புரம் மாவட்டம் உளுந்தூர்பேட்டை தாலுகா கூவாகம் கிராமத்தில் உள்ள கூத்தாண்டவர் கோவிலில் சித்திரை திருவிழா நடந்து வருகிறது. இதில் கலந்து கொள்ள இந்தியா மட்டுமின்றி பல்வேறு நாடுகளில் இருந்தும் ஆயிரக்கணக்கான அரவாணிகள்(திருநங்கைகள்) குவிந்துள்ளனர். அவர்களில் பெரும்பாலானோர் விழுப்புரத்தில் தங்கியுள்ளனர்.

இதையொட்டி நேற்று காலை விழுப்புரம் ஆஞ்சநேயா திருமண மண்டபத்தில் ஏ.ஆர்.எம். தொண்டு நிறுவனம், விழுப்புரம் மாவட்ட அரவாணிகள் நலச்சங்கம், ஆகியவை இணைந்து அரவாணிகளுக்கான மிஸ் கூவாகம் அழகிப்போட்டி, நடனப்போட்டி, வினாடி வினா போட்டி, வாசகப்போட்டியை நடத்தின.

முதலாவதாக நடைபெற்ற நடனப்போட்டியில் 25-க்கும் மேற்பட்ட அரவாணிகள் கலந்து கொண்டு விதவிதமான உடைகளில் நடனமாடி பார்வையாளர்களை வெகுவாக கவர்ந்தனர். அதனை தொடர்ந்து மதியம் 12 மணிக்கு மிகவும் ஆவலுடன் ஏற்பட்ட `மிஸ் கூவாகம் 2011'-க்கான அழகிப்போட்டி நடந்தது. .

இதில் விழுப்புரம், மும்பை, பெங்களூர், சென்னை, அசாம், மதுரை, திருச்சி, சேலம், கோவை, ஐதராபாத், செகந்தராபாத் உள்பட பல்வேறு பகுதிகளில் இருந்து நூற்றுக்கும் மேற்பட்ட அரவாணிகள் கலந்து கொண்டு விதவிதமான கண்ணை கவரும் வகையிலான வண்ண வண்ண உடைகளில் மேடையில் கவர்ச்சியாக தோன்றி பார்வையாளர்களை அசத்தினர்.

மதுரை ரம்யா முதலிடம்

அழகிப்போட்டியில் பங்கேற்றவர்களில், நடை, உடை, பாவணையின் அடிப்படையில் 10 பேர் தேர்ந்தெடுக்கப்பட்டனர். இவர்களுக்கு பொது அறிவுத்திறன், எய்ட்ஸ், எச்.ஐ.வி.யின் அறிகுறிகள் சம்பந்தப்பட்ட கேள்விகள் கேட்கப்பட்டன. இதில் சிறப்பாக பதில் அளித்த 3 பேரை நடுவர்கள் தேர்ந்தெடுத்தனர்.

சிறப்பாக பதில் அளித்த மதுரையை சேர்ந்த ரம்யா `மிஸ் கூவாகம்-2011' ஆக தேர்ந்தெடுக்கப்பட்டார். அப்போது அரங்கில் இருந்த அரவாணிகள் அனைவரும் பலத்த கை தட்டி கரகோஷத்தை எழுப்பினர். பெங்களூரை சேர்ந்த பூமிகா 2-வது இடத்தையும், சென்னையை சேர்ந்த ரகசியா 3-வது இடத்தையும் பிடித்தனர்.

அதேபோல் நடனப் போட்டியில் நிஷா முதல் இடத்தையும், மைதிலி 2-வது இடத்தையும், ஷகிலா 3-வது இடத்தையும் பிடித்தனர்.

நகரசபை தலைவர் பரிசு

இதையடுத்து பரிசளிப்பு விழா நடைபெற்றது. இதில் `மிஸ் கூவாகம்' ஆக தேர்ந்தெடுக்கப்பட்ட மதுரை ரம்யாவிற்கு விழுப்புரம் நகரசபை தலைவர் ஆர்.ஜனகராஜ் கிரீடத்தை அணிவித்து, ரூ.5 ஆயிரம் பரிசுத்தொகையை வழங்கினார்.

இதேபோல் 2-ம் இடத்தை பிடித்த பெங்களூர் பூமிகாவிற்கு ரூ.4 ஆயிரம் பரிசுத்தொகையும், 3-வது பரிசை பெற்ற சென்னை ரகசியாவிற்கு ரூ.3 ஆயிரம் பரிசும் வழங்கப்பட்டது.

தினதந்தி!