தேர்தல் பணிக்கு கூடுதலாக சம்பளம் கொடுத்துவிட்டோம்; ரூ.160-ஐ திருப்பிக் கொடுங்கள்

தேர்தல் பணிக்கு கூடுதலாக சம்பளம் கொடுத்துவிட்டோம்; ரூ.160-ஐ திருப்பிக் கொடுங்கள், வீடு-வீடாகச்சென்று முன்னாள் ராணுவத்தினரிடம் போலீசார் கேட்கிறார்கள்.

``தேர்தல் பாதுகாப்பு பணியில் ஈடுபட்ட முன்னாள் ராணுவத்தினரிடம், சம்பளம் கூடுதலாக கொடுத்து விட்டோம். எனவே, ஒரு நாளைக்கு ரூ.40 வீதம் 4 நாட்களுக்கு ரூ.160-ஐ திருப்பிக் கொடுங்கள்'' என்று போலீசார் வீடுவீடாகச் சென்று கேட்டு வருகின்றனர்.

தேர்தல் பணி

தமிழகத்தில் சட்டசபை தேர்தல் கடந்த 13-ந் தேதி நடந்தது. தேர்தல் பாதுகாப்பு பணிகளில் முன்னாள் ராணுவ வீரர்களை பயன்படுத்துவது வழக்கம்.

கடந்த தேர்தலின் போது முன்னாள் ராணுவ வீரர்களுக்கு ரூ.175 மதிப்பூதியமும், ரூ.100 உணவுப்படியும் வழங்கப்பட்டன. இளநிலை படை அலுவலர்களுக்கு மதிப்பூதியமாக ரூ.250-ம், உணவுப்படி ரூ.100-ம் வழங்கப்பட்டன.

இந்த தேர்தலின் போதும் பாதுகாப்பு பணிக்கு இவர்களுக்கு அழைப்பு விடுக்கப்பட்டது. ஆனால் சம்பளம் பற்றாக்குறையாக உள்ளது, கூடுதலாக வழங்கினால் மட்டுமே பணியாற்ற முடியும் என்று முன்னாள் ராணுவ வீரர்கள் தெரிவித்தனர்.

இதையடுத்து அவர்களுக்கு தலா ரூ.300 சம்பளம், ரூ.100 உணவுப்படி வழங்கப்படும் என்று அறிவிக்கப்பட்டது.

4 நாட்கள் பணி

இதை ஏற்று முன்னாள் ராணுவ வீரர்கள் பாதுகாப்பு பணியில் ஈடுபட்டனர். ஒரு ஓட்டுச்சாவடிக்கு 2 முன்னாள் ராணுவத்தினருக்கு பணி அளிக்கப்பட்டது. தேர்தலை ஒட்டி 4 நாட்கள் அவர்கள் வேலை பார்த்தனர்.

அவர்களுக்கு 4 நாட்களுக்கும் சேர்த்து தலா ரூ.1,200 மதிப்பூதியம் வழங்கப்பட்டது. ரூ.400 உணவுப்படி வழங்கப்பட்டது. பணிகள் முடிந்து சம்பளப்பணத்தை பெற்றுக்கொண்டு அவரவர் வீட்டுக்குச் சென்று விட்டனர்.

`திருப்பிக் கொடுங்கள்'

இந்த நிலையில் மதுரை மாவட்ட போலீஸ் சூப்பிரண்டு அலுவலகத்தில் இருந்து போலீஸ் நிலையங்களுக்கு ஒரு சுற்றறிக்கை அனுப்பப்பட்டுள்ளது.

அதில், ``நிர்வாக கவனக்குறைவால், முன்னாள் ராணுவத்தினர் சம்பளத்தில் குளறுபடி ஏற்பட்டுவிட்டது. அவர்களின் சம்பளத்தில் பிரச்சினை இல்லை. ஆனால் உணவுப்படி ஒரு நாளைக்கு ரூ.60 மட்டுமே அனுமதிக்கப்பட்டுள்ளது. இதன்படி ஒரு நாளைக்கு ரூ.40 கூடுதலாக தரப்பட்டுள்ளது. 4 நாட்களுக்கும் சேர்த்து கூடுதலாக தரப்பட்ட உணவுப்படி ரூ.160 திரும்பப் பெறுங்கள்'' என்று கூறப்பட்டுள்ளது.

அலுவலக உத்தரவை மீற முடியாமால், போலீசாரும் தங்கள் போலீஸ் நிலையத்திற்கு உட்பட்ட பகுதிகளை சேர்ந்த ராணுவ வீரர்களின் வீடுகளுக்கு சென்று பணத்தை திரும்பத் தருமாறு கேட்டனர்.

இதனால் அதிர்ச்சியடைந்த முன்னாள் ராணுவத்தினர் பணத்தை திரும்ப தர முடியாது என்று கூறிவிட்டனர். ஒரு சில இடங்களில் இதை எழுதித் தருமாறு போலீசார் கேட்க, ராணுவ வீரர்களும் எழுதிக் கொடுத்துள்ளனர்.

பேட்டி

இது குறித்து முன்னாள் ராணுவ வீரர்கள் கூறியதாவது:-

சம்பளம் போதவில்லை என்பதால் தேர்தல் பணிக்கு வரமாட்டோம் என்று கூறினோம். இதனால் சம்பளத்தை உயர்த்தி அறிவித்தனர். அதன்படி சம்பளத்தையும் வழங்கினார்கள். இப்போது திடீரென்று வந்து உணவுப்படி கூடுதலாக கொடுத்துவிட்டோம். திருப்பிக் கொடுங்கள் என்று கேட்கின்றனர்.

கடந்த தேர்தலை விட தற்போது விலைவாசி மிகவும் கூடியுள்ளது. சாதாரண கடைகளில் கூட சாப்பாடு ரூ.50-க்கு தான் கிடைக்கிறது. இப்படியிருக்க உணவுப்படி ரூ.60 தான் என்கிறார்கள். இதை முதலிலேயே சொல்லியிருந்தால், தேர்தல் பணிக்கே சென்றிருக்க மாட்டோம்.

இவ்வாறு அவர்கள் கூறினர்.

தினதந்தி

கேட்பார் இன்றி கிடக்கும் 49 கோடியில கணக்கு வச்சுங்க்க ஜயா.....

பாருங்கப்பா ஓட்டு போட அரசியல்வாதிங்க பணத தராங்க பாதுகாபுக்குபோனா பணத்த கேக்குறாங்க இவுங்க டீலிங்க்ஸே புரியலயே

தவறுதலாக கொடுத்த அந்த அலுவலகம் தான் பொறுப்பேற்க வேன்டுமே ஒழிய கொடுத்தவர்களிடம் திரும்ப கேட்பது கேலிக்குரியது ஒரே காமெடிப்பா

இது கூட நல்லாத்தான் இருக்கு

பெரிய அமௌண்ட் எல்லாம் விட்டுடுங்க ,,இதுமாதிரி சில்லறை அமௌண்ட் தான் உங்க கண்ணுல மாட்டுமாக்கும் ?