சனி தோஷம் போக்கும் ஆஞ்சநேயர்!

**சிவா** · **சிவா** Thu Apr 21, 2011 8:28 am

* மதுரை அருகே உள்ள திருமோகூர் காளமேகப் பெருமாள் ஆலயத்தில், ஆஞ்சநேயர் திருவிளக்கில் காட்சி தருகிறார்.

* இந்தியாவில் பிரம்மச்சாரியாக வழிபடப்படும் அனுமன், தாய்லாந்து நாட்டில் மனைவியருடன் தரிசனம் தருகிறார்.

* பெங்களூர் பசவங்குடியில் கராஞ்சிய ஆஞ்சநேயர், ஆகாயத்தில் பறப்பதுபோல் காட்சி தருகிறார். இவரின் கையில் சஞ்சீவி மலைக்குப் பதில் சூடாமணி உள்ளது. இது, அனுமன், அசோகவனத்தில் இருந்த சீதாதேவியிடம் இருந்து சூடாமணி பெற்று வந்த சம்பவத்தை விளக்குவதாகக் குறிப்பிடுகிறார்கள். இவருடைய திருமுகம் ராமர் சந்நதியை நோக்கியபடி உள்ளது.

* ராமேஸ்வரத்தில் அனுமன் தீர்த்தத்துக்கு அருகே எழுந்தருளியிருக்கிறார், அபய ஆஞ்சநேயர். இவரது உருவம் அத்தி மரத்தால் ஆனது. அனுமன் ஜெயந்தி அன்று இவருக்கு விசேஷ அபிஷேகங்கள் நடைபெறுகின்றன.

* மதுரை மாவட்டம், உசிலம்பட்டி அருகே ஆனையூர் கிராமத்தில் ஐராவதீஸ்வரர் கோவிலில் அனுமனின் தாயார் அஞ்சனாதேவிக்கு தனிச் சந்நதி உள்ளது. தேவியின் வலப்பக்கத்தில் குழந்தை வடிவில் அனுமனும், இடப்பக்கத்தில் அஞ்சனா தேவியின் தோழியும் உள்ளனர்.

* நாகப்பட்டினத்தில் இருந்து 4 கி.மீ. தொலைவில் உள்ள பொரவச்சேரி ராமபத்ர பெருமாள் கோவிலில் உள்ள அனுமனுக்கு `வீரமங்கள ஆஞ்சநேயர்' என்று பெயர் வழங்கப்படுகிறது. வடக்கு நோக்கியுள்ள இவரது பாதம் திருநள்ளாறு சனீஸ்வரரை நோக்கி அமைந்திருப்பதாக நம்பப்படுகிறது. அதனால் இவரை வணங்கி வழிபட்டால் சனிபகவானால் ஏற்படும் இன்னல்கள் மறையும் என்று அப்பகுதி மக்கள் நம்புகிறார்கள்.