கி. வீரமணி வழியைப் பின்பற்றினால் நாடு முன்னேறும்! மணிசங்கர அய்யர்

திராவிடர் கழக தலைவர் கி.வீரமணி அவர்களுடைய வழியைப் பின்பற்றினால் மக்கள் முன்னேறுவார்கள். சமுதாயம் முன்னேறும் என்று முன்னாள் மத்திய அமைச்சர் மணி சங்கர அய்யர் தமது உரையில் குறிப் பிட்டார். முன்னாள் நாடாளுமன்ற உறுப்பினர் முன்னாள் அமைச்சர் மணி சங்கர அய்யர். மயிலாடுதுறையில் நேற்று (9.4.2011) ஆற்றிய உரை வருமாறு:


நான் மேடையில் அமர்ந்திருப்பதற்கு காரணம் வீரமணி அய்யா என்ன பேசுகிறார் என்பதை கேட்கத்தான் இருக்கிறேன். அவர் மேடையில் இருக்கும் போது நான் பேசுவதில் பெருமையாக கருதுகிறேன். இந்த புத்தகம் என் கையில் (தி.மு.க. ஆட்சியின் சாதனைகளும், அ.தி.மு.க. அணியின் வேதனைகளும், என்ற நூல்) ஏற்கெனவே இருக்கிறது. ஆனால் இன்றைக்கு அவர் கையொப்பம் போட்டு எனக்கு கொடுத்திருக்கிறார். அதை எப்போதும் என் கையில் வைத்துக் கொண்டு இருப்பேன். நான் போகின்ற நேரத்தில் என் குழந்தைகளுக்கு கொடுப்பேன். இதில் அந்த அளவிற்கு முக்கியத்துவம் இருக்கிறது. நாம் சொல்வதைவிட அவர் முன்னாலேயே ஒரு புத்தகம் எழுதி வெளியிட்டு இருப்பது மகிழ்ச்சி. ஜனநாயக முற்போக்கு கூட்டணியின் சாதனைகளும், ஜெயலலிதா அணியின் வேதனைகளும் என்ற நூல் சிறப்பான நூல்.


டில்லியிலும் - தமிழகத்திலும்

முதல் முறையாக என்னுடைய 20 ஆண்டுகால அரசியல் வாழ்க்கையில், எந்த கூட்டணி (தமிழகத்தில்) கோட்டையில் ஆண்டு கொண்டு இருக்கிறதோ அதே கூட்டணி தான் டில்லியிலும் ஆண்டு கொண்டு இருக்கின்றது. இருவருக்கும் எந்த விதமான கருத்து வேறுபாடும் இல்லை, அரசியல் பாகுபாடும் இல்லை டில்லியிலிருந்து கோட்டைக்கு (தமிழ்நாட்டிற்கு) என்ன வேண்டுமோ? தமிழ்நாட்டில் இருந்து டில்லிக்கு என்ன வேண்டுமோ அதை அவர்கள் உறவுக்கு கை கொடுக்கும் விதமாக செய்து கொண்டு இருக்கின்றனர். தி.மு.க ஆதரவு இருக்கின்ற காரணத்தினால் டில்லியில் மன்மோகன் சிங் ஆட்சி சிறப்பாக நடைபெற்று வருகிறது. அதே போன்று சோனியா காந்தி தமிழகத்திற்கு ஆதரவு வழங்கி வருகிறார்.


ஜெயலலிதா கேட்ட கேள்வி

அன்றைக்கு ஜெயலலிதா ஒரு கிலோ அரிசி இரண்டு ரூபாய்க்கு கொடுக்க முடியுமா? என்று கேட்டார். இன்றைக்கு ஒரு கிலோ அரிசி ஒரு ரூபாய்க்கே தருகிறார்கள்.


ராகுல் காந்தி சொன்னார்

கடந்த 5 ஆண்டுகளில், டெல்லியிலிருந்து கோட்டைக்கு (தமிழ்நாட்டிற்கு) ஒரு லட்சம் கோடி ரூபாய் உதவியாக கொடுக்கப்பட்டுள்ளது. அதை வைத்துக் கொண்டு தமிழகத்தில் மிகச்சிறப்பாக ஆட்சி நடத்திக் கொண்டு, தனக்காக வைத்துக் கொள்ளாமல் மக்களுக்கு செல்கிறது. பயன் அடைகிறார்கள். பிரதமர் ராஜீவ் காந்தி உயிருடன் இருக்கும்போது ஒன்று சொன்னார்.


ஒரு ரூபாயில் 85 காசு தருகிறோம்

டில்லியிலிருந்து ஒரு ரூபாய் அனுப்பி வைக்கிறோமே அதில் 15 பைசாதான் ஏழை மக்களுக்கு சென்றடைகிறது. ஆனால், இன்று தமிழ்நாட்டில் என்ன சொல்லமுடியும் என்றால், டில்லியிலிருந்து எந்த ஒரு ரூபாய் வருகிறதோ அதில் 85 பைசா ஏழை மக்களுக்கு சென்றடைகிறது. (பலத்த கைதட்டல்) அதற்கு காரணம், அந்தளவுக்கு ஆட்சியை சிறப்பாக நடத்திக் கொண்டு இருக்கிறார், கலைஞர். நேர்மையுடன், மக்கள் பிரதிநிதியாக இருந்து ஆட்சியை சிறப்பாக நடத்தி கொண்டு வருகிறார். தொலைக்காட்சி கொடுப்பதில்கூட ஊ.மன்ற தலைவர்கள் மூலம் ஒவ்வொரு ஊரிலும் கொடுத்து மக்கள் விரும்பும் பிரதிநிதிகளாக ஊ.ம.தலைவர்கள் செயல்பட்டு வருகிறார்கள்.


கலைஞர் - மன்மோகன் சிங்

கலைஞரின் ஆட்சி தமிழகத் திலும், அவரின் தொண்டர் பிரதமர் மன்மோகன் சிங் ஆட்சி டில்லியிலும் நடந்து கொண்டு இருக்கிறது.


வீரமணி அவர்களின் ஆசீர்வாதம்

நான் வீரமணி அவர்களின் ஆசிர்வாதம் பெற்றுதான் வாழ்ந்து கொண்டு இருக்கிறேன். நான் 20 வருடத்திற்கு முன்பு அவரை பார்த்தபோது ஆசீர்வாதம் கிடைத்தது. அன்றிலிருந்து எந்த வழியில் போக வேண்டும் என்று உத்தரவிட்டார்களோ, அந்த வழியில்தான் முன்னேறிக் கொண்டு இருக்கிறேன். என்னுடைய பெயரில்தான் மணி சங்கர அய்யர் என்று அய்யர் இருக்கிறதே ஒழிய உங்களுடைய உணர்வோடு தான், விழியோடுதான் வாழ்கிறேன். திராவிடர் கழகம் என்ற சமூக நீதியோடு, உங்கள் வழியில் சென்றால் நம்நாடு முன்னேறும், அதை விட்டு சிலருக்கு மட்டும் வேலை செய்தோமானால் நாம் என்றைக்குமே முன்னேற முடியாது.


உங்களுடைய பிரச்சாரம் மத்தியப்பிரதேசத்திலும், சட்டீஸ்காரிலும் இல்லாமல் இருப்பதால்தான் அங்கு மக்கள் கஷ்டப்படுகிறார்கள். அதே மாதிரி கஷ்டப்படாமல் இருக்க ஒரே வழி டாக்டர் கி. வீரமணி அவர்கள் காட்டுகிற வழி. அந்த வழியில் முன்னேறினால் ஜன நாயகம் தழைத்தோங்கும், இல்லை என்றால் ஜனநாயகத் திற்கு பெரும் ஆபத்து வந்து விடும். இவ்வாறு முன்னாள் மத்திய அமைச்சர் மணிசங்கர அய்யர் உரையாற்றினார்.


kovainews