ஏப்ரல் 13 புதன்.. இன்னும் 2 நாட்கள்தான் இருக்கிறது...

தமிழ்நாட்டில் உள்ள 4 கோடியே 59 லட்சத்து 50 ஆயிரம் வாக்காளர்கள் தங்கள் இடதுகை ஆள்காட்டி விரலில் கறுப்பு மை வைத்துக் கொள்வதற்கான நேரம் நெருங்கி விட்டது. தங்களை ஆளும் எஜமானர்களை தேர்ந்து எடுப்பதற்கான வாய்ப்பு, 5 ஆண்டுகளுக்கு பிறகு அவர்களுக்கு மீண்டும் கிடைத்து இருக்கிறது.

மக்களாட்சியில் எல்லோரும் சமம் என்று நாம் பெருமையாக கூறிக் கொண்டாலும், நடைமுறையில் அப்படி இருக்கிறதா? என்பது கேள்விக்குறிதான். ஆனால் தேர்தலை பொறுத்தமட்டில் எல்லோரும் சமம் என்பதை நாம் ஒப்புக்கொள்ளத்தான் வேண்டும். தேர்தலில் ஆண்டிக்கும் ஒரு ஓட்டுதான்; அதிகாரிக்கும் ஒரு ஓட்டுதான்.

12-வது தமிழக சட்டசபையின் பதவிக்காலம் முடிவடைய இருப்பதையொட்டி, 13-வது சட்டசபையை தேர்ந்து எடுப்பதற்கான தேர்தல் 13-ந் தேதி (புதன்கிழமை) நடைபெற உள்ளது. (இதே நாளில் புதுச்சேரி, மற்றும் கேரள சட்டசபைகளுக்கும் தேர்தல் நடைபெறுகிறது)

தமிழ்நாட்டில் உள்ள 234 தொகுதிகளிலும் 4 கோடியே 59 லட்சத்து 50 ஆயிரம் வாக்காளர்கள் உள்ளனர். இவர்கள் ஓட்டுப் போடுவதற்காக 54 ஆயிரத்து 16 வாக்குச்சாவடிகள் அமைக்கப்பட்டு இருக்கின்றன.

வழக்கமாக காலை 7 மணி முதல் மாலை 5 மணி வரை 10 மணி நேரம் வாக்குப்பதிவு நடைபெறும். ஆனால் இந்த தேர்தலில் வாக்குப்பதிவு நேரம் 1 மணி நேரம் குறைக்கப்பட்டு உள்ளது. காலை 8 மணி முதல் மாலை 5 மணி வரை இடைவிடாமல் 9 மணி நேரம் வாக்குப்பதிவு நடைபெறும் என்று தேர்தல் கமிஷன் அறிவித்து உள்ளது.

மாநிலம் முழுவதும் உள்ள அனைத்து வாக்குச்சாவடிகளுக்கும் உரிய பாதுகாப்பு வழங்கப்படும் என்றும், மக்கள் பயம் இன்றி ஓட்டுப் போட ஏற்பாடுகள் செய்யப்பட்டு இருப்பதாகவும் போலீஸ் டி.ஜி.பி. போலாநாத் அறிவித்து உள்ளார். எனவே வாக்காளர்கள் அச்சமின்றி வாக்குச்சாவடிகளுக்கு சென்று தங்கள் ஜனநாயக கடமையை ஆற்றவேண்டும்.

ஜனநாயகத்தில் மக்களுக்கு உள்ள சக்தி வாய்ந்த ஒரே அதிகாரம் வாக்குச்சீட்டுதான். அந்த வாய்ப்பை ஒவ்வொரு வாக்காளரும் தவறாமல், அதே சமயம் சரியாக பயன்படுத்திக் கொள்ள வேண்டும். இல்லையேல் உங்கள் இடது கை ஆள்காட்டி விரலில் வைக்கப்படும் கறுப்புமையைப் போல் உங்கள் வாழ்க்கையும் மாறிவிடும் ஆபத்து உள்ளது.

எனவே, உஷாரய்யா... உஷாரு...

தினதந்தி

சரியான பதிவு அண்ணா.......

இந்த தேர்தலில் பலருக்கு ஓட்டே இல்லை என்று அறியப்படுகிறேன். எனது ஊரில் சில பேர்களுக்கு வோட் ஐடி இருந்தும் அவர்கள் பெயர் ஓட் லிஸ்டில் இல்லை அண்ணா இது போல் தொடர்வது ஆளுங்கட்சிக்கு சாதகமாய் அமைய நடக்கும் நூதன கொள்ளையா அண்ணா