தமிழக சட்டசபைக்கு புதன்கிழமை தேர்தல்: நாளை மாலை பிரசாரம் ஓய்கிறது

தமிழக சட்டசபை தேர்தலுக்கான பிரசாரம் நாளை (திங்கட்கிழமை) மாலை 5 மணியுடன் ஓய்கிறது. அரசியல் கட்சி தலைவர்கள் கடைசி கட்ட ஓட்டு வேட்டையில் மும்முரமாக ஈடுபட்டுள்ளனர்.

சென்னை, ஏப்.10- தமிழக சட்டசபை தேர்தல், வருகிற 13-ந் தேதி (புதன்கிழமை) அன்று நடைபெறுகிறது.

ஒரே கட்ட தேர்தல்

இந்த தேர்தலில் தி.மு.க., அ.தி.மு.க. கூட்டணி கட்சிகளுக்கு இடையே கடும் பலப்பரீட்சை நடக்கிறது. பா.ஜனதா மற்றும் பல்வேறு சிறிய கட்சிகளின் வேட்பாளர்களும் களத்தில் உள்ளனர்.

தமிழ்நாட்டில் உள்ள 234 தொகுதிகளுக்கும் வருகிற புதன்கிழமை (13-ந் தேதி) ஒரே கட்டமாக தேர்தல் நடைபெறுகிறது. காலை 8 மணிக்கு தொடங்கும் ஓட்டுப்பதிவு மாலை 5 மணி வரை தொடர்ந்து நடைபெறும்.

பிரசாரம் நாளை ஓய்கிறது

தேர்தல் நடத்தை விதியின்படி, ஓட்டுப்பதிவுக்கு 2 நாட்களுக்கு முன்பு பிரசாரத்தை முடித்துக்கொள்ள வேண்டும். அதன்படி, நாளை (திங்கட்கிழமை) மாலை 5 மணியுடன் தேர்தல் பிரசாரம் ஓய்கிறது.

அதன்பின் ஊர்வலமாக சென்றோ அல்லது பொதுக்கூட்டத்தில் பேசியோ பிரசாரம் செய்ய முடியாது. வீடு, வீடாக சென்று ஓட்டு கேட்கலாம்.

உச்சகட்ட பிரசாரம்

பிரசாரம் முடிவதற்கு 2 நாட்களே இருப்பதால், தமிழ்நாடு முழுவதும் உச்ச கட்ட அனல் பறக்கும் பிரசாரம் நடைபெற்று வருகிறது. அரசியல் கட்சி தலைவர்கள் சூறாவளி சுற்றுப்பயணம் செய்து ஆதரவு திரட்டி வருகிறார்கள்.

காங்கிரஸ் தலைவர் சோனியா காந்தி, பொதுச் செயலாளர் ராகுல் காந்தி ஆகியோர் ஏற்கனவே தமிழ்நாட்டில் பிரசாரம் செய்துள்ளனர்.

மன்மோகன்சிங்

பிரதமர் மன்மோகன்சிங், நேற்று மாலை கோவையில் பிரசாரம் செய்தார். கோவை கொடீசியா மைதானத்தில் நடைபெற்ற பொதுக்கூட்டத்தில் கலந்து கொண்ட அவர், தி.மு.க-காங்கிரஸ் கூட்டணியை ஆதரித்து பேசினார்.

கருணாநிதி

தமிழக முதல்-அமைச்சரும் தி.மு.க. தலைவருமான கருணாநிதி, கடந்த 23-ந் தேதி முதல் தமிழ்நாட்டின் முக்கிய நகரங்களுக்கு சென்று பிரசாரம் செய்து வருகிறார்.

நேற்று முன்தினம் சென்னை, திண்டிவனம், விழுப்புரத்தில் பிரசாரம் செய்த அவர், நேற்று கடலூர் மற்றும் புதுச்சேரியில் பிரசாரம் செய்துவிட்டு, இரவில் சிதம்பரத்தில் தங்கினார்.

திருவாரூரில் 2 நாள் பிரசாரம்

கடைசி இரண்டு நாட்களான இன்றும், நாளையும் அவர், தனது சொந்த தொகுதியான திருவாரூரில் தீவிர பிரசாரம் மேற்கொள்கிறார்.

துணை முதல்-அமைச்சர் மு.க.ஸ்டாலின், நேற்று விழுப்புரம் மாவட்டத்தில் பிரசாரம் செய்தார். இன்று தென் சென்னை பகுதியில் பிரசாரம் மேற்கொள்கிறார்.

ஜெயலலிதா

அ.தி.மு.க. பொதுச் செயலாளர் ஜெயலலிதா நேற்று தர்மபுரி, கிருஷ்ணகிரி மாவட்டங்களில் தேர்தல் பிரசாரம் செய்தார். இன்று தென் சென்னை பகுதியில் பிரசாரம் செய்கிறார்.

தே.மு.தி.க. தலைவர் விஜயகாந்த், அவர் போட்டியிடும் ரிஷிவந்தியம் தொகுதியில் பிரசாரம் மேற்கொண்டார். இன்றும் அதே தொகுதியில் பிரசாரம் செய்கிறார். தி.மு.க மற்றும் அ.தி.மு.க. கூட்டணி கட்சி தலைவர்களும் தீவிர பிரசாரத்தில் ஈடுபட்டு வருகிறார்கள்.

அத்வானி, நரேந்திரமோடி

பா.ஜனதா மூத்த தலைவர் அத்வானி இன்று மாலை திண்டுக்கல் மற்றும் கோவையில் நடைபெறும் தேர்தல் பிரசார பொதுக்கூட்டங்களில் பங்கேற்று பேசுகிறார்.

குஜராத் முதல்-மந்திரியும், பா.ஜனதா முக்கிய தலைவர்களில் ஒருவருமான நரேந்திரமோடி கிருஷ்ணகிரி மாவட்டம் தளி, ஓசூர் ஆகிய நகரங்களில் நடைபெறும் கூட்டங்களில் பேசுகிறார்.

இதற்கிடையில், களத்தில் உள்ள அனைத்து கட்சி வேட்பாளர்களும் தங்கள் தொகுதிகளில் இரவு-பகலாக சுற்றுப்பயணம் செய்து தீவிர வாக்கு சேகரிப்பில் ஈடுபட்டு வருகிறார்கள்.

தினதந்தி!

அப்பாடா... ஆரவாரம் ஓய்ந்திருக்கும்... இனி ராவோட ராவா பணம் பட்டுவாடா தொடங்கும்..