தலைவர்களின் திருமதிகள்....

எலெக்ஷன் ரேஸில் ஓடிக்கொண்டு இருக்கும் தலைவர்கள், பரபரப்புக்கு நடுவே தங்களை எப்படி ரீ-சார்ஜ் செய்துகொள்கிறார்கள்? இதோ 'தலைவர்களின் திருமதிகள்’ பேசுகிறார்கள்..





காந்தி அழகிரி
''பிரசாரத்தில் செலவிடுற ஒவ்வொரு நிமிஷமும் ஒரு ஓட்டுக்குச் சமம்னு சொல்வார். அதனால், ஒரு நிமிஷம்கூட ரெஸ்ட் எடுக்க மாட்டார். அவருக்கு ஒரே ஒரு சென்டிமென்ட்தான். அவர் பிரசாரத்துக்குக் கிளம்பும்போது நாங்க சிரிச்ச முகத்தோடு இருக்கணும். தலைவரோட அம்மா அஞ்சுகத்தம்மாள், அப்பா முத்துவேலர் படங்களுக்கு முன்னாடி நின்னு வணங்கிட்டு, படங்களுக்குக் கீழே இருக்கும் பூக்களில் ஒண்ணை எடுத்து சட்டைப் பாக்கெட்டில் வெச்சுக்குவார். 'நிச்சயம் உன் கணவர் அமைச்சர் ஆவார்’னு என் அப்பா காராளன் சொல்லி இருந்தார். அதனால, என் அப்பா மேல அவருக்குப் பெரிய மரியாதை உண்டு. அப்பா படத்துக்கு முன்னாடி மௌனமா சில நிமிஷங்கள் நிற்பார். அப்புறம் வீட்டைவிட்டு வெளியே கிளம்பிட்டார்னா, புலிப் பாய்ச்சல் தான்!''

சௌமியா அன்புமணி


''அவருக்கு நிம்மதியாத் தூங்கணும். அதனால அவருக்கு செட் ஆகுற தலையணை, போர்வையை காரில் அனுப்பிடுவேன். தொண்டர்கள் நேரம் காலம் பார்க்காம, அவருக்கு அசைவ உணவு கொடுத்திருவாங்க. அதனால, பூசணிக்கா, மிளகு, சீரகம் கலந்த மோரை அடிக்கடி குடிக்கக் கொடுப்பேன். அவர் சென்டிமென்ட் பார்க்க மாட்டார். ஆனாலும், நான் மனசு கேக்காம, அவரோட பெட்டியில் கோயில் குங்குமம், சாமி படம் வெச்சுடுவேன். அதைக் கண்டுக்கமாட்டார்!''

துர்கா ஸ்டாலின்


''காலையில் இட்லி, கார்ன் ஃப்ளேக்ஸ், ஏதாவது ஒரு பழச் சாறு. மதியம் சாம்பார், ரசம், கூட்டு. சாயங்காலம் ஹார்லிக்ஸ் அல்லது காம்ப்ளான் கொடுப்பேன். பிரசாரப் பயணங்களில் இதை அவர் சரியாக் கடைப்பிடிக்க மாட்டார். அதனால், இப்போ நானும் அவர்கூடக் கிளம்பிப் போக ஆரம்பிச்சிட்டேன். அரை மணி நேரத் துக்கு ஒரு தடவை தண்ணீர் பாட்டிலை அவர் கையில் திணிப்பேன். 'கைக்குழந்தை மாதிரி என்னை நீ பார்த்துக்குற’ன்னு அவர் கிண்டல் அடிப்பார்!''

பிரேமலதா விஜயகாந்த்


''பேச்சுதான் ஒவ்வொரு அரசியல்வாதிக்கும் மூலதனம். அதிமதுரம், இஞ்சி, பனங்கற்கண்டு, சீரகம் வகைகளை மொத்தமாக் கொதிக்கவெச்சு, வடிகட்டிக் குடிச் சோம்னா, எந்த மாதிரியான தொண்டை வலியும் சட்டுனு பறந்திரும். அவர் பிரசாரத்துக்குக் கிளம்பும்போது, அந்த கஷாயம் வெச்சுக் கொடுத்து அனுப்புவேன். வெயில் காலம்கிறதால, அசைவ உணவைத் தவிர்க்கச் சொல்லிட்டேன்!''

ஜெயந்தி தங்கபாலு


''எவ்வளவு வேலை இருந்தாலும் தவறாம யோகா பண்ணுவார். உடம்புக்கு முடியலைன்னு இதுவரைக்கும் ஒருநாள் கூட அவர் சொன்னது இல்லை. என்ன சமையல் பண்ணிக் கொடுத்தாலும், என்ன தேவையோ அதைத்தான் சாப்பிடுவார். பிரசாரத் துக்கு அலையும்போது, சன் ஸ்க்ரீன் லோஷன் போட்டுக்கச் சொல்வேன். ம்ஹூம்... கேட்க மாட்டார். அவரைக் கட்டுப்பாட்டுக்குள் கொண்டு வரவே முடியாது!''

ராதிகா சரத்குமார்


''டயட் விஷயத்தில் சரத் ரொம்ப சின்சியர். இருந்தாலும், பிரசாரத்துக்குக் கிளம்பும்போது தானியங்கள், உலர் பழங்கள் நிறைய வாங்கி, சின்னச் சின்னதா பேக் பண்ணிக் கொடுத்து விடுவேன். அடிக்கடி க்ரீன் டீ குடிப்பார். அடிக்கடி போன் பண்ணி, 'சாப்பிட்டீங்களா?’ன்னு விசாரிப்பேன். ஏன்னா, நேரத்துக்குச் சாப்பி டலைன்னா, அவருக்குத் தலைவலி வந்திரும்!''

மல்லிகா சைதை துரைசாமி


''பிரசார சமயங்களில் அவர் வெளியில் எங்கேயும் சாப்பிட மாட்டார். அதனால், ஜூஸ், வரகு அரிசி சாதம், பழங்களைக் கொடுத்து விடுவேன். கூடவே, அவருக்குப் பிடித்த சுக்கு மல்லி காபியும் கொடுத்துவிடுவேன்!''


நன்றி விகடன்

மனைவி உடையான் தேர்தலுக்கு அஞ்சான்