கிருஷ்ணாவாக சியான் விக்ரம்!

கிருஷ்ணாவாக சியான் விக்ரம்!

பாலாவின் சேதுவில் சியான், வினயனின் காசியில் பார்வையற்ற காசி, பிதாமகனில் சுடுகாட்டில் வளர்ந்த சித்தன், இதே வரிசையில் விக்ரமை ஒரு தேர்ந்த நடிகராக முன்நிறுத்த வந்திருகிறது மதராஸப்பட்டினம் விஜய் இயக்கத்தில் உருவாகியிருக்கும் தெய்வத்திருமகன். இந்தப் படத்தில் கிருஷ்ணா என்ற மனவளம் குன்றிய மாற்றுத்திறனாளியாக நடித்திருக்கிறார் விக்ரம். இந்தக் கேரக்டருக்காக சென்னையில் உள்ள வித்யாசாகர் என்ற மனவளம் குன்றிய பிள்ளைகள் படிக்கும் பள்ளிக்குச் சென்று, அவர்களது உடல்மொழி, பேசும்விதம், கண்கள், நாக்கின் அசைவுகள் ஆகியவற்றை தொடர்ந்து பத்து நாட்கள் உள்வாங்கிக் கொண்டு நடித்தாராம். அவர்கள் தூங்குவதைக் கூட அவர்களோடு தங்கி நோட்டம் விட்டாராம்.
நன்றி
TMT



இந்தப் படத்தை இரண்டு கட்டப் படப்பிடிப்புக்களாக மூன்றே மாதத்தில் எடுத்து முடித்திருக்கிறார்கள். வரும் ஏப்ரல் 14-ஆம் தேதி இசை வெளியீட்டை, மே 6-ஆம் தேதி பட வெளியீட்டையும் வைத்திருக்கிறார்கள்.

இதற்கிடையில் நேற்று படத்தின் டைட்டில் மற்றும் ஃபஸ்ட் லுக் புகைப்படங்களையும் பத்திரிகையாளர்களிடம் வெளியிட்டார்கள். அத்துடன் கிருஷ்ணா கதாபாத்திரத்தில் விக்ரம் நடித்திருந்த சில ஷாட்டுகளையும், ஒரு டீசர் டிரைலரையும் போட்டுக்காட்டினார்கள். இந்த நிகழ்ச்சியில் பேசிய பாடலாசிரியர் நா.முத்துகுமார் “விக்ரமுக்கு இந்தப் படத்துகாக மீண்டும் தேசிய விருது கிடைக்கும்” என்றார். இந்தப் படத்தின் பெரும்பகுதி ஊட்டியில் படம் பிடிக்கப்பட்டிருக்கிறது. அங்கு போடப்பட்ட சாக்லேட் தொழிற்சாலை செட் ஒன்றில் பாதிப்படத்தை எடுத்தார்களாம். இந்தச் சாக்லேட் தொழிற்சாலை படத்தின் முக்கிய கதைக்களம் என்கிறார் இயக்குனர். விக்ரமோடு, நாசர், எம்.எஸ்.பாஸ்கர், காதல் பாண்டி, சந்தானம், அனுஷ்கா, அமலாபால் ஆகியோர் நடித்திருக்கிறார்கள். படத்தை ஆஸ்கர் விருதுப் போட்டிக்கு எடுத்துச் செல்லும் எண்ணம் இருப்பதாகவும், அதற்கு இப்போதே திட்டமிட்டு வருவதாகவும் சொன்னார் இயக்குனர் விஜய்