முகத்தில் முகம் பார்க்கலாம்....

by மஞ்சுபாஷிணி Wed Apr 06, 2011 7:50 pm

முகத்தில் முகம் பார்க்கலாம்

ஒரு மனிதனின் ஆரோக்கியத்தை, அவன் முகத்தை வைத்தே அறிந்துகொள்ளலாம். இதனால்தான் நம் முன்னோர்கள் அகத்தின் அழகு முகத்தில் தெரியும் என்றார்கள். அகமான உடம்பின் உள்பகுதியில் ஏதேனும் பாதிப்பு இருப்பின் அது முகத்தில் உடனே தெரியவரும்.

உதாரணமாக மலச்சிக்கல், இருந்தால் கூட அது முகத்தில் பாதிப்பை உண்டாக்கிவிடும். இதனால் உடல் பாதிப்புகளால் உண்டான முகம் மற்றும் சரும பாதிப்புகளைப் போக்க இயற்கை மூலிகைகள்தான் சிறந்தவை. இவை பக்க விளைவுகள் இல்லாதவை. இரசாயனம் கலக்காதவை. இவற்றைப் பயன்படுத்தி எழிலான முகத்தையும், சருமத்தையும் பெறலாம்.

தேமல் மறைய

· முகம் மற்றும் உடலெங்கும் தேமல் பரவியிருப்பவர்கள் பூவரசங்காயை எலுமிச்சம் பழச்சாறு விட்டு அரைத்து தேமல் உள்ள பகுதியில் பூசிவந்தால் தேமல் மறைந்து முகம் மற்றும் சருமம் பொலிவுறும்.

· பூவரச மரத்தின் பழுப்பு (முற்றிய) இலைகளை எடுத்து காயவைத்து பொடியாக்கி அதை தேங்காய் எண்ணெயில் குழைத்து தேமல் மீது பூசினால் தேமல் விரைவில் மறையும்.

· நாயுருவி இலைச் சாற்றில் ஜாதிக்காயை உரைத்து தேமல் மற்றும் மங்கு உள்ள இடத்தில் தடவி வந்தால் தேமல் மறையும்.

· குமட்டிக் காயை இரண்டாக நறுக்கி தேமல் மேல் தேய்த்து வந்தால் தேமல் விரைவில் மறையும்.
· கற்றாழையை மேல் தோல் நீக்கி அதன் சோற்றை, தேமல் உள்ள பகுதிகளில் பூசி வந்தால் தேமல் மறையும்.

· பூவரசங் காயை உடைத்தால் அதில் மஞ்சள் நிறமான திரவம் வெளிவரும். இதனை படர்தாமரை, தேமல் மீது தடவினால் தேமல், படர்தாமரை குணமாகும்.

· சரக்கொன்றை வேரின் பட்டையை பசுவின் பால் விட்டு அரைத்து தேமல் உள்ள இடத்தில் தடவினால் நாள்பட்ட தேமல் மறையும்.

கண்களைச் சுற்றிய கருவளையம் மறைய தேங்காய் எண்ணெயில் மஞ்சள் தூளை சேர்த்து குழைத்து கண்களைச் சுற்றி பூசி 10 நிமிடங்கள் கழித்து கண்களை குளிர்ந்த நீரில் கழுவி வந்தால் கண்களைச் சுற்றிய கருவளையம் மறையும்.
முகம் பொலிவுற
பாதாம் எண்ணெயுடன் தேன் கலந்து நன்றாகக் குழைத்து முகத்தில் பூசி வந்தால் முகத்தில் உள்ள கரும்புள்ளிகள், அம்மை வடுக்கள், பருக்களால் தோன்றிய வடுக்கள் மறைந்து முகம் பிரகாசமாகும். இதனை புருவ முடிகளின் மீது படாதவாறு பார்த்துக்கொள்ள வேண்டும். ஆண்கள் பூசக்கூடாது.

வறண்ட சருமம் உள்ளவர்கள் பால் ஏட்டில் சிறு துளி எலுமிச்சை சாறு சேர்த்து குழைத்து படுக்கைக்குச் செல்லும் முன் முகத்தில் பூசி மறுநாள் காலை முகத்தை குளிர்ந்த நீரில் கழுவி வர வேண்டும். இவ்வாறு தொடர்ந்து சில நாட்கள் செய்து வந்தால் வறண்ட சருமம் பொலிவு பெறும்.
சில பெண்களுக்கு மேல் உதட்டில் மெலிதான பூனைமுடிகள் வளரும். இது அவர்களின் அழகையே கெடுக்கும். இதனை நீக்க, குப்பை மேனி இலை, வேப்பங் கொழுந்து, மஞ்சள், மூன்றையும் மை போல் நன்கு அரைத்து இரவு படுக்கைக்குச் செல்லும் முன் மேலுதட்டில் மற்றும் வேண்டாத ரோமம் உள்ள பகுதிகளில் பூசி வந்தால் சில நாட்களில் இவை தானாக உதிர்ந்துவிடும். இதனை தொடர்ந்து 1 வாரமாவது பூசி வரவேண்டும்.

சிலருக்கு இளவயதானாலும் முகம் சுருக்கத்துடன் வயதானத் தோற்றத்தை உண்டாக்கும்.

இவர்கள், சிறிது நல்லெண்ணெய் எடுத்து அதில் சிறு துளி நீர் விட்டு நன்றாகக் குழைத்தால் அது வெண்ணெய் போல் குழகுழப்பாக மாறும். அதனை முகத்தில் மீது நன்றாக மசாஜ் செய்வதுபோல் பூசி சிறிது நேரம் கழித்து வெதுவெதுப்பான நீரில் முகம் கழுவி வரவேண்டும். இவ்வாறு அடிக்கடி செய்துவந்தால் முகச்சுருக்கம் நீங்கி முகம் பொலிவுபெறும்.

பாதாம் பருப்பை பாலில் ஊறவைத்து அரைத்து இரவு படுக்கைக்குச் செல்லும் முன் முகத்தில் பூசி காய்ந்தவுடன் முகத்தை கழுவினால் முகம் பொலிவுபெறும்.

வெள்ளரிக்காய் - 2 துண்டு

கற்றாழை - 2 துண்டு

பாதாம் பருப்பு - 2

இவற்றை எடுத்து ஒன்றாகச் சேர்த்து நன்றாக அரைத்து குழைத்து முகத்தில் பூசி அரை மணி நேரம் ஊறவைத்து இளம் சூடான நீரில் கழுவி வந்தால் முகம் பட்டுபோல் பளிச்சிடும்.

நன்றி நக்கீரன்