பாட்டி வைத்தியம் - புள்ளதாச்சி பொண்ணு வாந்தி எடுத்தா...

பாட்டி வைத்தியம் - புள்ளதாச்சி பொண்ணு வாந்தி எடுத்தா...

மாரியம்மன் கோவில் திருவிழா நெருங்குவதால் பாட்டிக்கு நின்று பேச நேரமில்லை.

ஊரில் இருந்து பிள்ளைகளும், உறவுக்காரர்களும் வீட்டுக்கு வந்து குவியப்போகிறார்கள். ஒரு வாரம் முழுக்க வீட்டில் ஆடும், கோழியும்தான். மாரியம்மனுக்கு கிடாய் வெட்டி பொங்கல் வைத்து கும்பிடும் இந்த திருவிழா அந்த ஊருக்கே முக்கியமானது.

வான வேடிக்கை, கரகாட்டம், ஒயிலாட்டம், கூத்து, கும்மி என ஊரே களைகட்டும்

பாட்டியைப் பிடிக்க முடியுமா?

போன மாச சந்தைக்கே ஆள் அனுப்பி 9 ஆடுகளை வாங்கி வந்து வீட்டில் கட்டிவிட்டாள் அரைத்த மிளகாய் மணக்க மணக்க பாட்டி வீட்டுக் கறிக்குழம்பு ஊரையே தூக்கிவிடும். அதற்கான ஆயத்த வேலைகளில் மும்முரமாக இறங்கி இருந்தாள் பாட்டி.

வாசலில் நிழலாடுவதைப் பார்த்து, விருந்தினர்கள் முன்கூட்டியே வந்துவிட்டார்களோ என்று பரபரத்துவிட்டாள். நல்ல வேளை விருந்தினர்கள் இல்லை. அடுத்தத் தெருவைச் சேர்ந்த அம்புஜம் அவள் மகள் அமுதாவும் வந்திருந்தார்கள்.

வாங்கடி அம்மா.. என தாயும் புள்ளையும் சத்தமில்லாமல் வந்து நிக்கிறீங்க... நான் வேற விருந்துக்காரங்கதான் வந்துட்டாங்களோன்னு பாத்தேன்..

பாட்டியின் பதற்றத்தைப் பார்த்து மனதுக்குள் ரசித்த படியே வந்து அமர்ந்த அம்புஜம், ஏன் வெளியூர்ல இருந்து வந்தாத்தான் விருந்து போடுவியளாக்கும். எங்களுக்கெல்லாம் போட மாட்டியளா.. என்றாள் கேலி பொங்கஏண்டியம்மா இல்ல.. ஒனக்கில்லாத விருந்தா... அணையாத அடுப்பு எரிஞ்சிக் கிட்டு இருக்கிற இந்த வீட்டுல எப்பவும் விருந்துதான்.. அதுக்கென்ன.. இருந்து நல்லா சாப்பிட்டுப்போ.. என்று தாராளமாக உபசரித்தாள் பாட்டி.

அப்படியே அம்புஜத்தோடு வந்திருந்த அவள் மகள் அமுதாவையும் நோட்டம் விட்டாள்.

என்னடி ஒம் பொண்ணு ஒரு மாதிரி கொலைஞ்ச கத்திரிக்கா மாதிரி வாட்டமா தெரியிறா.. உனக்கு பேரனோ, பேத்தியோ பெத்துக்கொடுக்க தயாராயிட்டா போலருக்கே...

பாட்டியின் பழுத்த அனுபவத்தைப் பார்த்து பிரம்மித்த அம்புஜம், நீ நெனைக்கிறது சரிதான் பாட்டி.. அவ முழுகாமதான் இருக்கா.. இது மூணாம் மாசம்..

அம்புஜம் சொன்னதைக் கேட்ட பாட்டி அமுதாவின் கைகளைப் பிடித்துப் பார்த்தாள்.

எல்லாம் நல்லபடியா இருக்கும்டி அம்மா.. பயப்பட வேண்டாம். நல்ல ஆகாரமா கொடுத்துக்கிட்டு வா.. என்றாள்,

எங்கே கொடுக்கிறது.. எதை யெடுத்தாலும் வாந்தி வருதுங்குறா.. எதையும் சாப்பிட மாட்டேங்கிறா.. எத கிட்ட கொண்டுபோனாலும் குமட்டுதுங்குறா.. என்ன செய்யிறதுன்னே தெரியல பாட்டி..

அம்புஜத்தின் கவலை தோய்ந்த வார்த்தைகளைக் கேட்ட பாட்டி, புறங்கையை வீசியபடி அடி போடி வேலையத்தவளே.. மசக்கை யின்னா அப்பிடி இப்பிடித்தான் இருக்கும்.. நாமதான் அதுக்கு ஏதாச்சும் பிடிச்சதா பண்ணி சாப்பிடச் சொல்லணும்..

ஒண்ணும் வேணாம்.. நெல்லுப்பொரி இருக்குல்ல அதைக் கஞ்சியா காச்சி கொடுத்தா குமட்டாது. வாந்தியும் நிக்கும். நல்லா பசி எடுக்கும். அத மட்டும் தொடர்ச்சியா குடுத்துக்கிட்டு வா எல்லாம் சரியாப் போகும்.

பாட்டி சொன்ன எளிய மருத்துவம் அம்புஜத்துக்கு அளவற்ற மகிழ்ச்சியைக் கொடுத்தது. அவளுக்கு நன்றி சொல்லிவிட்டு மகளை அழைத்துக்கொண்டு வீட்டுக்குப் புறப்பட்டாள்.

நன்றி நக்கீரன்