பாகிஸ்தானில் கல்லறையில் இருந்து பிணத்தை தோண்டி எடுத்து தின்ற 3 பேர் கைது

**சிவா** · **சிவா** Tue Apr 05, 2011 4:29 pm

பாகிஸ்தானில் பஞ்சாப் மாநிலத்தில் உள்ள முல்தான் நகர் அருகே உள்ள ககாவார் கலான் கிராமத்தை சேர்ந்தவர் சைரா பர்வீன். 24 வயது பெண். இவர் கடந்த சனிக்கிழமை இறந்துபோனார். அவர் உடல் அடக்கம் செய்யப்பட்டது. அதன் பிறகு கல்லறையில் இருந்த அவர் உடலை காணவில்லை. இதனால் அவர் குடும்பத்தினர் போலீசில் புகார் செய்தனர். போலீசார் நடத்திய விசாரணையில் அடக்கம் செய்யப்பட்ட மறுநாளே அவரது சகோதரர் ஆரிப் கல்லறைக்கு சென்று அதை தோண்டி உடலை வெளியே எடுத்து கொண்டு சென்று விட்டார் என்பது தெரியவந்தது.

போலீசார் ஆரிப் வீட்டுக்கு சென்று பார்த்தபோது, அங்கு அவரும், அவரது சித்தியும், தங்கையும் இருந்தனர். வீட்டில் ஒரு அறை மட்டும் பூட்டப்பட்டு கிடந்தது.

அந்த அறையை போலீசார் திறந்து பார்த்த போது, அவரது உடலில் இருந்து காலும் பாதமும் வெட்டி எடுக்கப்பட்டு இருந்தது. இன்னொரு அறையில் உடல் பாகங்கள் அடுப்பில் ஏற்றப்பட்ட பாத்திரத்தில் வெந்து கொண்டு இருந்தது. அவர்கள் மனிதக்கறியை சமைத்து சாப்பிடுவது கண்டு பிடிக்கப்பட்டது. இதை தொடர்ந்து அந்த 3 பேரையும் போலீசார் கைது செய்தனர்.

ஆரிப் போலீசாரிடம் கூறுகையில், என் சகோதரன் இர்பான் தான் மனிதக் கறியை தின்னும் பழக்கத்தை ஏற்படுத்தினான். இதற்கு முன்பு ஒரு சிறுமியின் உடலை கறியாக சமைத்து சாப்பிட்டு இருக்கிறோம். நாய்க்கறியையும் சமைத்து சாப்பிட்டு இருக்கிறோம் என்று தெரிவித்தான். இர்பானையும் போலீசார் தேடிவருகிறார்கள்.