சிறிலங்காவுக்கு மேலாக உருவாகி வரும் ‘புயல்மேகங்கள்‘ - கொழும்பு வாரஇதழ்

[ திங்கட்கிழமை, 04 ஏப்ரல் 2011, 03:39 GMT ] [ கார்வண்ணன் ]
போருக்கு முந்திய மற்றும் பிந்திய விவகாரங்களால் சிறிலங்காவுக்கு மேலாக புயல் மேகங்கள் உருவாகி வருகின்றன என்று கொழும்பு ஆங்கில வாரஇதழ் ஒன்று கூறியுள்ளது.

சண்டே ரைம்ஸ் வாரஇதழின் அரசியல் விவகாரப் பத்தியில் இதுதொடர்பாக கூறப்பட்டுள்ள விடயங்களின் தொகுப்பு இது-

சிறிலங்காவில் இடம்பெற்ற போர்க்குற்றங்கள் தொடர்பாக ஆலோசனை வழங்குவதற்காக நியமிக்கப்பட்ட நிபுணர்கள் குழு தமது அறிக்கையை ஐ.நா பொதுச்செயலரிடம் கையளிக்க முன்னரே, வெளிநாடுகளில் உள்ள பல்வேறு தமிழ் குழுக்கள் இந்த விவகாரத்தை உயர்த்திப் பிடிக்கத் தொடங்கியுள்ளன.

இந்தோனேசியாவின் முன்னாள் சட்டமா அதிபர் மர்சுகி தருஸ்மன் தலைமையிலான இந்த நிபுணர்கள் குழுவின் அதிகாரபூர்வ பணிக்காலம் கடந்த வியாழக்கிழமையுடன் (மார்ச் 31) முடிவடைந்துள்ளது.

நிபுணர்கள் குழுவின் அறிக்கை, முன்னரே எதிர்பார்க்கப்பட்ட போதும் அதன் கையளிப்பு நடைபெறவில்லை.

இந்த அறிக்கை எதிர்வரும் ஏப்ரல் 13ம் திகதிக்கும் 15ம் திகதிக்கும் இடையில் எந்த நேரத்திலும் கையளிக்கப்படலாம்.

ஐ.நா நிபுணர்கள் குழு இந்த அறிக்கையை கையளிப்பதற்கு நேரத்தை ஒதுக்கித் தருமாறு ஐ.நா பொதுச்செயலர் பான் கீ மூனிடம் கேட்டுள்ளது.

ஆனால் லிபியா, சிரியா, மற்றும் மத்திய கிழக்கு நாடுகளின் விவகாரங்களால், அவரது நிகழ்ச்சி நிரல் இறுக்கமாக உள்ளது.

அதேவேளை, நிபுணர்கள் குழுவின் அறிக்கையை பகிரங்கப்படுத்த முன்னர் அதன் பிரதி ஒன்றைத் தமக்குத் தருமாறு சிறிலங்கா அரசாங்கம் ஐ.நா பொதுச்செயலரிடம் கோரியிருந்தது.

ஆனால அந்தக் கோரிக்கையை பான் கீ மூன் கவனத்தில் எடுக்கவில்லை என்றே அறிய முடிகிறது.

இந்த அறிக்கையைப் பெற்ற பின்னர் அடுத்து என்ன செய்வதென்று அவரே முடிவு செய்யவுள்ளார்.

அதேவேளை இந்த அறிக்கை மீதான நடவடிக்கையை பான் கீ மூன் ஆரம்பிக்கும் வரை அது இரகசியமாகவே வைக்கப்படும் என்று தெரிவித்துள்ள இராஜதந்திர வட்டாரங்கள், ஜெனிவாவில் எதிர்வரும் ஜுன் மாதம் நடைபெறவுள்ள ஐ.நா மனிதஉரிமைகள் பேரவையின் கூட்டத்தில் இந்த அறிக்கையை சமர்ப்பிப்பதற்கான வாய்ப்புகள் இருப்பதை நிராகரிக்கவில்லை.

ஐ.நா பொதுச்செயலர் எந்த நடவடிக்கையை எடுப்பதற்கும் ஐ.நா மனித உரிமைகள் பேரவையில் இருந்தே ஆரம்பிக்க வேண்டும்.

பின்னர் பாதுகாப்புச் சபைக்கும் இது கொண்டு செல்லப்படலாம்.

இதற்கிடையில் அமெரிக்காவின் தெற்கு,மத்திய ஆசியப் பிரிவுகளுக்கான உதவி இராஜாங்கச் செயலர் றொபேட் ஓ பிளேக்கை வொசிங்டனில் உள்ள அவரது பணியகத்தில் தமிழ்க் குழுக்களின் பிரதிநிதிகள் சந்தித்துள்ளனர்.

இந்தச் சந்திப்பு 75 நிமிடங்கள் வரை நீடித்துள்ளது.

இந்தச் சந்திப்பின் போது. சிறிலங்காவில் தற்போது நடைமுறையில் உள்ள அவசரகாலச்சட்டம், இங்கு தமிழர்கள் எதிர்கொள்ளும் பிரச்சினைகள் குறித்து றொபேட் ஓ பிளேக்கிடம் எடுத்து விளக்கப்பட்டதாக அறிய முடிகிறது.

இராணுவ நடவடிக்கைகளின் போதும் அதற்குப் பின்னரும் இடம்பெற்ற பல சம்பவங்களை உள்ளடக்கிய விபரமான அறிக்கை ஒன்றையும் அவர்கள் பிளேக்கிடம் கையளித்துள்ளனர்.

இந்தநிலையில், மகிந்த ராஜபக்ச அரசாங்கத்துக்கு வழங்குவதற்கான ஒபாமா நிர்வாகத்தின் “கடுமையான செய்தி“ யுடன் பிளேக் சிறிலங்கா வரவுள்ளதாக அறியப்படுகிறது.

சிறிலங்கா அரசுக்கு “அவசரமானதும் முக்கியமானதுமான விடயங்கள்“ குறித்து அழுத்தம் கொடுக்கும் வகையில் இந்தமாதம் அங்கு பயணம் மேற்கொள்ளவிருப்பதாக உலகத் தமிழர் பேரவைப் பிரதிகளுடனான சந்திப்பின் போது பிளேக் தெரிவித்துள்ளார்.

நியுயோர்க்கில் ஆசிய சமூகத்தில் சிறிலங்கா தொடர்பாக கடுமையான உரை ஒன்றை றொபேட் ஓ பிளேக் நிகழ்த்திய இரண்டு வாரங்களில் இந்தச் சந்திப்பு இடம்பெற்றுள்ளது என்றும் அந்த வாரஇதழ் மேலும் கூறியுள்ளது.