தி.மு.க.,வினர் ஆட்டம் காட்டுவதால் உளவுப்பிரிவு போலீஸ் உதவியை நாடிய காயத்ரிதேவி

மதுராந்தகம் தனித்தொகுதியாக அறிவிக்கப்பட்டதால், சிட்டிங் எம்.எல்.ஏ.,வான டாக்டர் காயத்ரிதேவி, இம்முறை ஆலந்தூர் தொகுதியில் வேட்பாளராக நிறுத்தப்பட்டுள்ளார். இதனால், ஆலந்தூர் நகர காங்கிரஸ் நிர்வாகிகள் அதிருப்தியடைந்தனர். எதிரிக்கு எதிரி நண்பன் என்பது போல், ஜெயந்தி நடராஜன் ஆதரவாளரான வேட்பாளர் டாக்டர் காயத்ரிதேவியும், மத்திய அமைச்சர் ஜி.கே.வாசனின் ஆதரவாளர்களும் ராசியாகிவிட்டனர்.
வேட்பாளருக்கு ஆதரவு தர மறுக்கும் ஆலந்தூர் நகர காங்., பொறுப்பாளர் நாஞ்சில் பிரசாத் மற்றும் இளைஞர் காங்கிரஸ் தலைவி சுதா பிரசாத்தால் தி.மு.க., கோஷ்டிகள் குஷியடைந்துள்ளன. இதை தங்களுக்கு சாதகமாக்கிக் கொண்ட தி.மு.க., கோஷ்டிகள், வேட்பாளரை சந்தோஷப்படுத்தும் வகையில், ஆலந்தூர் தொகுதியில் காங்கிரஸ் வெற்றி பெறுவது உறுதி என்று ஆளாளுக்கு முகஸ்துதி பாடிவருகின்றனர். இதில், டாக்டர் காயத்ரிதேவி மயங்கிவிட்டதாக கூறப்படுகிறது.
அதேநேரத்தில், தி.மு.க., மற்றும் காங்கிரஸ் நிர்வாகிகளை நேரில் சந்தித்து ஆதரவு திரட்டும்படி வேட்பாளருக்கு கோஷ்டிகள் அறிவுறுத்தி வருகின்றன. வேட்புமனு தாக்கலில் துவங்கி, நேற்று வரை ஒவ்வொரு பகுதியாக சென்று, நிர்வாகிகளை சந்திக்கும் படலம் மட்டும் தொடர்ந்து கொண்டிருக்கிறது. கிடைக்கும் நேரத்தில் கூட தேர்தல் பிரசாரத்தை வேட்பாளரை துவக்க விடாமல், தி.மு.க., கோஷ்டிகள் அலைக்கழித்து வருகின்றன. தி.மு.க., கோஷ்டிகள் கொடுக்கும் நாட்களில் மட்டுமே தேர்தல் பிரசாரத்திற்கு வரும்படி வேட்பாளரை கட்டாயப்படுத்துகின்றன.
ஏனெனில் வேட்பாளர் பிரசாரம் செய்தால், அந்தந்த பகுதி நிர்வாகிகள் இல்லாமல் பிரசாரம் செய்யக் கூடாதாம். அப்படி இல்லாமல் தேர்தல் பிரசாரத்தை வேட்பாளர் துவக்கினால் நிர்வாகிகளை மதிக்கவில்லை என்ற பழி வேறு. இதனால், நேரம் கிடைத்தும் பிரசாரம் செய்ய முடியாமல் வேட்பாளர் திண்டாடி வருகிறார். இதையெல்லாம் பார்த்து கொண்டிருந்தால், ஆலந்தூர் தொகுதியில் வெற்றி பெறுவது மிகவும் கடினம் என்பதை உணர்ந்த வேட்பாளர் தரப்பில், புதிய டெக்னிக்கை பயன்படுத்த திட்டமிட்டுள்ளனர்.
ஓய்வு பெற்ற உளவுப் பிரிவு போலீசாரை நியமித்து, அவர்களுக்கு ஒரு அசைன்மென்ட் கொடுத்துள்ளனர். ஆலந்தூர் தொகுதியில் உள்ள குறைகள் என்ன? எந்தெந்த பிரச்னைகள் குறித்து தேர்தல் பிரசாரத்தில் பேசுவது; கோஷ்டிகளை எப்படி சரிக்கட்டுவது; ஆலந்தூர் தொகுதியில் காங்கிரஸ் வெற்றி பெறுவது எப்படி என்பது போன்ற வியூகங்கள் வகுக்கும்படி அறிவுறுத்தப்பட்டுள்ளனர். அவர்கள் கொடுக்கும் டிப்ஸ்களை வைத்து, குறைந்த நாட்களில் தேர்தல் பிரசாரத்தை முடித்து, அனைத்து கோஷ்டிகளையும் சமாதானப்படுத்தி வெற்றிக்கனியை பறிக்க காங்கிரஸ் முழு முயற்சியில் ஈடுபட்டு வருகிறது.


தினமலர்.