விசித்திர கூட்டணிக்கு மக்கள் ஆதரவு கிடைக்காது: ஸ்டாலின்

கொளத்தூர் : ""அரசியலில் வில்லன் ஆன திரைப்பட கதாநாயகன்,தேர்தல் வந்தால் மட்டுமே தமிழக மக்களை நினைக்கும் அம்மையார் ஆகியோர் இணைந்திருக்கும் விசித்திரமான கூட்டணிக்கு, மக்கள் ஆதரவு கிடைக்காது,'' என, ஸ்டாலின் பேசினார். கொளத்தூர் தொகுதியில், தி.மு.க., சார்பில் போட்டியிடும் ஸ்டாலின் நேற்று காலை, கொளத்தூர் அண்ணா சிலை அருகே தேர்தல் பிரசாரத்தை துவக்கினார். அவருடன் அவரது மனைவி துர்கா, சென்னை மேயர் சுப்ரமணியன் மற்றும் கூட்டணி கட்சி நிர்வாகிகள் உட்பட ஏராளமானோர் கலந்து கொண்டனர்.
ரெட்டை ஏரி சந்திப்பில் கேரள பாரம்பரிய இசையான செண்டை மேளம் முழங்க, பட்டாசுகள் வெடித்து வரவேற்பு அளிக்கப்பட்டது. கொளத்தூரை ஒட்டிய ரெட்டை ஏரி சந்திப்பில், மாதவரம் தொகுதி வேட்பாளர் டாக்டர் கனிமொழியை ஆதரித்து, ஸ்டாலின் பிரசாரம் செய்தார்.
அப்போது, அவர் பேசியதாவது: உங்களை நாடி வந்திருக்கும் எனக்கும், ஐக்கிய முற்போக்கு கூட்டணிக்கும் நீங்கள் உற்சாகமான வரவேற்பு கொடுத்திருப்பது மகிழ்ச்சி அளிக்கிறது. தொண்டர்கள் பலர் அவரை மறைத்தபடி கட்சிக் கொடிகளை தூக்கி பிடித்திருந்தனர். அப்போது, தோழமை கட்சித் தோழர்கள் கொடிகளை கொஞ்சம் கீழே இறக்கிப் பிடித்தால் நன்றாக இருக்கும். நான் எவ்வளவு அமைதியாக சொல்கிறேன் கவனித்தீர்களா! (விஜயகாந்த் பிரசாரத்தில் அ.தி.மு.க., கொடியை இறக்க சொன்னதை நினைவு கூர்ந்து தொண்டர்களிடம் சிரிப்பு).
நானும் தலைவரும் தேர்தலுக்காக மட்டும் உங்களைத் தேடி வருவதில்லை. எந்த சூழ்நிலையிலும், எந்த காலத்திலும் தமிழக மக்களைத் தேடி வருகிறோம், நாடி வருகிறோம். இந்த மாதவரம் தொகுதியில் சகோதரி டாக்டர் கனிமொழியும், பக்கத்தில் உள்ள கொளத்தூர் தொகுதியில் இந்த அடியேனும் தி.மு.க.,வின் அங்கீகாரம் பெற்ற வேட்பாளர்களாக போட்டியிடுகிறோம்.
அடிக்கடி கோடநாட்டிற்கு சென்று விடும் அந்த அம்மையாருக்கு, தேர்தல் வந்தால் தான், தமிழக மக்களின் நினைவு வரும். இப்படிப்பட்டவர்களை மக்கள் நம்பினால் என்னாவது; தி.மு.க., வின் தேர்தல் அறிக்கையை படித்திருப்பீர்கள். அவை அனைத்தும் நிறைவேற்றப்படும். தலைவரின் வாக்குறுதி நம்பிக்கையானது. வாக்குறுதிகள் நிறைவேற நீங்கள் ஒருமித்த கருத்தோடு தி.மு.க.,வை வெற்றி பெறச் செய்ய வேண்டும். இவ்வாறு ஸ்டாலின் பேசினார்.
முன்னதாக கொளத்தூரில், காலை 7.40 மணிக்கு பிரசாரத்தை துவக்கிய ஸ்டாலின் பூம்புகார் நகர், தென் பழனி நகர், வீனஸ் நகர், கொளத்தூர் ரெட்டை ஏரி சந்திப்பு பகுதிகளில் தேர்தல் பணிமனைகளை திறந்து வைத்தார். தொடர்ந்து, கொளத்தூர் வேலவன் நகர், நேர்மை நகர், திருப்பதி நகர், மகாத்மா நகர், அம்பேத்கர் நகர் உள்ளிட்ட பல பகுதிகளில் பகல் வரை தீவிர தேர்தல் பிரசாரத்தில் ஈடுபட்டார்.
கட்சித் தொண்டர்களின் விருப்பத்திற்கிணங்க ரெட்டை ஏரி சந்திப்பில் ஆண் குழந்தைக்கு செங்குட்டுவன் என்றும், வீனஸ் நகரில் பெண் குழந்தைக்கு கண்மணி என்றும் பெயர் வைத்தார். பின்னர், முற்பகல் 11.30 மணிக்கு பிரசாரத்தை முடித்துக் கொண்டு திருச்சிக்கு புறப்பட்டார்.



தினமலர்.