தே.மு.தி.க.வை தனித்து போட்டியிட வைக்க கருணாநிதி திட்டமிட்டார்; விஜயகாந்த் குற்றச்சாட்டு

ஈரோடு, ஏப். 1-

தே.மு.தி.க. தலைவர் விஜயகாந்த் ஈரோடு கிழக்கு தொகுதியில் பிரச்சாரம் செய்தார். அப்போது அவர் கூறியதாவது:-

தமிழக முதல்-அமைச்சர் கருணாநிதிக்கு விலைவாசி உயர்வு, பெட்ரோல், டீசல் விலை உயர்வு ஆகியவை எல்லாம் பிரச்சனையாக தெரியவில்லை. இப்போதைக்கு ஸ்பெக்ட்ரம் ஊழல் வழக்குதான் பிரச்சனை. கருணாநிதிக்கு மக்கள் மீது அக்கறை இல்லை. இந்த சட்டமன்ற தேர்தலில் தே.மு.தி.க. தனித்து நிற்க வேண்டும். மீண்டும் தி.மு.க. ஆட்சி அமைக்க வேண்டும் என எத்தனையோ வேலைகளை செய்தார். அதற்காக உளவுத்துறையையும் பயன்படுத்தினார்.

கோவையில் கருணாநிதி பேசியபோது மீண்டும் முதல்வரானால் பால் கொள்முதலுக்கு மானியம் வழங்குவேன் என்று கூறியுள்ளார். 5 முறை முதல்வராக இருந்த கருணாநிதிக்கு இதை செய்ய முடியவில்லையா?. ஈரோட்டில் கடந்த 5 ஆண்டுகளுக்கு முன்பு அத்திக் கடவு-அவினாசி திட்டத்தை நிறைவேற்றுவேன் என வாக்குறுதி அளித்தார்.

திருப்பூர் சாயப்பட்டறை பிரச்சனை கருணாநிதி தன் கனவிலும் நனவிலும் உறுத்திக் கொண்டு இருக்கிறது என்றார். ஆனால் அந்த தொழிலை நம்பி இருக்கும் மக்களுக்கு என்ன செய்தார்? தற்போது ஏழைகளுக்கு இலவசம் தொடரும் என்று கூறியுள்ளார். மக்களே உங்களிடம் நான் ஒன்று சொல்கிறேன். கருணாநிதி ஆட்சி திரும்பவும் வராமல் இருப்பதற்கு எந்த தியாகமும் செய்வேன்.

ஈரோடு கிழக்கு தொகுதியில் போட்டியிடும் முத்துச்சாமி பற்றி எனக்கு நன்றாக தெரியும். 5 நிமிடத்திற்கு ஒரு முறை புத்தி மாறக்கூடியவர். வீண் கவுரவத்திற்கு மக்கள் ஓட்டு போட மாட்டாரர்கள். எம்.ஜி.ஆர். போட்ட பிச்சையில் வந்தவர் முத்துச்சாமி. எம்.ஜி.ஆர்.அவரை அறிமுகப்படுத்தினார். அ.தி.மு.க. வில் பணம் சம்பாதித்து விட்டு தற்போது தி.மு.க.வில் சேர்ந்து விட்டார். எம்.ஜி.ஆருக்கு துரோகம் செய்து விட்டார். எனவே சந்திரகுமாருக்கு வாக்களியுங்கள். அ.தி.மு.க. கூட்டணியை வெற்றிபெற செய்யுங்கள்.

இவ்வாறு அவர் கூறினார்.

நாமக்கல் மாவட்டத்தில் விஜயகாந்த் பேசியதாவது:-

விஜயகாந்துக்கு கோபம் வந்துவிட்டது. எனவே அடித்துவிட்டார் என சில தொலைக்காட்சிகளில் ஒளிபரப்பி வருகிறார்கள். நான் எனது உதவியாளரை அடித்தால் உங்களுக்கு என்ன? எனது மானசீக குருவான எம்.ஜி.ஆரே “ஒரு தவறு செய்தால் அவன் தேவன் என்றாலும் விடமாட்டேன்” என்று கூறியுள்ளார். அந்த வகையில் எங்கு தவறு நடந்தாலும் அங்கு நான் தோன்றுவேன். அதே வகையில் தான் எம்.ஜி.ஆர். கட்சியுடன் கூட்டணி வைத்துள்ளேன்.

இந்த கூட்டணி அமைவதற்கு முன் விஜயகாந்த் அத்தனை கோடி வாங்கி விட்டார், இத்தனை கோடி வாங்கிவிட்டார் என என்ன வெல்லாமோ புரளியை கிளப்பிவிட்டனர். நான் இப்படியே ஓடிவிட மாட்டேன். மீண்டும் வருவேன். உங்களிடம் என்ன குறைகள் உள்ளது என கேட்பேன். எனவே இந்த தேர்தலில் புதிய நபர்களுக்கு ஒரு வாய்ப்பு கொடுங்கள் என கேட்கிறேன்.

இவ்வாறு விஜயகாந்த் பேசினார்.




மாலை மலர்.