மனித உறவுகளை செம்மையாக அமைத்துக் கொள்ள சிறந்த வழி!

by **சிவா** Thu Mar 31, 2011 9:53 pm

இந்தியாவின் பிரதமராக ஜவஹர்லால் நேரு இருந்த காலகட்டம். அப்போதைய அமெரிக்காவின் ஜனாதிபதியாக ஐசன்ஹோவர் இருந்தார். அவர் ஒருமுறை இந்தியாவுக்கு விஜயம் செய்தார்.

இந்தியா வருவதற்கு சில நாட்களுக்கு முன்னர், ஒருநாள் இரவு முழுவதும் தூங்காமல் கண்விழித்து புத்தகம் ஒன்றை படித்துக் கொண்டிருந்தார் ஐசன். அதைப் பார்த்த அவருடைய மனைவி, "அப்படி என்ன புத்தகத்தை இவ்வளவு நேரம் கண்விழித்துப் படித்துக் கொண்டிருக்கிறீர்கள்?'' என்று கேட்டார்.

"அடுத்த வாரம் இந்தியாவுக்குச் செல்கிறோம். எனவே, இந்தியப் பிரதமர் நேருவைப் பற்றியும், அவருடைய நாட்டைப் பற்றியும் நன்கு தெரிந்து கொள்ள வேண்டும். அதனால் நேரு எழுதிய `டிஸ்கவரி ஆப் இந்தியா' என்ற நூலை படித்துக் கொண்டிருக்கிறேன். சரியான தகவல்கள் தெரிந்திருந்தால் தான் பேச்சுவார்த்தை நடத்த சுலபமாக இருக்கும்'' என்றார் ஐசன்.

எந்த ஒருவரைச் சந்திக்கும் முன்னர், அவரைப் பற்றியும், அவர்களுடைய பின்னணி மற்றும் கருத்துகள் பற்றியும் தெரிந்திருப்பது அவசியம். அப்போது தான் அவருடன் நெருக்கத்தை ஏற்படுத்திக்கொள்ள முடியும். ஜனாதிபதியாக இருந்தாலும், இன்னொரு நாட்டு பிரதமரைச் சந்திக்கும்போது அவர் எழுதிய புத்தகத்தைப் படித்து, அவரை நன்கு புரிந்து கொள்ள வேண்டும் என நினைத்திருக்கிறார். நாமும் மனித உறவுகளை செம்மையாக அமைத்துக்கொள்ள விரும்பினால், நம்முடன் பழகுபவர்களைப் பற்றிய தகவல்களை முன்கூட்டியே தெரிந்து கொள்வது நன்மை.