நடிகர் ஜே.கே. ரித்தீஷ் மதுரை சிறையில் அடைப்பு

by **சிவா** Tue Mar 29, 2011 11:25 pm

ராமநாதபுரம் மாவட்டம் ஆர்.எஸ்.மங்கலம் யூனியன் பிச்சங்குறிச்சி ஊராட்சிக்கு உட்பட்ட களவான்குடி பகுதியில் கடந்த 5 வருடங்களாக சாலை வசதி இல்லை.

இந்த சாலையை சீரமைக்க டெண்டர் விடப்படாமல் இருந்தது. நேற்று பிச்சங்குறிச்சி விலக்கில் இருந்து களவான் குடி வரை சாலையை சீரமைக்கும் பணியில் ஜே.சி.பி. எந்திரம் மூலம் காண்டிராக்டர் ஈடுபட்டிருந்தார்.

இதுபற்றி தகவல் அறிந்ததும் அ.தி.மு.க. ஒன்றிய செயலாளர் ஆனந்த், தே.மு. தி.க. ஒன்றிய செயலாளர் கணேசன் மற்றும் அ.தி.மு.க., தே.மு.தி.க. நிர்வாகிகள் அங்கு திரண்டு வந்தனர். அவர்கள் சாலை அமைக்கும் பணியை தடுத்து நிறுத்தினர்.

அப்போது தி.மு.க. ஒன்றிய துணைச் செயலாளர் அழகேசன், ஒன்றிய செயலாளர் நல்ல சேதுபதி மற்றும் தி.மு.க. நிர்வாகிகள் அங்கு வந்தனர். அவர்களுக்கு இடையே வாக்குவாதம் ஏற்பட்டு மோதல் ஏற்பட்டது. ஒருவரையொருவர் கல்லால் தாக்கிக் கொண்டனர்.

இந்த மோதல் பற்றி தகவல் அறிந்ததும் திருப்பாலைக்குடி போலீசார் விரைந்து சென்று இருதரப்பினரையும் சமரசம் செய்து அனுப்பி வைத்தனர். பின்னர் தி.மு.க. எம்.பி. ரித்தீஷ்குமார் தனது ஆதரவாளர்களுடன் 8 வாகனங்களில் சோழந்தூர் வந்தார். அவர்கள் அங்கு நின்றிருந்த கிராம மக்கள் மீது சரமாரியாக சோடா பாட்டில்களை வீசி தகராறு செய்தனர்.

இதில் ஆண்டிச்சியேந்தல் கிராமத்தைச் சேர்ந்த நாராயணன் படுகாயம் அடைந்தார். அவர் திருவாடானை அரசு ஆஸ்பத்திரியில் முதலு தவி சிகிச்சை பெற்று ராமநாதபுரம் அரசு ஆஸ்பத்திரியில் அனுமதிக்கப்பட்டார்.

இதுபற்றி தகவல் அறிந்ததும் அந்த கிராம மக்கள் ஆத்திரம் அடைந்து சோடா பாட்டில்களை வீசியவர்களை விரட்டியடித்தனர். அவர்கள் சாலையில் அமர்ந்து பஸ் மறியல் போராட்டம் நடத்தினர். இதனால் அந்த பகுதியில் ஒரு மணி நேரம் போக்குவரத்து பாதிக்கப்பட்டது.

உடனே தாசில்தார் சுகுமார், போலீஸ் துணை சூப்பிரண்டு மோகன்ராஜ் மற்றும் போலீசார் விரைந்து சென்று மறியல் செய்த கிராம மக்களிடம் பேச்சுவார்த்தை நடத்தினர். அதன் பின்பு அவர்கள் கலைந்து சென்றனர்.

இந்த சம்பவம் தொடர்பாக திருப்பாலைக்குடி போலீசார் வழக்கு பதிவு செய்து ரித்தீஷ்குமார் எம்.பி., தினேஷ்குமார், பூமிநாதன், பாலகிருஷ்ணன், ராமநாதன், முகமது ரிசியான் என்ற டூயட்பாபு (34) ஆகிய 6 பேரை நேற்று இரவு 1 மணிக்கு கைது செய்தனர்.

இவர்கள் மீது கலகம் விளைவித்தல், ஆபாசமாக பேசுதல், கொலை மிரட்டல், ஆயுதங்களை காட்டி தாக்குதல், சாதியை சொல்லி திட்டுதல் ஆகிய பிரிவுகளில் வழக்குப்பதிவு செய்யப்பட்டுள்ளது. பின்னர் அவர்கள் மதுரை மத்திய சிறையில் அடைக்கப்பட்டனர்.

நக்கீரன்