அரசியல் கட்சிகளின் இலவசங்களை எதிர்த்து ஐகோர்ட்டில் வழக்கு

கிரைண்டர், மிக்சி, லேப்-டாப், மின்விசிறி போன்றவற்றை இலவசமாக கொடுப்பதாக அரசியல் கட்சியினர் அளித்துள்ள வாக்குறுதியை எதிர்த்து மதுரை ஐகோர்ட்டில் வழக்கு தொடரப்பட்டுள்ளது.

இலவச பொருட்கள்

மதுரை கே.புதூர் நல்லமணிநகரை சேர்ந்தவர் எம்.எஸ்.செந்தில்குமார், ஐகோர்ட்டு வக்கீல். இவர் மதுரை ஐகோர்ட்டு கிளையில் தாக்கல் செய்துள்ள மனுவில் கூறி இருப்பதாவது:-

தமிழகத்தில் வருகிற 13-ந் தேதி சட்டமன்ற தேர்தல் நடக்க உள்ளது. இந்த நிலையில் அரசியல் கட்சியினர் போட்டி போட்டுக்கொண்டு தேர்தல் வாக்குறுதிகளை மக்களிடம் அளித்து வருகின்றனர்.

அதாவது தி.மு.க மீண்டும் ஆட்சிக்கு வந்தால் அனைவருக்கும் இலவசமாக கிரைண்டர், மிக்சி வழங்கப்படும் என்றும், கல்லூரியில் படிக்கும் மாணவர்களுக்கு இலவசமாக லேப்-டாப் வழங்கப்படும் என்று தெரிவித்துள்ளது.

அ.தி.மு.க ஆட்சிக்கு வந்தால் இலவசமாக கிரைண்டர், மிக்சி, மின்விசிறி ஆகியவை வழங்கப்படும் என்றும், பிளஸ்-1 மாணவர்கள் முதல் கல்லூரி படிக்கும் மாணவர்கள் வரை இலவசமாக லேப்-டாப் வழங்கப்படும் என்று தெரிவித்துள்ளது. இதையே பின்பற்றி இதர அரசியல் கட்சியினரும் இந்த தவறான நடைமுறையை பின்பற்றலாம் என்ற அச்சம் உள்ளது. அரசியல் கட்சியினரின் இலவசங்களுக்கு பலர் எதிர்ப்பு தெரிவித்து பத்திரிகைகளில் கருத்து தெரிவித்துள்ளனர்.

லஞ்சம் கொடுப்பதற்கு சமம்

இலவசமாக வழங்க உள்ளதாக கூறப்படும் பொருட்கள் அனைத்தும் அரசியல் கட்சியினரின் சொந்த பணத்தில் இருந்து அளிக்கப்படுவது இல்லை. பொதுமக்களின் வரிப்பணத்தில் இருந்து தான் வழங்கப்படுகிறது.

இலவச திட்டங்களை அறிவித்து தேர்தலில் ஓட்டு கேட்பது, லஞ்சம் கொடுப்பதை முன்கூட்டியே உறுதி செய்து ஓட்டு கேட்பதற்கு சமமாகும். எனவே இலவசங்கள் கொடுப்பதாக கூறி ஓட்டு கேட்பது குற்றமாகும்.

கடன் சுமை அதிகரிக்கும்

ஆட்சிக்கு வந்த பின்பு அரசின் நிதியில் கொடுக்கப்போகும் இலவச திட்டங்களை தங்களது நிதியில் இருந்து கொடுப்பது போன்று அரசியல் கட்சியினர் அறிவித்து இருப்பதும் சரியல்ல. இதுபோன்ற இலவச திட்டங்களை தமிழக அரசு உலக வங்கியில் இருந்து கடன் பெற்று தான் நிறைவேற்ற முடியும். தமிழகத்தின் வளர்ச்சிக்காக குறிப்பிட்ட அளவு தொகை தான் உலக வங்கியில் இருந்து கடனாக பெற முடியும்.

அந்த தொகையையும் தாண்டி தற்போது தமிழக அரசு உலக வங்கியில் கடன் பெற்றுள்ளது. இதுபோன்ற சூழ்நிலையில் தற்போதுள்ள இலவச திட்டங்களுக்காக உலக வங்கியில் இருந்து கடன் பெற்றால் தமிழக அரசு கடுமையான கடன் சுமையை தாங்க வேண்டிய நிலைக்கு தள்ளப்படும். எனவே அரசியல் அமைப்பு சட்டப்படி நியாயமாகவும், நேர்மையாகவும் தேர்தலை நடத்த வேண்டியது தேர்தல் ஆணையத்தின் கடமையாகும்.

கட்டுப்பாடு விதிக்க வேண்டும்

எனவே ஜனநாயகத்தை நிலைநாட்டும் வகையில் இலவச திட்டங்களை அறிவிக்க தேர்தல் ஆணையம் கட்டுப்பாடுகளை விதிக்க உத்தரவிட வேண்டும். ஏற்கனவே அரசியல் கட்சியினர் அறிவித்துள்ள இலவச திட்டங்களை தங்களது பிரசாரத்தின் மூலம் விளம்பரப்படுத்த தடை விதிக்க வேண்டும்.

இவ்வாறு மனுவில் கூறப்பட்டுள்ளது.

இந்த மனு விரைவில் விசாரணைக்கு வரும் என்று எதிர்பார்க்கப்படுகிறது.

இது போல் அனைவரும் செய்தால் நல்ல இருக்கும் ....