வெளிநாட்டு வங்கிகளில் இந்தியர்களின் கறுப்பு பணம்: மத்திய அரசுக்கு சுப்ரீம் கோர்ட்டு கண்டனம்

கறுப்பு பணத்தின் ஆதாரம் பற்றி விசாரிக்காதது ஏன்?


வெளிநாட்டு வங்கிகளில் பதுக்கப்பட்டுள்ள இந்தியர்களின் கறுப்பு பணம் எங்கிருந்து போனது? எப்படி போனது? அந்த கறுப்பு பணத்துக்கான மூலாதாரம் என்ன? என்று மத்திய அரசுக்கு சுப்ரீம் கோர்ட்டு கேள்வி எழுப்பியுள்ளது.

விசாரணை அறிக்கை

வெளிநாட்டு வங்கிகளில் பதுக்கப்பட்டுள்ள இந்தியர்களின் கறுப்பு பணத்தை மீட்டு இந்தியாவுக்கு திரும்ப கொண்டுவர மத்திய அரசுக்கு உத்தரவிட வேண்டும் என்று சுப்ரீம் கோர்ட்டில் பொது நல வழக்கு தொடரப்பட்டு உள்ளது. முன்னாள் மத்திய சட்ட மந்திரியும், பா.ஜனதா கட்சியின் மூத்த தலைவர்களில் ஒருவரும், பிரபல மூத்த வக்கீலுமான ராம்ஜெத்மலானி தொடர்ந்த இந்த வழக்கை நீதிபதிகள் சுதர்சன் ரெட்டி, எஸ்.எஸ்.நிஜ்ஜார் ஆகியோர் விசாரித்து வருகிறார்கள்.

கறுப்பு பணத்தை இந்தியாவுக்கு திரும்பக் கொண்டு வருவதில் வருமான வரித்துறையின் அமலாக்கப் பிரிவு என்ன நடவடிக்கை எடுத்தது? கறுப்பு பணம் பற்றி இதுவரை நடத்தப்பட்ட விசாரணை எந்த அளவில் உள்ளது? என்பன பற்றிய விவரங்களை சீலிட்ட உரையில் அறிக்கையாக மத்திய அரசு தாக்கல் செய்ய வேண்டும் என்று ஏற்கனவே சுப்ரீம் கோர்ட்டு உத்தரவிட்டு, வழக்கு விசாரணையை 28-ந் தேதிக்கு ஒத்தி வைத்து இருந்தது.

14 பக்க அறிக்கை

அதன்படி நேற்று இந்த வழக்கு விசாரணைக்கு வந்தபோது மத்திய அரசு வக்கீல் கோபால் சுப்பிரமணியம் 14 பக்க விசாரணை அறிக்கையை கோர்ட்டில் தாக்கல் செய்தார். அதனை படித்த பின்னர் நீதிபதிகள் மத்திய அரசுக்கு கடும் கண்டனம் தெரிவித்தனர். அவர்கள் கூறியதாவது:-

புதிதாக எந்த விவரமும் உங்கள் (மத்திய அரசு) அறிக்கையில் இல்லை. ஒட்டு மொத்தமாக புனேயை சேர்ந்த ஒரே ஒரு நபர் (ஹசன் அலி) மீது மட்டுமே கவனம் செலுத்தப்பட்டு உள்ளது. மற்றவர்கள் என்ன ஆனார்கள்? ஒருவர்தான் வெளிநாட்டு வங்கியில் கறுப்பு பணம் வைத்து இருக்கிறாரா?

மூலாதாரம் என்ன?

கறுப்பு பணம் தொடர்பான ஒவ்வொரு வழக்கிலும் என்ன முன்னேற்றம் ஏற்பட்டு உள்ளது? என்பதை அறிய விரும்புகிறோம். கறுப்பு பணத்தால் நாட்டுக்கு ஏற்படும் அச்சுறுத்தல் பற்றி எந்த அளவில் விசாரணை நடக்கிறது? கறுப்பு பணம் எங்கிருந்து வந்தது? எங்கிருந்து போனது? எப்படி போனது? என்ற மூலாதாரங்கள் பற்றி விசாரணை நடக்கிறதா?

2008-ம் ஆண்டிலிருந்து அமலாக்கப்பிரிவு உள்ளிட்ட அமைப்புகள் தூங்கிக் கொண்டிருந்தது ஏன்? நாங்கள் நடவடிக்கை எடுத்த பிறகுதானே அந்த அமைப்புகள் நடவடிக்கை எடுக்கத் தொடங்கின? பொது நல வழக்கு தொடர்ந்து இருக்கா விட்டால் கறுப்பு பணத்தை கொண்டுவருவது பற்றி ஒன்றுமே நடந்திருக்காதே?

சும்மா இருக்கமுடியாது

இந்த அறிக்கையை பார்த்த பிறகு இனிமேலும் அமைதியாக, சும்மா இருக்க முடியாது.

வெளிநாட்டு வங்கிகளில் பதுக்கப்பட்டுள்ள கறுப்பு பணத்தை மீட்டு கொண்டு வருவது உள்பட அது தொடர்பான அனைத்து விவகாரங்களையும் விசாரிக்க புலனாய்வுத்துறை, ஆராய்ச்சி மற்றும் பகுப்பாய்வு பிரிவு, சி.பி.ஐ, அமலாக்கப் பிரிவு ஆகியோரைக் கொண்ட ஒரு சிறப்பு விசாரணை குழு அமைக்கப்பட வேண்டும் என்ற யோசனையை சுப்ரீம் கோர்ட்டு மீண்டும் வலியுறுத்துகிறது.

இவ்வாறு நீதிபதிகள் விசாரணையின்போது தெரிவித்தனர்.

நல்ல திருப்புமுனை தான் பார்ப்போம் முடிவு எப்படி இருக்குன்னு