தமிழக சட்டசபை தேர்தல் மனு தாக்கல் முடிந்தது

தமிழக சட்டசபை தேர்தல் மனு தாக்கல் முடிந்தது
4,315 மனுக்கள் குவிந்தன
திருப்பூர் வடக்கு தொகுதியில் மட்டும் 151 பேர் போட்டி


தமிழக சட்டசபை தேர்தல் வேட்புமனு தாக்கல் நேற்றுடன் முடிவடைந்தது. மொத்தம் 4 ஆயிரத்து 315 மனுக்கள் குவிந்தன. திருப்பூர் வடக்கு தொகுதியில் போட்டியிடுவதற்காக மட்டும் 151 பேர் மனு தாக்கல் செய்துள்ளனர்.

சென்னை, மார்ச்.27- தமிழக சட்டசபை தேர்தல், ஏப்ரல் 13-ந் தேதி நடக்கிறது.

மனு தாக்கல் முடிந்தது

தேர்தலில் போட்டியிடுவதற்கான வேட்புமனு தாக்கல், கடந்த 19-ந் தேதி தொடங்கியது. நேற்றுடன் வேட்புமனு தாக்கல் முடிவடைந்தது. தொடக்கத்தில் மந்தமாக இருந்த வேட்புமனு தாக்கல், கடைசி 3 நாட்களில் விறுவிறுப்பாக நடைபெற்றது.

மொத்தத்தில் தமிழ்நாடு முழுவதும் உள்ள 234 தொகுதிகளிலும் 4 ஆயிரத்து 315 பேர் வேட்புமனு தாக்கல் செய்து உள்ளனர்.

கருணாநிதி-ஜெயலலிதா

தமிழக முதல்-அமைச்சரும், தி.மு.க. தலைவருமான கருணாநிதி, திருவாரூர் மாவட்டத்தில் உள்ள திருவாரூர் தொகுதியில் வேட்புமனு தாக்கல் செய்துள்ளார். அந்த தொகுதியில், அவருடன் மொத்தம் 18 பேர் மனு தாக்கல் செய்துள்ளனர்.

முன்னாள் முதல்-அமைச்சரும், அ.தி.மு.க. பொதுச் செயலாளருமான ஜெயலலிதா, திருச்சி மாவட்டம் ஸ்ரீரங்கம் தொகுதியில் போட்டியிடுகிறார். இந்த தொகுதியில் அவர் உள்பட மொத்தம் 28 பேர் வேட்புமனு தாக்கல் செய்துள்ளனர்.

சென்னை அருகில் உள்ள கொளத்தூர் தொகுதியில், துணை முதல்-அமைச்சர் மு.க.ஸ்டாலின் உள்பட 39 பேர் வேட்புமனு தாக்கல் செய்துள்ளனர்.

இறுதி வேட்பாளர் பட்டியல்

வேட்பு மனுக்கள் பரிசீலனை, நாளை (திங்கட்கிழமை) நடைபெறும். வருகிற புதன்கிழமை (மார்ச் 30) வேட்பு மனுக்களை வாபஸ் பெறுவதற்கு கடைசி நாள் ஆகும்.

அன்று மாலை இறுதி வேட்பாளர் பட்டியல் வெளியிடப்படும். ஏப்ரல் 13-ந் தேதி (புதன்கிழமை) தமிழ்நாடு முழுவதும் ஒரே கட்டமாக ஓட்டுப்பதிவு நடைபெறும். ஒரு மாதத்திற்கு பின், மே 13-ந் தேதி (வெள்ளிக்கிழமை) ஓட்டுகள் எண்ணப்பட்டு முடிவுகள் அறிவிக்கப்படும்.

திருப்பூரில் 151 பேர் போட்டி

தமிழ்நாட்டில் அதிகபட்சமாக, திருப்பூர் வடக்கு தொகுதியில், அதிகாரபூர்வ கட்சி வேட்பாளர்கள் உள்பட 151 பேர் வேட்புமனு தாக்கல் செய்து உள்ளனர். திருப்பூர் சாய, சலவை பட்டறைகளின் பிரச்சினைக்கு தீர்வு காணும்படி வற்புறுத்தி, தொழில் பாதுகாப்பு குழு சார்பில் அதிக அளவில் மனு தாக்கல் செய்யப்பட்டு உள்ளன.

ஓட்டுப்பதிவு எந்திரங்களில் 64 வேட்பாளர்களுக்கு மேல் பதிவு செய்ய முடியாது என்பதால், இந்த தொகுதியில் வாக்கு சீட்டு முறைப்படி தேர்தல் நடைபெறலாம் என்று எதிர்பார்க்கப்படுகிறது. வேட்பு மனுக்கள் வாபஸ் பெறுவதற்கான கடைசி நாளுக்கு பிறகு அது பற்றி முடிவு செய்யப்படும் என்று, தமிழக தலைமை தேர்தல் அதிகாரி பிரவீன்குமார் ஏற்கனவே அறிவித்து இருந்தார்.

புத்தக வடிவில் வாக்கு சீட்டு

தமிழ்நாட்டில் கடந்த 1996-ம் ஆண்டில் நடைபெற்ற சட்டசபை தேர்தலின்போது ஈரோடு மாவட்டம் மொடக்குறிச்சி தொகுதியில் இதைவிட அதிக அளவில், மொத்தம் 1033 பேர் வேட்புமனு தாக்கல் செய்து இருந்தனர்.

தண்ணீர் வசதி கேட்டு அரசின் கவனத்தை ஈர்ப்பதற்காக, விவசாயிகள் சார்பில் இந்த நடவடிக்கை மேற்கொள்ளப்பட்டது. அப்போது புத்தக வடிவில் வாக்கு சீட்டுகள் அச்சடிக்கப்பட்டு ஓட்டுப்பதிவு நடைபெற்றது குறிப்பிடத்தக்கது.

தினதந்தி

தகவலுக்கு நன்றி ,,,,