கிராமம், கிராமமாக சென்று விஜயகாந்த் பிரசாரம்

விழுப்புரம் மாவட்டத்தில் கிராமம், கிராமமாக சென்று விஜயகாந்த் தேர்தல் பிரசாரத்தில் ஈடுபட்டார்.

தமிழக சட்டசபை தேர்தலில் தேசிய முற்போக்கு திராவிட கழக தலைவர் விஜயகாந்த் விழுப்புரம் மாவட்டம் ரிஷிவந்தியம் தொகுதியில் போட்டியிடுகிறார். இதையொட்டி அவர் நேற்று பகல் 1.15 மணிக்கு தேர்தல் அதிகாரி வாசுதேவனிடம் வேட்பு மனுவை தாக்கல் செய்தார்.

தேர்தல் பிரசாரம்

வேட்பு மனுவை தாக்கல் செய்து முடித்துவிட்டு வெளியே தயார் நிலையில் நின்று கொண்டிருந்த நிருபர்கள் கேட்ட கேள்விகளுக்கு பதில் அளித்து விட்டு மதியம் 1.45 மணியளவில் விழுப்புரத்தில் இருந்து புறப்பட்டார்.

பின்னர் மாலை 3.30 மணியளவில் விஜயகாந்த் தேர்தல் பிரசாரத்தை தொடங்கினார். திறந்த வேனில் நின்றபடி பிர சாரத்தை தொடங்கிய இவர் சென்னகுனம், ஆயந்தூர், முகைïர், சித்தாமூர், அரகண்டநல்லூர், மணம்பூண்டி போன்ற கிராமங்கள் வழியாக வந்து அங்குள்ள பொதுமக்களிடம் வாக்கு சேகரித்தார்.

கிராமம், கிராமமாக வாக்கு சேகரிப்பு

இதனை தொடர்ந்து மாலை 4 மணிக்கு திருக்கோவிலூர் வந்தார். அங்கு தொகுதி வேட்பாளரும் மாவட்ட செயலாளருமான எல்.வெங்கடேசனை ஆதரித்து அங்கு கூடியிருந்த மக்களிடத்தில் வாக்கு கேட்டு பேசினார். அப்போது கடந்த கால ஆட்சியில் ஏற்பட்ட தொடர் மின்வெட்டு, விலைவாசி உயர்வு, ஸ்பெக்ட்ரம் முறைகேடு ஆகியவற்றை கண்டித்து பேசினார்.

திருக்கோவிலூரில் பிரசாரத்தை முடித்துக்கொண்டு மாலை 5 மணியளவில் புறப்பட்டு விளந்தை, சொரையப்பட்டு, சாங்கியம் ஆகிய கிராமங்களுக்கு சென்று அங்குள்ள பொது மக்களிடம் வாக்கு சேகரிப்பில் ஈடுபட்டார்.

பின்னர் மாலை 5.45 மணியளவில் ரிஷிவந்தியம் ஒன்றியத்திற்குட்பட்ட மணலூர் பேட்டைக்கு வந்தார். அங்கு திரண்டிருந்த ஆயிரக்கணக்கான மக்கள் மத்தியில் தனக்கு வாக்களிக்கும்படி ஆதரவு கேட்டு பேசினார்.

திருவரங்கத்தில் சாமி தரிசனம்

மணலூர்பேட்டையில் பிரசாரத்தை முடித்துக் கொண்டு மாலை 6.40 மணியளவில் கள்ளிப்பாடி வழியாக சென்று திருவரங்கம் சென்றார். இரவு 6.50 மணியளவில் திருவரங்கம் ரங்கநாத பெருமாள் கோவிலுக்கு விஜயகாந்த் தனது மனைவி பிரேமலதா விஜயகாந்த், மைத்துனர் சுதீஷ், அவரது மனைவி ஜோதி ஆகியோருடன் சென்று ரங்கநாத பெருமாள், ரங்கநாயகி தாயாரை தரிசனம் செய்துவிட்டு கோவில் வளாகத்தை சுற்றி வலம் வந்தார்.

சுமார் 40 நிமிடத்திற்கு பின்னர் இரவு 7.30 மணியளவில் கோவிலில் இருந்து வெளியே வந்த விஜயகாந்த் அங்குள்ள கூட்டுரோட்டில் திரண்டிருந்த மக்கள் மத்தியில் பேசினார்.

பின்னர் ஜம்படை, சீர்ப்பனந்தல் வழியாக 8.30 மணிக்கு அரும்பராம்பட்டுக்கு வந்து அங்கு தேர்தல் பிரசாரம் மேற்கொண்டார். அங்கு முடித்த பின்னர் 9 மணிக்கு ஈருடையாம்பட்டில் பிரசாரம் செய்து விட்டு 9.15 மணிக்கு பொரசப்பட்டிலும், 9.30 மணிக்கு மூங்கில்துறைப்பட்டிலும் அதனை தொடர்ந்து மைக்கேல்புரம், கடுவனூர் ஆகிய இடங்களில் பிரசாரம் செய்து விட்டு அத்துடன் நேற்றைய பிரசாரத்தை முடித்துக் கொண்டார்.

திருக்கோவிலூர் தே.மு.தி.க. வேட்பாளர் வெங்கடேசனை ஆதரித்து விஜயகாந்த் பேசும்போது கூறியதாவது:-

மக்களுடன் கூட்டணி

விஜயகாந்த் விருத்தாசலத்தில் இருந்து ரிஷிவந்தியத்திற்கு வந்திருக்கின்றார் என்று கூறுகின்றனர். அதுவும் சிவன் தலம்தான். இதுவும் சிவன் தலம்தான். மக்கள் குணத்தை காட்டுகின்ற நேரம் தேர்தல் நேரம். மக்களுக்கு செய்கிறேன் என்று சொல்லிவிட்டு செய்யாமல் இருந்தால், அதற்கு பாடம் புகட்டுகிற நேரம்தான் இந்த நேரம்.

இந்த தேர்தல் நேரத்தில் சொன்னதை செய்யாதவர்களுக்கு, பாடத்தை ஓட்டு மூலம் காட்டுவார்கள். விஜயகாந்த் மக்களுடனும், தெய்வத்துடனும் கூட்டணி என்று சொல்லிவிட்டு அ.தி.மு.க.வுடன் எப்படி கூட்டணி வைத்தார் என்று கேட்கின்றனர். நான் சொன்னபடி தெய்வத்துடனும், மக்களுடனும் கூட்டணி இருக்கத்தான் செய்கிறது. நான் ஆட்சியிலோ, அதிகாரத்திலோ பங்கு கேட்கவில்லை. என்னுடைய மக்கள் சந்தோஷமாக இருக்க வேண்டும். அதற்காகத்தான் இந்த முடிவை எடுத்தேன்.

வெற்றிபெறச் செய்ய வேண்டும்

விலைவாசி உயர்வு அதிகரித்துக்கொண்டேதான் இருக்கின்றது. வீட்டுக்கு ஒருவருக்கு வேலை கொடுப்பதாக சொன்னீர்கள், சட்டசபையில் 5 லட்சம் பேருக்கு வேலை கொடுப்பதாக கூறினீர்கள், எத்தனை பேருக்கு வேலை கொடுத்தீர்கள். மொத்தத்திற்கு 5 லட்சம் பேருக்கு வேலை கொடுக்கவில்லை. தே.மு.தி.க.- அ.தி.மு.க. கூட்டணிக்கு மக்கள் வாக்களிக்க வேண்டும். நான் உங்களுக்காக போராடத்தான் வந்திருக்கின்றேன்.

இவ்வாறு விஜயகாந்த் பேசினார்..

தினதந்தி!