இண்டர்லோக்: சர்ச்சைக்குரிய வார்த்தைகள் மட்டும் நீக்கப்படும்

சிவசங்கர் · சிவசங்கர் Thu 24 Mar 2011 - 15:57

கோலாலம்பூர்: அரசாங்கம் இண்டர்லோக் நாவலை 5-ஆம் படிவத்திற்கான பாடநூலாக நிலைநிறுத்தும். அந்நாவலில், இந்தியர்களைப் புண்படுத்தும் அம்சம் கொண்ட சில வார்த்தைகள் மட்டும் நீக்கப்படும் என்று கல்வி அமைச்சர் டான்ஸ்ரீ முகிதின் யாசின் தெரிவித்தார். இண்டர்லோக் விவகாரத்தை அமைச்சரவை டேவான் பஹாசா டான் புஸ்தாக்காவிடம் (DBP) ஒப்படைத்து விட்டதாகவும், அவர்கள் அந்நாவலில் இடம்பெற்றுள்ள சர்ச்சைக்குரிய வார்த்தைகளை மட்டும் அகற்றுவார்கள் என்றும் அவர் கூறினார். இந்தியர்களிடமிருந்தும், அரசியல் தலைவர்களிடமிருந்தும் கடுமையான எதிர்ப்பு கிளம்பியதையடுத்து இம்முடிவு எடுக்கப்பட்டதாகக் கல்வி அமைச்சர் தெரிவித்தார்.
கடந்த ஜனவரி மாதம், இண்டர்லோக் நாவல் 5-ஆம் படிவத்திற்கான பாட நூலாக நிலைநிறுத்தப்படும் என்று கல்வி அமைச்சர் முகிதின் யாசின் அறிவித்திருந்தார். ஆயினும் அந்நாவலில் இந்தியர்களைப் புண்படுத்தும் வகையில் சில வார்த்தைகள் இடம்பெற்றிருந்ததால் கடும் எதிர்ப்பு கிளம்பியது. இதனையடுத்து அந்நாவலை மறு ஆய்வு செய்வதற்கு 8 பேர் கொண்ட சுயேட்சை குழு அமைக்கப்பட்டது. இருப்பினும், கடந்த வாரம் அக்குழுவில் இடம்பெற்றிருந்த மூன்று இந்தியர்களும் வெளிநடப்பு செய்தனர். அந்நாவலைத் திருத்தம் செய்வதற்கு மொத்தம் 100 வார்த்தைகளைப் பரிந்துரை செய்தபோதும் குறிப்பிட்ட ஒரு வார்த்தையை மட்டுமே நீக்க ஒப்புக்கொண்டதால் அவர்கள் அக்குழுவிலிருந்து வெளியேறினர் என்று தெரிவிக்கப்பட்டது. இதனிடையே அந்நாவலில் திருத்தம் செய்ய அதன் எழுத்தாளர் டத்தோ அப்துல்லா ஹாஸ்ஸான் ஒப்புக்கொண்டதாகவும், அரசாங்கம் அவருக்கு நன்றி கூறக் கடமைபட்டுள்ளதாகவும் கல்வி அமைச்சரும், துணைப்பிரதமருமான முகிதின் யாசின் நாடாளுமன்ற வளாகத்தில் நடைப்பெற்ற செய்தியாளர் சந்திப்பில் தெரிவித்தார்.

'வணக்கம் மலேசியா'

சிவசங்கர் · சிவசங்கர் Thu 24 Mar 2011 - 15:58

இடைநிலைப் பள்ளிகளில் மலாய் இலக்கியப் பாடநூலாகப் பயன்படுத்தப்படும் “இண்டர்லோக்” நாவலிலிருந்து “பறையா” என்ற சொல் கைவிடப்பட்டிருப்பதாக துணைப் பிரதமர் முகைதின் யாசின் கூறுகிறார்.

அந்நாவலில் இந்திய சமூகத்தில் கொந்தளிப்பை உண்டுபண்ணக் காரணமான பல்வேறு விசயங்களில் ஒன்றாகக் கருதப்படும் இச்சொல், பள்ளிப்பாட நூலாகப் பயன்படுத்தப்படும் பதிப்புகளிலிருந்து நீக்கப்பட்டிருப்பதாக அவர் கூறினார்.

அச்சொல்லுக்குப் பதிலாக “ஒரே வகுப்பைச் சேர்ந்தவர்கள்” என்ற தொடரைப் பயன்படுத்தலாம் என்று நாவலை மீள் ஆய்வு செய்ய அமைக்கப்பட்ட – மூன்று இந்திய பிரதிநிதிகளையும் உள்ளடக்கிய - சுயேச்சைக் குழு ஒருமனதாய் ஒப்புக்கொண்டிருப்பதாக முகைதின் குறிப்பிட்டார்.

“ஒரு உடன்பாடு காணப்பட்டிருப்பதால் இவ்விவகாரம் முடிவுக்கு வந்திருப்பதாக (கல்வி) அமைச்சு கருதுகிறது”, என்று நாடாளுமன்றத்தில் கேள்வி நேரத்தின்போது துணைப் பிரதமர் கூறினார். 'மலேசியா இன்று"