கவிதைகள் பற்றிய குறிப்பு

அன்பு தளபதி · அன்பு தளபதி Mon Mar 21, 2011 10:00 pm

1.
எழுதிய ஒரு கவிதையை
அழிக்க முடிவதில்லை.
ஒரு கற்சுவரில்
கீறப்பட்ட கோடோ
மரத்தில் செதுக்கப்பட்ட
பெயரோ
போல
அழியாது உறுத்துகிறது.
2.
எழுதிய ஒரு கவிதையைக்
கிழிக்கவும் முடிவதில்லை.
பிடிக்காத துணியையோ
படிக்காத கடிதத்தையோ
போல
எளிதில்லை கிழிப்பது.
3.
இலைகள் உதிர்வது
துளிகள் வீழ்வது
சிறகுகள் மிதப்பது
போல எளிதில்லை
கவிதைகள் பிறப்பதும்
பிறந்தபின் நிலைப்பதும்.
4.
காற்றில் அலைவது
நெருப்பில் தொலைவது
நீரில் கரைவது
போல் மடிகின்றன
வார்த்தைகளின்
அமிலம் குடித்த
உருவாகாத கவிதைகள்.

-சுந்தர்ஜி பிரகாஷ்