டைரக்டர் மணிரத்னம் அவர்களுக்கு ஒரு திறந்த மடல்

Waajid M A · Waajid M A Sat Mar 19, 2011 9:41 pm

டைரக்டர் மணிரத்தினம் அவர்களுக்கு ஒரு திறந்த மடல்.

சமீப காலமாக அமரர் கல்கி அவர்கள் எழுதிய புகழ் பெற்ற நாவலான பொன்னியின் செல்வன் கதையைத் தாங்கள் திரைப்படமாக எடுக்கப்போவதாக செய்திகள் பத்திரிக்கைகளில் வந்த வண்ணம் உள்ளன. நூற்றுக்கணக்கான கதாபாத்திரங்களைக்கொண்ட அந்த கதையை சுமார் இரண்டரை மணி நேரம் ஓடக்கூடிய திரைப்படமாக எடுப்பதென்பது என்னைப்போன்ற சாமானியர்களால் கற்பனை செய்து கூட பார்க்க முடியாத, ஆங்கிலத்தில் சொல்வது போல் Himalayan task என்று சொன்னால் அது மிகையாகாது. ஆனால் தங்கள் திறமையை எல்லாம் பயன்படுத்தி அந்தப்படத்தை உருவாக்கி, சாதாரண மக்கள் அந்தக்கதையையும் கதா பாத்திரங்களையும் ஏற்றுக்கொள்வதில்தான் தங்கள் முழு வெற்றி அடங்கியுள்ளது.

கல்கி அவர்கள் எழுதிய பார்த்திபன் கனவு திரைப்படமாக எடுக்கப்பட்டபோது முழு கதையும் சிதைந்து போனது. இத்தனைக்கும் அது பொன்னியின் செல்வனை ஒப்பிடும் போது மிகச்சிறிய கதை. கதாபாத்திரங்களும் குறைவு. பிரபல நடிகர்கள் அந்தப்பாத்திரங்களுக்கு தங்கள் திறமையால் உயிரூட்டி இருந்தாலும் குறை, குறை தான். மிகவும் இனிமையான பாடல்கள். கதையைப் படிக்காமல் படம் மட்டும் பார்த்த நேயர்களுக்கு அது ஒரு நல்ல படம்.

பொன்னியின் செல்வன் கதையை தாங்கள் திரைப்படமாக உருவாக்கும் முயற்சியைக் கைவிட்டு அதையே ஒரு மெகா சீரியலாக எடுத்தால் அது மிகப்பெரிய வெற்றியை அடையும் என்று நானும் என் நண்பர்கள் பலரும் எண்ணுகிறோம். அந்தக்கதையின் ஒவ்வொரு அத்தியாயமும் ஒரு த்ரில்லர். மொத்தம் ஐந்து பாகங்கள். 283 அத்தியாயங்கள். இரண்டிரண்டு அத்தியாயங்களாக மூன்றரை வருடம் கல்கியில் தொடர்ந்து வெளிவந்து சாதனை படைத்த மகத்தான காவியம் அது. சரியான ஸ்பான்ஸர் மற்றும் சன் டிவியைப்போன்ற தயாரிப்பாளர் கிடைத்தால் தமிழ் கூறும் நல்லுலகம் என்றென்றும் இந்தத்தயாரிப்பில் ஒத்துழைத்த எந்தக்கலைஞனையும் உயிருள்ளவரை மறக்காது. தாங்கள் ஒரு மிகச்சிறந்த இயக்குனர் மற்றும் தங்களுக்கு ஆலோசனை கூறும் அளவிற்கு என்னைப்போன்றவர்களுக்கு தகுதி இல்லை என்றே நான் எண்ணுகிறேன். திரு கல்கி அவர்களை தரிசிக்கும் பாக்கியம் எனக்கு கிட்டவில்லை. நான் பிறப்பதற்கு முன்னாலேயே 1954 இல் அவர் காலமாகிவிட்டார். பொன்னியின் செல்வனை பலமுறை படித்த காரணத்தினால் தான் மேலும் ஒவ்வொரு கதாபாத்திரத்துடனும் ஒன்றிப்போன காரணத்தினால் தான் அதனுடைய ஒவ்வொரு அத்தியாயத்தையும் சின்னத்திரையில் காண ஆவலாக உள்ளேன். அந்த நாவலை இரண்டரை மணி நேரத்தில் சுருக்கினால் அதன் சுவை குன்றி விடும் என்பது அடியேனின் ஆதங்கம்

டைரக்டர் மணிரத்னம் அவர்களுக்கு ஒரு திறந்த மடல்

டைரக்டர் மணிரத்னம் அவர்களுக்கு ஒரு திறந்த மடல்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக