அமெரிக்க கூட்டு படைகள் லிபியா மீது விமான தாக்குதல்: 64 பேர் பலி; 150 பேர் படுகாயம்

லிபியா மீது அமெரிக்க கூட்டு படைகள் விமானம் மற்றும் ஏவுகணை தாக்குதல் நடத்தின. இதில் 64 பேர் பலியானார்கள். 150 பேர் படுகாயம் அடைந்தனர்

துனிசியா, எகிப்து ஆகிய நாடுகளை தொடர்ந்து, ஆப்பிரிக்க நாடான லிபியாவிலும் சர்வாதிகார அதிபர் கடாபிக்கு எதிராக மக்கள் புரட்சி வெடித்தது.

ராணுவ நடவடிக்கை

மக்கள் புரட்சி படையினர், லிபியாவின் 2-வது பெரிய நகரமான பெங்காசி உள்பட 4 நகரங்களை கைப்பற்றி இருந்தனர். இந்த நிலையில், அதிபர் கடாபியின் விசுவாச படையினர், பொது மக்களுக்கு எதிராக பெரிய அளவில் தாக்குதலை தொடுத்தனர். போர் விமானங்கள் மூலம் குண்டுகள் வீசப்பட்டன. 3 நகரங்களை மீட்ட அதிபரின் படையினர், பெங்காசியை நோக்கி முன்னேறினார்கள்.

ராணுவ தாக்குதலை நிறுத்தும்படி அமெரிக்கா மற்றும் மேலைநாடுகள் விடுத்த வேண்டுகோளை கடாபி மதிக்கவில்லை. அதைத் தொடர்ந்து கடந்த வியாழக்கிழமை அன்று லிபியா நாட்டு மக்களை காப்பாற்ற ராணுவ நடவடிக்கை மேற்கொள்ள ஐ.நா. பாதுகாப்பு சபையில் தீர்மானம் நிறைவேற்றப்பட்டது.

அமெரிக்க படைகள் தாக்குதல்

இதனால் பணிந்த லிபியா அதிபர் கடாபி போர் நிறுத்த அறிவிப்பை வெளியிட்டார் என்றாலும், அவருடைய ஆதரவு படையினர் தொடர்ந்து தாக்குதலில் ஈடுபட்டனர். அதைத் தொடர்ந்து ஐ.நா. தீர்மானத்தை அமல்படுத்தும் வகையில் அமெரிக்கா, பிரான்சு, இங்கிலாந்து, கனடா மற்றும் இத்தாலி போன்ற நாடுகளின் கூட்டு படைகள் ராணுவ தாக்குதலை தொடங்கின.

இந்த தாக்குதலுக்கு `ஆபரேஷன் ஒடிசி டான்' என்று பெயர் சூட்டப்பட்டு உள்ளது. பிரான்சு ஜெட் போர் விமானங்கள் பெங்காசி நகரில் உள்ள முக்கிய ராணுவ நிலைகளை குறிவைத்து முதன் முதலில் குண்டு வீசி தாக்குதலை தொடங்கி வைத்தன. அதைத் தொடர்ந்து அமெரிக்கா மற்றும் மேலை நாடுகளின் படைகள் விமானம் மற்றும் கப்பல்கள் மூலம் லிபியாவுக்கு எதிராக சரமாரி தாக்குதலை தொடுத்தன.

பயங்கர சத்தத்துடன்

அதிகாலை நடந்த தாக்குதலில் தலைநகர் திரிபோலியில் பயங்கர சத்தத்துடன் குண்டுகள் வெடித்த சத்தமும், விமான எதிர்ப்பு பீரங்கிகளின் வெடிச்சத்தமும் நகரை குலுங்க வைத்தன.

அதைத் தொடர்ந்து `அல்லாஹு அக்பர்' என்ற முழக்கம் எதிரொலித்தது. திரிபோலியில் கிழக்கு லஜுரா மாவட்டத்திலும், மிஸ்ரதா நகரில் கடாபியின் விமான தளத்தின் அருகிலும் இந்த சத்தம் கேட்டதாக பொது மக்கள் தெரிவித்தனர்.

64 பேர் பலி

தலைநகர் திரிபோலி அருகே மத்திய தரைக்கடல் பகுதியில் தயார்நிலையில் நிறுத்தி வைக்கப்பட்டு இருந்த அமெரிக்கா மற்றும் இங்கிலாந்து போர்க்கப்பல்கள், நீர்மூழ்கி கப்பல்களில் இருந்து 110 ஏவுகணை தாக்குதல்கள் தொடுக்கப்பட்டது. மேற்கு பகுதியில் உள்ள மிஸ்ரதா நகரிலும் ஏவுகணை தாக்குதல் நடந்தது.

லிபியாவில் உள்ள 20-க்கு மேற்பட்ட விமானம் மற்றும் ஏவுகணை தாக்குதல் தடுப்பு நிலைகள் மற்றும் ரேடார்களை குறிவைத்து இந்த தாக்குதல் நடந்தது. விமானம் மற்றும் ஏவுகணை தாக்குதலில் 48 பேர் பலியானதாகவும், 150 பேர் படுகாயம் அடைந்ததாகவும் லிபியா நாட்டு டெலிவிஷன் முதலில் அறிவித்தது. ஆனால், காயமடைந்த பலர் உயிரிழந்ததால், சாவு எண்ணிக்கை 64 ஆக உயர்ந்து விட்டதாக அரசு அதிகாரி ஒருவர் கூறினார். சிர்தே, ஜுவாரஹ் ஆகிய நகரங்களிலும் தாக்குதல் நடந்தது.

மற்றொரு சிலுவை போர்

அமெரிக்கா தலைமையிலான கூட்டு படையின் இந்த தாக்குதலில் அதிபர் கடாபியின் விமான தாக்குதல் தடுப்பு நிலைகள் மிக மோசமாக சேதம் அடைந்து இருப்பதாக, அமெரிக்க ராணுவ அதிகாரி ஒருவர் தெரிவித்தார். ஆனால், அப்பாவி பொது மக்கள் மற்றும் குழந்தைகளை குறிவைத்து இந்த தாக்குதல் நடந்து இருப்பதாக, லிபியா டெலிவிஷன் நிறுவனம் குற்றம் சாட்டி இருந்தது.

கூட்டு படையினரின் இந்த தாக்குதல் பற்றி கருத்து தெரிவித்த லிபியா அதிபர், மற்றொரு சிலுவைப் போர் தொடங்கியதற்கான அடையாளம் என்று குறிப்பிட்டு இருக்கிறார். லிபியா நாட்டின் சுதந்திரம், ஒற்றுமை மற்றும் கவுரவத்தை கட்டிக்காப்பதற்காக, லிபியா நாட்டு மக்கள் அனைவரும் அனைத்து விதமான ஆயுதங்களை ஏந்தவேண்டிய நேரம் வந்துவிட்டதாகவும் அதிபர் கடாபி சபதம் ஏற்றார்.

கடாபி அறிவிப்பைத் தொடர்ந்து, ஆண்களுக்கும், பெண்களுக்கும் லிபியா அரசு ஆயுத வினியோகத்தை தொடங்கியது. 10 லட்சத்துக்கும் மேற்பட்டோருக்கு சில மணி நேரங்களில் ஆயுதங்கள் கொடுக்கப்பட்டன.

ஈராக்கை அடுத்து...

ஐ.நா. தீர்மானத்தை தொடர்ந்து பிரான்சு தலைநகர் பாரீசில் நடைபெற்ற உலக நாடுகளின் தலைவர்களின் கூட்டத்தில், லிபியா மீதான உடனடி தாக்குதலுக்கு ஒப்புதல் வழங்கப்பட்டது. ஸ்பெயின், நார்வே, டென்மார்க் மற்றும் அரபு நாடுகளின் தலைவர்களும் ராணுவ நடவடிக்கைக்கு ஆதரவு தெரிவித்து உள்ளனர்.

ஐ.நா. சபை பொதுச்செயலாளர் பான் கி மூன் தலைமையில் இந்த கூட்டம் நடைபெற்றது. கடந்த 2003-ம் ஆண்டில் ஈராக்கில் நடைபெற்ற தாக்குதலை அடுத்து சர்வதேச படையினர் மேற்கொள்ளும் மிகப்பெரிய கூட்டு தாக்குதல் இது என்பது குறிப்பிடத்தக்கது.