சலசல எழஎழ (கவிதை)

சலசல வென்று சலங்கை குலுங்க
கலகல வென்று குலுங்கி நகைத்து
தளதள வென்றுடல் தாங்கிய கன்னி
மழைபொழி நீரிடை மகிழ்ந்து குதித்தாள்

விழவிழ நீர்த்துளி வியன்தரு உடலில்
பளபள வென்றுமே பருவம் மினுங்க
மளமள வென்றிடை மனதினில் ஏக்கம்
விளைவிளை என்று விளைந்திட அவனோ

எழஎழ நெஞ்சினில் இச்சையும்பெருகி
குளுகுளுவென்றுமே குலவிடத் தேகம்
அழகெழு மயிலென ஆடிடும் அவளை
தொழுதெனும் வேண்டத் தோன்றிட அவனோ

சளசள வென்றுமே நீரிடைபாதம்
வழவழ வென்றுமெ வழுக நடந்து
பழமெழு நிறமும் பனியென விழியும்
விளையிள வதனத் திருமகள்பார்த்தே

துளிதுளி யாகவே அச்சமும் விலக
களிகளி என்றுமே காத்திடும் மனது
பிழிபிழி என்றுமே பிழிந்துள்ளம் உந்த
கிளைகிளை தோறும் தாவிடும் மந்தி

கொளும் உணர்வோடு கொடியிடைமகளை
சிலைகலை ஓவியச் சித்திரப் பாவை
குலைகுலை வகையாய் கனிகளின் கூட்டம்
பலபல கொண்டவள் பக்கம ணைந்து

விலையிலை உனதே விந்தைகொள் அழகு
அலைமகள்எழிலும் அஞ்சிய நடையும்
வலைகளை வீசும் விழிகளும் கண்டேன்
நிலைகுலைவாகி நெஞ்சமி ழந்தேன்

அலையுலைந்தாடும் ஓடமும்போல
வலைவிழுந் துளலும் விழிகயல்போலே
பலதுயர் தந்தாய் பாவையே நீக்க
இலதொரு வழிதான் இணைவது ஒன்றே

நலமெனக்கூறி நனி இதழ்தேனே
சலசலப்பின்றி சம்மதம்தாராய்
பொலபொல வென்றே கொட்டிடபணமும்
அளவில எந்தன் அகமுண்டுவாராய்

சொலுமவன் இதனைச்சொல்வதும் இன்றி
பிழைபிழையாகவே சிந்தனை முடிவாய்
வலதொரு கையால் வஞ்சியை அணைக்க
விளைந்திட அவளோ விலகியே சற்று

கடுகடு உரமும் காதலும் கண்ணில்
விடுவிடு என்றே வேகமும் கொண்டோன்
திடுதிடு வென்றுமே தேர்திடமுன்னே
நடுதொரு நிலையை நினைவது இலையோ

தொடுதொடு என்றெனைத் தொட்டுமே தாலி
குடுகுடு என்றுமே கொட்டிட மேளம்
சுடுசுடு தீயதும் எரிந்திட முன்னே
விடுவிடு என்றுமே விரைந்தவர் கட்டி

இடுமென தன்பை ஏற்றவர் அந்தோ
சிடுசிடு என்றுமே சினந்திட எம்மை
கொடுகொலை வாளுடன் நெருங்குவர் காண்க
விடுவர்உன் னுயிரெனில் வருகபின் என்றாள்

இரட்டைக் கிளவிகளை வைத்து வைரமுத்து ஒரு பாடல் எழுதி இருப்பார்.. அது போல எழுத இயலுமா என்று என்னை நானே பலமுறை கேட்டுக்கொண்டதுண்டு.. ஆனால் ஏனோ முயற்சிக்க வில்லை..

இந்த பாடலைக் கண்ணூற்று பெருமகிழ்வு அடைந்தேன்.. இது கிரிகாசன் அண்ணாவால் தான் இயலும் என்பதை நான் உணர்ந்து இருக்கிறேன்..

என்ன சொல்ல பாராட்ட..? சிலு சிலுவென்ற தமிழ்த் தென்றல் வீசிட மளமளவென்று வரிகள் விழுந்திட விரு விரு என்னும் சுவை குன்றாமல் சுறுசுறு என்னும் அழகிய பாடல் வாசித்து மகிழ்ந்தேன்..

மனமார்ந்த பாராட்டுகக் கிரிகாசன் அண்ணா..!

அன்பு கலையண்ணா

தங்களுக்கு எப்படி நன்றி தெரிவிப்பதென்றே தெரியவில்லை
மனம் கனிந்து பாராட்டும் உங்கள் இதயத்துக்கு நான் என்றும் அடிமை (அன்பில்)

அன்புடன் கிரிகாசன்

கிளவியை கொண்டு பாடிய கன்னி கவிதை இது உங்களுக்கு கன்னி முயற்ச்சியும் அல்ல அருமை தொடருங்கள்

maniajith007 wrote:கிளவியை கொண்டு பாடிய கன்னி கவிதை இது உங்களுக்கு கன்னி முயற்ச்சியும் அல்ல அருமை தொடருங்கள்

நன்றி!, மணிஅஜித் ! தங்கள் உள்ளம் தந்த வாழ்த்துக்கு நன்றிகள்

மிக அருமையான வரிகளை இங்கே தொகுத்து அமைத்து கவிதையாய் தந்தமைக்கு அன்பு பாராட்டுக்கள் ஐயா....

"பலே பலே"


ரமணீயன்

T.N.Balasubramanian wrote:"பலே பலே"


ரமணீயன்

நன்றி ஐயா,
தங்கள் வாழ்த்துக்களும் பாராட்டுக்களும் இந்த விளையும் புல்(நெல்?)காட்டினில் பெய்யும் மழை எனக் கூடிய விளைசலுக்கு உரம்தரும். நன்றி ஐயா!