கடாபியிடம் இருந்து அப்பாவி மக்களை காப்பாற்ற லிபியா மீது தாக்குதல் நடத்த ஐ.நா. சபை ஒப்புதல்

கடாபியிடம் இருந்து அப்பாவி மக்களை காப்பாற்ற லிபியா மீது தாக்குதல் நடத்த ஐ.நா. சபை ஒப்புதல்
ஓட்டெடுப்பை இந்தியா புறக்கணித்தது


கடாபியிடம் இருந்து அப்பாவி மக்களை காப்பாற்றுவதற்காக, லிபியா மீது ராணுவ நடவடிக்கை எடுக்க ஐ.நா. பாதுகாப்பு கவுன்சில் ஒப்புதல் அளித்தது. ஆனால் இதுதொடர்பான தீர்மானம் மீதான ஓட்டெடுப்பை இந்தியா புறக்கணித்தது.

கடாபி மிரட்டல்

ஆப்பிரிக்க நாடான லிபியாவில் 41 ஆண்டுகளாக சர்வாதிகார ஆட்சி நடத்தி வருகிறார், கடாபி. அவருக்கு எதிராக கடந்த மாதம் புரட்சி வெடித்தது. முக்கிய நகரங்களை போராட்டக்காரர்கள் பிடித்தனர். இதையடுத்து, அந்நகரங்களை மீட்க கடாபி ஆதரவு படைகள் தாக்குதலை தொடங்கின. விமானம், பீரங்கி, ஏவுகணை ஆகியவற்றைக் கொண்டும் தாக்குதல் நடத்தப்பட்டது. இதில் ஏராளமான அப்பாவி மக்கள் பலியாகி வருகிறார்கள்.

போராட்டக்காரர்கள் பிடியில் உள்ள இரண்டாவது பெரிய நகரான பெங்காசியை கைப்பற்ற கடாபி படைகள் விரைந்துள்ளன. புரட்சிக்காரர்களுக்கு இரக்கம் காட்ட மாட்டோம் என்று கடாபி மிரட்டல் விடுத்தார்.

ஐ.நா. ஒப்புதல்

இந்த பரபரப்பான சூழ்நிலையில், லிபிய மக்களை காப்பாற்றுவதற்காக, ஐ.நா. பாதுகாப்பு சபையில், இங்கிலாந்து, பிரான்சு, லெபனான் ஆகிய நாடுகளின் சார்பில் தீர்மானம் கொண்டுவரப்பட்டது. கடந்த செவ்வாய்க்கிழமையில் இருந்து அத்தீர்மானத்தின் மீது விவாதம் நடைபெற்று வந்தது. இறுதியில் நடைபெற்ற ஓட்டெடுப்பில், 15 நாடுகளைக் கொண்ட பாதுகாப்பு சபையில், 10 நாடுகள் தீர்மானத்தை ஆதரித்து ஓட்டுப் போட்டன.

`வீட்டோ' அதிகாரம் கொண்ட சீனா, ரஷியா, நிரந்தரம் அல்லாத உறுப்பினர்களான இந்தியா, ஜெர்மனி, பிரேசில் ஆகிய நாடுகள் ஓட்டெடுப்பில் கலந்து கொள்ளவில்லை. இதனால் பெரும்பான்மை ஆதரவுடன் தீர்மானம் வெற்றி பெற்றது.

ராணுவ நடவடிக்கை

இந்த தீர்மானத்தின்படி, லிபியாவின் வான்மண்டலத்தில், நிவாரண பணிக்கான விமானங்கள் தவிர, மற்ற விமானங்கள் பறக்க தடை விதிக்கப்பட்டுள்ளது. இதனால், போராட்டக்காரர்கள் மீது கடாபி படைகள் விமான தாக்குதல் நடத்த முடியாது. மேலும், அப்பாவி மக்களை காப்பாற்ற, தேவையான அனைத்து நடவடிக்கைகளையும் (ராணுவ நடவடிக்கை) எடுக்க ஐ.நா. பாதுகாப்பு சபை ஒப்புதல் அளித்துள்ளது.

அதே சமயத்தில், லிபியாவில் ராணுவத்தை குவிப்பது இல்லை என்றும் தீர்மானத்தில் கூறப்பட்டுள்ளது. எனவே, லிபியா மீது விமான தாக்குதல் மட்டுமே நடத்தப்படும் என்று தெரிகிறது.

லிபியா மீது எந்த நேரத்திலும் பிரான்சு, இங்கிலாந்து, அமெரிக்கா உள்ளிட்ட படைகள் தாக்குதல் நடத்தும் என்று பிரான்சு மந்திரி தெரிவித்தார். ஆனால், உடனடியாக தாக்குதல் நடத்தும் திட்டம் இல்லை என்று அமெரிக்க அதிகாரிகள் தெரிவித்தனர்.

ஒபாமா ஆலோசனை

இதற்கிடையே, தீர்மானம் நிறைவேற்றப்பட்டவுடன், இங்கிலாந்து மற்றும் பிரான்சு பிரதமர்களை அமெரிக்க அதிபர் ஒபாமா டெலிபோனில் தொடர்பு கொண்டார். தீர்மானத்தை அமல்படுத்துவதற்கான வழிமுறைகள் குறித்து அவர் ஆலோசனை நடத்தினார்.

மேலும், பதவி விலகி, நாட்டை விட்டு வெளியேறுமாறு கடாபிக்கு ஐரோப்பிய கூட்டமைப்பு அறிவுரை கூறியுள்ளது.

தினதந்தி

எப்படியோ மக்கள் இதில் இருந்து மீண்டால் சரி.அந்த கொடுங்கோலன் aatchila இருந்து மீண்டு மக்கள் சுதந்திர மூச்சு காற்று விடும் நாள் varattum

இனியாவது உயிர் பலிகள் குறையட்டும் ஒரேடியாக நிற்கட்டும்....

ஆனால் பெரும்பாலும் லிபியா மக்கள் கடாபியை தான் விரும்பிகிறார்கள் என்று பி‌பி‌சி செய்தி குறிப்புகள் தெரிவிக்கின்றனர்.